У календары Усходніх Цэркваў 15 студзеня прыпадае успамін св. Паўла Фіваідскага а 17 студзеня св. Антонія Вялікага – першых егіпецкіх манахаў- пыстыннікаў.
У гэтыя дні ў грэка-каталіцкіх парафіях Беларусі праходзяць адмысловыя малітвы братэрскай салідарнасці з хрысціянамі Егіпта, якія пасля тэрарыстычнага акту 31 снежня 2010 г. ў Аляксандрыі (у выніку якога загінуў 21 чалавек а каля ста атрымалі раненні) жывуць у атмасферы страху.

“Мы молімся за хрысціянаў у Егіпце і на ўсім Бліскім Усходзе, за шматлікія ахвяры перасьледу. Молімся, каб быў пачуты голас Святога Айца Бенядыкта XVI і каб згодныя высіўкі прадстаўнікоў рэлігійных супольнасцей і дзяржаўных уладаў дапамаглі забяспечыйь супакой паміж вызнаўцамі розных рэлігій” – сказаў протапрэзбітар Цэнтральна-Заходняга Дэканату БГКЦ а. Яўген Усошын пасьля Боскай Літургіі, якую адслужыў ён сёння – 15 студзеня 2011 г. у капліцы душпастырскага цэнтра парафіі Маці Божай Нястомнай Дапамогі ў Мінску.

Сёння 14 студзеня 2011 г. Яго Святасць Папа Бенядыкт ХVI прыняў на прыватнай аўдыенцыі Яго Эмінэнцыю кардынала Анджэло Амато, Прэфекта Кангрэгацыі па справах Кананізацыі.
Падчас аўдыенцыі Святы Айцец упаўнаважыў Кангрэгацыю апублікаваць дэкрэт, што тычацца цуду за заступніцтвам Найвялебнага Слугі Божага Яна Паўла ІІ ( Kарола Вайтылы) Папы Рымскага, які нарадзіўся ў Вадовіцах ( Польшча) 18 мая 1920 года і памёр у Рыме 2 красавіка 2005 года.

Папа Бенядыкт XVI упаўнаважыў апублікаваць дэкрэт аб сапраўднасці цудоўнага аздараўлення французскай манахіні Марыі-Сімонэ П’ер Норманд, якое прыпісваецца заступніцтву Яна Паўла ІІ. Гаворка ідзе пра невытлумачальныя, з медыцынскага пункту гледжання, раптоўныя знікненні сімптомаў хваробы Паркінсона.

Абрад бэатыфікацыі Слугі Божага Яна Паўла ІІ пройдзе ў Ватыкане 1 мая 2011 года, у другую Вялікодную нядзелю - Нядзелю Божай Міласэрнасці.

Паводле Радыё Ватыкан

234 дэлегатаў з 84 краін удзельнічае ў працоўнай нарадзе па падрыхтоўцы Сусветных Дзён Моладзі. Сустрэча праходзіць у Сан Лорэнцо дэ Эль Эскор’яль. У ёй прымаюць удзел прадстаўнікі Папскай рады па справах свецкіх і яе старшыня кардынал Станіслаў Рылка.

Ватыканскі іерарх ужо сустрэўся з валанцёрамі, якім падзякаваў за іх шчырае супрацоўніцтва. Ён адзначыў, што для многіх, хто прыедзе ў сталіцу Іспаніі ў жніўні вельмі важнай будзе здольнасць валанцёраў паказаць гасціннасць і праявіць дух ахвярнасці. Заўважыў, што часта гэта будзе незаўважальная праца, але гэта не азначае, што менш істотная. Кардынал папрасіў, каб запрашаючы сваіх аднагодкаў казалі не столькі, што “павінны прыехаць”, колькі, што “варта прыехаць”.

Удзельнікі сённяшняй падрыхтоўчай нарады азнаёмяцца з арганізацыйнымі дэталямі, такімі як: размяшчэнне, абслуга, транспарт, візы і валанцёрства. Наведаюць таксама месцы, дзе будуць праходзіць асноўныя мерапрыемствы Сусветных Дзён Моладзі, якія адбудуцца 16-21 жніўня гэтага года.

Паводле Радыё Ватыкана

9 студзеня ў касьцёле Сьвятых Сымона і Алены (тэатральная заля) адбудзецца сьвяточны калядны канцэрт хора "Прасфара". Пачатак у 12:30. Уваход вольны.
Запрашаем!
Канцэрт адбудзецца пад патранатам Апостальскага Візататара БГКЦ архім. Сяргея Гаека і пробашча касьцёла Сьвятых Сымона і Алены айца Дэкана Уладыслава Завальнюка.

