Дні памяці, малітвы і падзякі

У аўторак, 26 красавіка 2016, у 30-ю гадавіну аварыі на Чарнобыльскай АЭС, грэка-католікі г. Мінска маліліся ў капліцы Душпастырскага цэнтра св. Язэпа.

Вялікую паніхіду за супакой усіх, хто загінуў у час аварыі або памёр у выніку прамянёвай хваробы, адслужылі грэка-каталіцкія душпастыры архімандрыт Сяргей (Гаек), а. Алесь Шыбека (душпастыр парафіі св. Мікалая Цудатворцы) ды а. Аляксей Філіпенка (дапаможны святар парафіі Святога Духа). Малітву вернікаў суправаджаў спеў міжпарафіяльнага хору "Прасфара".
У малітве з удзячнасцяй ўзгадалі таксама ўсіх ліквідатараў, якія мужна стараліся мінімізаваць шкоды аварыі ды ўсіх людзей добрай волі ў замежжы, якія да сёння нясуць дапамогу пацярпелым, асабліва дзецям.

У чацвер, 28 красавіка 2016 г., архімандрыт Сяргей перадаў на рукі архімандрыта Клаўдзія (Рабінэ) у Бруселі словы асаблівай падзякі некаторым бельгійскім сябрамі Беларусі, якія праз дзесяцігоддзі арганізоўвалі розныя формы дапамогі беларускім дзецям пацярпелым ад Чарнобыльскай аварыі.