Хрысьціяне візантыйскай традыцыі – грэка-католікі і праваслаўныя – пачынаюць сёлета Вялікі Пост у панядзелак, 7 сакавіка.

У гэтым годзе ўсе хрысьціяне сьвяткуюць сьвята Пасхі Хрыстовай у адзін дзень – 24 красавіка.
Традыцыйна гэтай радаснай падзеі папярэднічае саракадзённы Вялікі Пост, які прыгадвае нам саракадзённае перабываньне Госпана і Збаўцы нашага Ісуса Хрыста ў пустыні ды рыхтуе нас праз пакаяньне да прыняцьця радаснай весткі пра Ўваскрасеньне.

Усе хрысьціяне візантыйскай літургічнай традыцыі – грэка-католікі і праваслаўныя – пачынаюць сёлета Вялікі Пост разам, у панядзелак, 7 сакавіка.

Паводле літургічнай традыцыі першыя чатыры дні Вялікага Посту вернікі зьбіраюцца ўвечары ў храме, каб разам маліцца Вялікі пакаянны канон сьв. Андрэя Крыцкага.

(Тэкст канона на кожны дзень можна знайсьці на старонках ЧАСАСЛОЎЦА па спасылцы: http://www.chasaslovec.info/index.php?do=category=post_tr)

Ужо больш за 100 год у першую пятніцу сакавіка адзначаецца «Сусветны дзень малітвы». Рух жанчын-хрысціянак розных канфесій у гэты дзень моліцца аб надзённых патрэбах усяго свету.

Тэксты супольнай малітвы для ўсіх удзельніц руху (жанчыны са звыш 170 краін свету) пішуць прадстаўніцы пэўнай краіны. Сёлета над тэкстамі працавалі хрысціянкі Чылі, якія абралі для разважанняў урывак з Евангелля паводле Марка (пар. Мк 6, 30–44).
Сам загаловак — «Колькі ў вас хлябоў?» — указвае на перавагу сацыяльнай тэматыкі, пытанняў экалогіі, глабалізацыі, салідарнасці з прыгнечанымі і грамадскай справядлівасці.

Паводле Catholic.by

Святы Казімір з’яўляецца асабліва шанаваным у Літве, Беларусі і Польшчы як апякун моладзі.
Памёр ён 4 сакавіка 1484 г. у Гродне а яго рэліквіі знаходзяцца ў віленскай катэдры.

3 сакавіка 2011 г. Апостальскі Візітатар БГКЦ Архімандрыт Сяргей (Гаек) адслужыў Боскую Літургію ў капліцы Цэнтра св. Язэпа ў Мінску, на якой вернікі, а асабліва панамары, маліліся за беларускую моладзь, за узрастанне ў веры і любові да Царквы і Бацькаўшчыны.

Беларуская Грэка-каталіцкая Царква адзначае 100-годдзе з дня нараджэньня выдатнага беларускага патрыёта, грэка-каталіцкага сьвятара, духовага настаўніка, культурна-асьветніцкага дзеяча, педагога, дасьледчыка гісторыі.

Ніжэй зьмяшчаем ягоную кароткую біяграфію.

10 лютага на прэс-канферэнцыі ў Кіеве Яго Блаславенства Любамір (Гузар) паведаміў пра тое, што ў гэты дзень Яго Святасць Папа Бенядыкт XVI прыняў ягонае адрачэнне ад пасаду Вярхоўнага Архібіскупа Украінскай Грэка-Каталіцкай Царквы. Адпаведную просьбу да Святога Айца Першаярарх УГКЦ падаў, калі яму споўнілася 75 гадоў.

«Сёння, калі я ўжо не маю дастаткова сілаў, хачу перадаць пасад свайму наступніку, які працягне гэтую справу больш эфектыўна. Бо гэта не мая праца і я не з’яўляюся ключом. Ключом ёсць Царква, а мэта нашай працы – служэнне Царкве, і мы страемся яго выконваць да таго моманту, пакуль можам гэта рабіць эфектыўна», – тлумачыць сваё рашэнне Вярхоўны Архібіскуп Любамір.

10 лютага 2011 г. Святы Айцец Бенядыкт XVI, згодна з канонам 126 § 2 Кодэкса канонаў Усходніх Цэркваў, прынял просьбу Першаіерарха Украінскай Грэка-Каталіцкай Царквы, Яго Блаславенства кардынала Любаміра (Гузара) і звольніў яго з пасаду Вярхоўнага Архібіскупа Кіева-Галіцкага.