Сустрэча удзельнікаў Пілігрымкі даверу ў Мінску

6 студзеня 2011 г. у грэка-каталіцкім душпастырскім цэнтры Маці Божай Нястомнай Дапамогі адбылося спатканне мінскай міжпарафіяльнай групы (з рыма-каталіцкай парафіі св. Яна Хрысціцеля і з грэка-каталіцкай парафіі св. Міколы Цудатворцы), якая ўдзельнічала ў XXXIII Еўрапейскай сустрэчы моладзі (Тэзе) - “Пілігрымцы даверу”, што адбылася ў Ратэрдаме (Галяндыя) 28 снежня 2010 г. – 1 студзеня 2011 г. ( У сустрэчы ў Ратэрдаме ўдзельнічала каля 800 пілігрымаў з Беларусі).
Мінская міжпарафіяльная і міжканфесійная група ўключала ў сабе прадстаўнікоў не толькі католікаў двух абрадаў але і праваслаўнай і пратэстантаў.

Мінская сустрэча удзельнікаў Пілігрымкі даверу пачалася з урачыстай Літургіі, падчас якой моладзь прынесла Богу падзяку за падарожжа і за дары хрысціянскай еднасці, сведкамі якой яна сталася ў Ратэрдаме. Пасля Літургіі пілігрымы сустрэліся за гарбатай, каб падсумаваць практычныя вынікі пілігрымкі ў Ратэрдам.

5 студзеня 2011 г., з нагоды святаў Раства Хрыстовага і Новага Году ў Віцебску адбыўся вечар для непоўнаспраўных асобаў і іх бацькоў. Быў ён арганізаваны дабрачыннай каталіцкай арганізацыяй “Карытас”, сумесна з валанцёрамі руху св. Мікалая, і сабраў каля 30 удзельнікаў.

Усе прысутныя валанцёры дапамаглі арганізаваць гульні, песні і танцы, каб дзеці адчулі радасць, цеплыню і значнасць вялікага хрысціянскага свята, а таксама ўпэўніліся ў бязмежнай Божай любові.

Не менш важным для людзей з абмежаванымі магчымасцямі было, таксама, знаёмства і нарэшце пошук новых сяброў, што не бачаць у цябе фізічных заганаў, а ўспрымаюць такім, які ты ёсць.

1. У Святы Вечар перад Багаз’яўленнем вернікі мінскіх грэка-каталіцкіх парафій сабраліся на Вячэрню і Літургію св. Васіля Вялікага ў капліцы Душпастырскага цэнтра св. Язэпа па вул. Арджанікідзе 6.

Службу ўзначаліў Архімандрыт Сяргей (Гаек) у саслужэнні протапрасвітара Яўгена Усошына і а. Андрэя Абламейкі, душпастыра беларускіх грэка-католікаў у Вене і Празе. Спевам кіраваў а. Алесь Аудзеюк.

Пасля Літургіі адбыўся абрад Вялікага асвячэння вады.

У сам дзень свята Богаз’яўлення – Хрышчэння Гасподняга 6 студзеня ў 18:30 Літургію св. Яна Залатавуснага у капліцы цэнтра св. Язэпа адслужыў а. Алесь Аўдзеюк.

6 студзеня беларускія грэка-католікі узгадваюць мучаніцкую смерць экзарха Антона Неманцэвіча, замучанага ў мінскай турме СД 6 студзеня 1943 года.

Гэты вялікі падзвіжнік святой веры і З’яднання нёс сваё служэнне экзарха ва Ўсходняй Місіі айцоў езуітаў у Альбярціне (Слонім), недалёка ад Жыровічаў.

Экзарх Антон Неманцэвіч быў замучаны ў мінскай турме СД і быў пахаваны 9 студзеня 1943 г. на нямецкіх могілках у Мінску.

Зямля з месца ягонага пахавання захоўваецца каля так званага “дрэва вясны” у двары Душпастырскага цэнтра Святога Язэпа.

У Белдзяржфілармоніі 28 снежня адбылася прэзентацыя дакументальнага фільма «Як па сухому. Штрыхі ды партрэта Рыгора Барадуліна», прысвечанага 75-годдзю народнага паэта Беларусі.

Арганізатарам акцыі выступілі Міністэрства культуры і мінскі касцёл Святых Сымона і Алены (Чырвоны касцёл).

59-хвілінны каляровы фільм створаны на кінастудыі рымска-каталіцкай парафіі Святых Сымона і Алены рэжысёрам Аляксандрам Матафонавым і прадзюсарам, ксяндзом-пробашчам Чырвонага касцёла Уладзіславам Завальнюком.

28 снежня 2010 г. у Ратэрдаме (Нідэрланды) пачалася XXXIII Еўрапейская сустрэча моладзі – “Пілігрымка даверу”.

Па запрашэнні экуменічнай супольнасці з Тэзэ там сабалася каля 30 тысяч маладых жыхароў з усёй Еўропы, у тым ліку 500 пілігрымаў з Беларусі. Сярод розных групаў пілігрымаў з Беларусі у сустрэчы удзельнічае міжпарафіяльная група з Мінска, з рыма-каталіцкай Парафіі св. Яна Хрысціцеля і з грэка-каталіцкай Парафіі св. Міколы Цудатворцы.
За ўсіх беларускіх удзельнікаў “Пілігрымкі даверу” маліліся вернікі мінскай грэка-каталіцкай парафіі Святога Духа ў рамках Боскай Літургіі, якую 28 снежня 2010 г. у ніжнай капліцы чырвонага касцёла адслужыў а. Пахом (Кавалёў)