20 сакавіка ў Апостальскай Сталіцы адбылася сустрэча Надзвычайнага і Паўнамоцнага Пасла Рэспублікі Беларусь пры Святым Пасадзе Сяргея Алейніка з Дзяржаўным сакратаром кардыналам Тарчызіа Бэртонэ і прэфектам Кангрэгацыі па справах Усходніх Цэркваў кардыналам Леанарда Сандры.

Як паведамілі агенцтву «Интерфакс» у прэс-службе Міністэрства замежных спраў Рэспублікі Беларусь, у ходзе сустрэч былі абмеркаваны перспектывы далейшага развіцця беларуска-ватыканскага супрацоўніцтва ў розных сферах.

Таксама Сяргей Алейнік перадаў кардыналу Бэртонэ арыгінал віншавальнага паслання Прэзідэнта Беларусі Аляксандра Лукашэнкі папу Францішку з нагоды яго інаўгурацыі.

Надзвычайны і Паўнамоцны Пасол Рэспублікі Беларусь пры Святым Пасадзе Сяргей Алейнік і Надзвычайны і Паўнамоцны Пасол Рэспублікі Беларусь у Італьянскай Рэспубліцы Яўген Шастакоў уваходзілі ў склад дэлегацыі Беларусі на цырымоніі інаўгурацыі Святога Айца. Дэлегацыю ўзначаліў Старшыня Савета Рэспублікі Нацыянальнага сходу Анатоль Рубінаў.

Паводле Catholic.by