Згодна з царкоўным заканадаўствам Адміністратарам Вярхоўнага Архібіскупства Кіева-Галіцкага стаў Архібіскуп Львоўскі Уладыка Ігар (Возняк).
Ён з’яўляецца адказным за скліканне Сіноду Біскупаў Украінскай Грэка-Каталіцкай Царквы для абрання новага Вярхоўнага Архібіскупа.

Кніга вядомага беларускага навукоўца, доктара гістарычных навук, прафесара Леаніда Лыча “Уніяцкая Царква ў Беларусі. Этнакультурны аспект” выйшла ў міскім выдавецтве “Кнігазбор” напрыканцы 2010 г.

28 студзеня 2011 г. прайшла прэзентацыя гэтай кнігі ў рамках духовай сустрэчы грэка-каталіцкага Клуба інтэлігэнцыі імя Кірылы Тураўскага, які дзейнічае пры Парафіі Праведнага Язэпа.

Кнігу прэзентаваў кандыдат гістарычных навук Вадзім Аніпяркоў а прысутны Аўтар расказаў пра сваю працу над кнігай, якая была напісаная 15 год таму, ды адказваў на пытанні прысутных.

Удзельнікі сустрэчы былі згоднымі, што гісторыя Уніяцкай Царквы ў Беларусі ўсё ж мала яшчэ вядомая грамадству і патрабныя новыя яе апрацаванні.

27 студзеня Царква ўспамінае блаславёнага Юрыя (Матулевіча), біскупа Віленскага, які быў першым ардынярыем для парафіяў візантыйскага абраду, што знаходзіліся на тэрыторыі Віленскай дыяцэзіі.

Блаславёны Юры Матулевіч быў аднавіцелем Ордэну Марыянаў, біскупам віленскім (1918-1925)і стала падтрымліваў ідэю еднасьці Царквы.
Яшчэ ў 1921 годзе (да пачатку т. зв. нэа-унійнай акцыі ён прасіў у кангрэгацыі Усходняй Царквы права служыць у ва ўсходнім абрадзе для двух лацінскіх сьвятароў Міхала Пятроўскага і Антона Зянкевіча. Быў тым хто паспрыяў здзяйсьненьню сьвятарскага пакліканьня а. Баляслава Пачопкі.

Блаславёны сьвяціцель Юры меркаваў, што ерархія і структура Ўніяцкай Царквы павінны быць якнайхутчэй адноўленыя. Ён быў прыхільнікам працы езуітаў у Альберціне і базыльянаў у Таракані.

18–25 студзеня 2011 г. ва ўсім свеце праходзіць 44 Тыдзень малітваў за адзінства хрысціянаў. Да гэтай малітвы далучаецца і Каталіцкі Касцёл у Беларусі.

У межах тыдня 22 студзеня ў мінскай архікатэдры Імя Найсвяцейшай Панны Марыі (пл. Свабоды, 9) адбудзецца супольная малітва прадстаўнікоў розных хрысціянскіх канфесій Беларусі. Удзел у службе прыме Апостальскі Візітатар БГКЦ архім. Сяргей Гаек.
18.30 — літургія, якую ўзначаліць Апостальскі нунцый у Беларусі Марцін Відавіч;
19.30 — экуменічнае набажэнства, пасля якога адбудзецца ламанне хлеба паміж удзельнікамі.

Сёлета матэрыялы Тыдня малітваў аб адзінстве хрысціянаў падрыхтаваны хрысціянамі ў Іерусаліме. Дэвізам стануць евангельскія словы з Дзеяў Апосталаў: «Яны заставаліся вернымі вучэнню Апосталаў і супольнасці, ламанню хлеба і малітвам».

Паводле Catholic.by

15 студзеня ў Селютскім доме-інтернаце, што пад Віцебскам, ў рамках рэалізацыі акцыі “Св. Мікалай ідзе да дзяцей” адбыўся святочны вечар для людзей з асаблівасцямі псіха-фізічнага развіцця і састарэлых. Мерапрыемства было праведзена валанцёрамі руху св. Мікалая грэка-каталіцкай парафіі Уваскрасення Хрыстова на чале з айцом Зміцерам Грышанам сумесна з валанцёрамі рыма-каталіцкай парафіі Святога Духа на чале з ксяндзом Андрэем Каліцякам SDS. Пад час правядзення вечару моладзь падрыхтавала цікавую музычную, конкурсную і забаўляльную праграму, а таксама, салодкія падарункі, якія карыстаюцца вялікім попытам сярод насельнікаў інтернату. Як адзначылі арганізатары акцыі, існуе рэальная неабходнасць міжпарафіяльнага супрацоўніцтва ў справе розвітку дабрачыннага служэння і акцыя стала добрым таго прыкладам.

а. Аляксандр Шыбека