Зверхнік Украінскай Грэка-Каталіцкай Царквы арцыбіскуп Святаслаў (Шаўчук), распавядаючы аб выніках візіта ў Рым і сустрэчы з Папам Францішкам, 5 сакавіка запэўніў вернікаў і духавенства сваёй Царквы: “Папа нас пачуў».

Мэтай сустрэчы з пантыфікам было абмеркаванне спрэчных параграфаў падпісанай 12 лютага на Кубе Папам Францішкам і Патрыярхам Маскоўскім і ўсяе Русі Кірылам Дэкларацыі, у якіх, на думку часткі ўкраінцаў, непразрыста гаворыцца аб статусе УГКЦ і намерах адносна яе Рускай Праваслаўнай Царквы Маскоўскага Патрыярхата, а таксама аб сутнасці ваеннага канфлікта на ўсходзе Украіны.

Сустрэча адбылася напярэдадні 70-й гадавіны так званага “Львоўскага сабора”, на якім дзейнасць УГКЦ была забароненая. «Мы прыехалі папрасіць пантыфіка ў Год міласэрнасці дапамагчы людзям, якія пакутуюць ва Украіне», – кажа зверхнік УГКЦ пра мэту паездкі, паведамляе ugcc.fr.

Таксама арцыбіскуп распавёў, што разам з іншымі іерархамі УГКЦ падрыхтаваў зварот, у якім “даносіцца да ўвагі сусветнай грамадскасці інфармацыя пра агрэсію і гібрыдную вайну супраць Украіны і распавядаецца пра пакуты мільёнаў нявінных людзей”, пра выпадкі “зверстваў, выкрадання, увязнення і катавання”, пра палітыку ўціску ў дачыненні да крымскіх татараў.

«Я сказаў пантыфіку: народ пакутуе, Ваша Святасць, і чакае Вашых абдымкаў. Папа Францыск даў выразна зразумець, што будзе дзейнічаць», – кажа арцыбіскуп Святаслаў.

«Для ўкраінцаў, якія належаць да розных Цэркваў і рэлігійных арганізацыяў, і нават для няверуючых, Папа Францішак з’яўляецца глабальным маральным аўтарытэтам, які кажа праўду”, – кажа іерарх, даводзячы словы Папы Францішка аб тым, што экуменічныя пытанні памід Масквой і Ватыканам ніколі не будуць вырашацца коштам Усходняй Каталіцкай Царквы.

Паводле Krynica.info