Кангрэс свецкіх вернікаў Украінскай Грэка-Каталіцкай Царквы цэнтральнай і паўднёва-ўсходняй Украіны адбудзецца ў Кіеве з 12 па 14 лістапада 2010 г. Тэма кангрэса — роля свецкіх вернікаў у развіцці і станаўленні УГКЦ ва ўсходняй Украіне.

«У нашым горадзе распаўсюджана меркаванне, што ў Царкве пэўную задачу маюць толькі біскупы, святары, дыяканы і манахі. Гэта няпоўнае разуменне Царквы, — тлумачыць Першаярарх УГКЦ Яго Блаславенства Любамір (Гузар). У царкоўным жыцці вельмі важнае і адказнае месца займаюць таксама свецкія вернікі. Іх задача – не толькі асвячаць сваю душу, але і асвячаць свет, у якім яны жывуць. А духавенства і манаства служаць свецкім вернікам, каб іх дзейнасць сапраўды выконвала гэтую місію», — падкрэсліў Уладыка Любамір.

Паводле Catholic.by

У аўторак 9 лістапада 2010 г. у мінскай рыма-каталіцкай архікатэдры адбылася малітоўная сустрэча хрысціянскай моладзі. Узначаліў малітву брат Георг Бенуа з экуменічнай Супольнасці Тэзэ (Францыя).

Малітва суправаджалася спевам парафіяльнага хору. Прагучалі каноны і песні Тэзэ. Затым адбыўся паказ фільма пра жыццё ў французскай вёсцы Тэзэ.
У межах малітоўнай праграмы брат Георг прапанаваў прысутным разважанні аб Закхеі, які, маючы маленькі рост, залез на дрэва, каб убачыць Хрыста. Ізус жа, бачачы гэта, сказаў, што жадае наведаць дом Закхея. Той, безумоўна, мог бы адмовіцца, растлумачыўшы гэта тым, што ў доме не прыбрана або няма пачастунку. Аднак ён гэтага не ўчыніў. Ён запрасіў Хрыста да сябе. Так і мы, як адзначыў брат Георг, не павінны баяцца прыняць Ісуса з-за «непрыбранага дома» сваёй душы. Хрыстос пайшоў да Закхея, ведаючы, што ён грэшнік. І за гэта Яго папракалі. Аднак жа радасць ад гэтай сустрэчы дала Закхею сілы змяніць сваё жыццё.

У ноч з суботы на нядзелю 6/7 лістапада 2010 ў грэка-каталіцкай парафіі Уваскрасення Хрыстова ў Віцебску адбылося начное малітоўнае чуванне моладзі. Правадзілася яно ў рамках духоўнай падрыхтоўкі да ўрачыстасці святамучаніка Язафата, Архібіскупа Полацкага (12 лістапада).

Чуванне пачалося з урачыстай нядзельнай Вячэрні, пасля якой моладзь разважала духоўныя настаўленні Айцоў Царквы ды малілася Ружанец за еднасць хрысціянаў і пашырэнне хрысціянскага валанцёрскага служэння ў Беларусі.

Каля 3-яй гадзіны ночы адбыўся паход да цудадзейнай крыніцы на Юр’евай горцы, ля якой моладзь малілася за г. Віцебск. Скончылася чуванне раняшняй Боскай Літургіяй а 6-ай гадз.

Варта заўважыць, што ў начным чуванні прыймалі ўдзел таксама асобы непоўнаспраўныя і дзеці.

Сустрэча з сёстрамі з ордэну св. Тэрэзы Калькутскай.

Напрыканцы кастрычніка валанцёры руху св. Мікалая з Віцебска і Магілёва здзейснілі пілігрымку ў Гомель да манастыра сясцёр ордэну св. Тэрэзы Калькутскай. Сёстры вядуць цэнтр сацыяльнай дапамогі бяздомным і хворым на алкагольную залежнасць, а таксама наведваюць хворых па дамах і ў лекарнях.

Валанцёраў вельмі ўразіла ўбогасць у якой жывуць сёстры. Яны ня маюць ні аўтамабіля, ні кампутара, ні тэлевізара, ні мабільных тэлефонаў, ні нават пральнай машыны. Яны усё робяць сваімі рукамі, нават самі сціраюць бялізну з усяго сацыяльнага цэнтру.
Сёстры кажуць, што самае важнае ў іх працы – гэта захаваць дух убогасці іх Заснавальніцы - Маці Тэрэзы, каб матэрыяльна не адрознівацца ад тых, каму яны служаць.

1 лістапада 2010 г. у межах праграмы асвячэння могілак у Мінску і Мінскім раёне адбылася малітва на месцы былога канцлагера «Трасцянец», што знаходзіцца ў мінскім мікрараёне Шабаны.

У 15.00 — у гадзіну Божай міласэрнасці — на месцы былога канцлагера каля памятнага знака з надпісам, які сведчыць пра тое, што тут былі спалены шматлікія людзі, распачалося набажэнства ў інтэнцыі супакою душаў тых, хто стаў ахвярамі фашызму.

Набажэнства ўзначалілі дэкан Серабранкаўскі кс. Ігар Лашук SDB і грэка-каталіцкі дэкан Цэнтральнага Дэканату а. Яўген Усошын. Удзел у набажэнстве прынялі таксама вернікі парафіі Хрыста Збаўцы (Шабаны).

