14 студзеня спаўняецца 105 гадоў з дня нараджэння ксяндза Уладзіслава Чарняўскага — легендарнага святар-адраджэнца, які шмат зрабіў для таго, каб у нашых касцёлах сёння гучалі малітвы і Божае слова на роднай мове.

Уладзіслаў Чарняўскі нарадзіўся 14 студзеня 1916 г. у засценку Амбружына, што на Смаргоншчыне, у шматдзетнай каталіцкай сям’і. Прэзбітэрскае пасвячэнне прыняў кастрычніку 1944 г., пасля чаго на працягу дзевяці гадоў нёс святарскае служэнне ў розных парафіях на тэрыторыі Літвы, а ў кастрычніку 1953 года стаў пробашчам парафіі Адведзінаў Найсвяцейшай Панны Марыі ў Вішневе, што на Валожыншчыне.

Святар прамаўляў казанні і праводзіў катэхізацыю на роднай мове, а пасля Другога Ватыканскага Сабору перакаладаў на беларускую мову літургічныя тэксты і Святое Пісанне.

Яго праца спрыяла папулярызацыі і распаўсюджванню беларускай мовы ў мясцовым Касцёле.

Руплівы святар адышоў у вечнасць 22 снежня 2001 года. Цяпер у Вішневе дзейнічае музей ксяндза Уладзіслава Чарняўскага. Сваімі ўспамінамі пра легендарнага душпастыра падзялілася са слухачамі «Радыё Марыя» стваральніца гэтага музея Тэрэза Бітэль, парафіянка вішнеўскай парафіі.

Паводле Catholic.by