Набажэнства за памерлых на месцы былога канцлагера адбудзецца таксама 6 лістапада ў 14.00, а ўзначаліць яго кс. Юрый Санько, пробашч парафіі ў Шабанах.

4 – 7 лістапада 2010 г. Балгарская Каталіцкая Царква ўсходняга абраду святкуе юбілей 150-годдзя аднаўлення Еднасці з Рымскім Апостальскім Пасадам.
Урачыстасці адбудуцца ў гарадах Плоўдзіве і ў Сафіі.
Іх узначаліць Прадстаўнік Святога Айца Бенядыкта XVI-га Прэфект Кангрэгацыі Ўсходніх Цэркваў Кардынал Леанарда Сандры.

У святкаваннях прыймуць удзел таксама ярархі Усходніх Каталіцкіх Цэркваў з усёй Еўропы, якія ў той жа час сустракаюцца ў Сафіі на штогадовую сустрэчу. Беларускую Грэка-Каталіцкую Царкву на ўрачыстасцях прадстаўляе Апостальскі Візітатар для грэка-католікаў Беларусі Архімандрыт Сяргей (Гаек).

Парафія Праведнага Язэпа і Парафія св. Мікалая Цудатворцы
18.30 – Заупакойная Літургія і Ліцця за памерлых у капліцы Цэнтра св. Язэпа (вул. Арджанікідзе д. 6)

+ + +

Парафія Маці Божай Нястомнай Дапамогі і Парафія Святога Духа
18.30 – Заупакойная Літургія і Ліцця за памерлых у чырвоным касцёле (ніжні храм)

Просім падрыхтаваць Запіскі (з імёнамі).

+ + +

Адносна задушных службаў можна скантактавацца са святарамі:
а. Яўген Усошын 8 (029) 312 28 26 Velcom, 8 (033) 631 55 24
а. Пахом (Кавалёў) 8 (029) 767 70 87 МТС
а. Аляксандр Аўдзеюк 8 (029) 522 70 19 МТС

Паховіны айца Іва Марыён

16 кастрычніка 2010 г., на 75-м годзе жыцця адышоў да Госпада прыяцель нашай Царквы, французскі святар а. Іў Марыён.

Айцец Іў быў уражэнцам гор Вог'езы ў Латарынгіі. Значную частку свайго жыцця служыў у Парыжы, асабліва як заснавальнік і кіраўнік каталіцкага радыё Notre Dame de Paris.
У 1973 годзе заклаў міжнародную асацыяцыю Экуменічнага Сяброўства (Amitie Oecumenique Internationale), якой кіраваў да 2007 г.
У 2002 годзе вярнуўся ў родныя Ваг'езы і служыў як пробашч гарадка Сальсір.

28 кастрычніка, ва ўспамін святога Апостала Юды Тадэвуша, свае імяніны адзначае Мітрапаліт Мінска-Магілёўскі Архібіскуп Тадэвуш Кандрусевіч.
У гэты ж дзень 30 год таму сакрамант святарства атрымаў сённяшні дапаможны біскуп Мінска-Магілёўскай архідыяцэіі Антоні Дзям’янка.

У інтэнцыі абодвух Ярархаў 28 кастрычніка 2010 г. у мінскай архікатэдры а 18.30 адбудзецца св. Імша, якую яны будуць канцэлебраваць.

Шчыра запрашаем мінскіх вернікаў да супольнай малітвы ў інтэнцыях Дастайных Ярархаў і аб Божых ласках на іх далейшы жыццёвы шлях.
Шчырая малітва стане сапраўднай удзячнасцю Найвышэйшаму за пастырскае служэнне руплівых пастыраў Беларусі.

Дапаможны біскуп Мінска-Магілёўскай архідыяцэзіі Антоні Дзям’янка пасля заканчэння сярэдняй школы не атрымаў дазволу ад дзяржаўных уладаў на паступленне ў Рыжскую духоўную семінарыю. Святарскую фармацыю праходзіў пад кіраўніцтвам доктара тэалагічных навук кс. прэлата Вацлава Пянткоўскага, тагачаснага Генеральнага вікарыя Пінскай дыяцэзіі. 28 кастрычніка 1980 г. атрымаў святарскія свячэнні.

У нядзелю 24 кастрычніка 2010 г. у Рыме прайшлі юбілейныя святкаванні 280-годдзя каранацыі цудатворнай Іконы Жыровіцкай Маці Божай, якая шануецца ў грэка-каталіцкім храме святых мучанікаў Сяргея і Вакха.

Боская Літургія была адслужана ў рыма-каталіцкім храме Мадона дэі Монці (Madonna dei Monti), паколькі царква святых Сяргея і Вакха невялікая.

Літургію ўзначаліў Апостальскі Візітатар для грэка-католікаў ў Італіі і Іспаніі Ўладыка Дыянісій (Ляховіч) у саслужэнні з ерархам Тэрнопальска-Зборыўскім Уладыкам Васілём (Семенюком), Уладыкам Ірынеем (Білыкам) ды Апостальскім Візітатарам БГКЦ Архімандрытам Сяргеем (Гаекам) і шматлікімi духавенствам, сярод якога быў і беларускі ераманах а. Лявонцій (Тумоўскі).