У нядзелю, 14 ліпеня 2013 г. у Полацку, на завяршэнне Пілігрымкі "Віцебск - Полацк", беларускія грэка-католікі адзначылі 1025-годдзе Хросту св. князя Ўладзіміра.

На Боскай Літургіі, якую ўзначаліў Апостальскі візітатар Беларускай Грэка-Каталіцкай Царквы Архімандрыт Сяргей (Гаек), узгадана пачаткі хрысціянства на Беларускіх землях, асабліва ў Полацкім княстве, і значэнне Хросту вялікага князя Кіеўскага Ўладзіміра Святаслававіча ў 988 г. для пашырэння хрысціянства на землях усходніх славянаў.

У юбілейны перыяд 1025-годдзя Хросту св. княза Ўладзіміра дзень ягонага літургічнага ўспаміну атрымлівае асаблівы характар.

У Мінску Літургія ўспаміну св. Уладзіміра Вялікага будзе адслужаная ў аўторак, 16 ліпеня, у 18:30 у ніжнім храме Чырвонага касцёла (грэка-каталіцкая капліца).

У суботу, 13 ліпеня 2013 г. – у дзень памяці мучанцкай смерці блаславёнай Мар’яны Бярнацкай гарадзенскія католікі двух абрадаў маліліся на Навумавіцкіх фартах.

Каля вёскі Навумавічы, што ў 10 кіламетрах ад Гародні, на старых фартах у часы ІІ Сусветнай вайны нямецкія нацысты праводзілі расстрэлы мірных жыхароў горада і ваколіц, сярод іх былі каталіцкія святары, манахі і манахіні ды простыя вернікі. Падчас расстрэлаў 20 кастрычніка 1942 году, 13 і 15 ліпеня 1943 году каля Навумавічаў былі растраляныя каля дзвюх соцен чалавек (на сённяшні дзень удалося адшукаць 150 імёнаў).

Дзень 13 ліпеня стаў для гарадзенскіх католікаў днём малітоўнага ўспаміну тых, хто загінуў каля Навумавічаў. У гэты дзень у 1943 годзе была растраляная Мар’яна Бярнацкая, простая жанчына з Ліпска, з сям’і ўніятаў, гвалтам пераведзеных у праваслаўе.

Грэка-каталіцкая пешая пілігрымка з Віцебска да Полацка стала за 19 гадоў добрай школай любові да Бога, Царквы і Бацькаўшчыны.

У духу міжканфесійнага дыялогу пілігрымы, сярод якіх ёсць грэка-католікі, рыма-католікі і праваслаўныя, моляцца за жыхароў усіх мясцінаў, якія сустракаюцца на шляху пілігрымкі.

19 гадоў таму, на гэтым шляху пілігрымкі паміж Віцебскам і Полацкам, не было ніводнага хрысціянскага храму. Сёння пілігрымы сустракаюць на сваім шляху храмы і праваслаўныя і рыма-каліцкія, але на жаль на гэтым шляху ня ма ніводнага грэка-каталіцкага храму.
Толькі ў Струнні, на месцы збуранай рэзідэнцыі ўніяцкіх мітрапалітаў, стаіць крыж — месца малітоўнай задумы.

Дэвіз XIX грэка-каталіцкай пілігрымкі "Веру, Госпадзе, і вызнаю…" дапамагае яе ўдзельнікам паглыбіць духа хрысціянскага братэрства і салідарнасці з пілігрымамі, якія ў той жа самы час ідуць у санктуарыі у Тракелях і Гудагаях, дзе ўшанаванне Іконаў Багародзіцы пройдзе ў бліжэйшую суботу 13 ліпеня 2013.
У гэтых урачыстасцях прымуць удзел некаторыя грэка-каталіцкія святары і вернікі, якія прайшлі пэўны шлях у Пілігрымцы Віцебск - Полацк.

Адначасова успамін 1150 гадоў славянскай Місіі святых Кірыла і Мятода і 1025 гадоў Хросту Кіеўскай Русі глыбока яднае вернікаў Беларускай Грэка-Каталіцкай Царквы з усімі спадкаемцамі тых вялікіх духоўных падзеяў.

Праграма XIX грэка-каталіцкай пілігрымкі прадбачае разважанні над гісторыяй Уніяцкай Царквы на Беларусі.

Адной з вялікіх постацяў, з духоўнай спадчынай якой знаёмяцца вернікі, з'яўляецца ўніяцкі мітрапаліт Іпаці Пацей, які спачыў 400 год таму - 18 ліпеня (8 ліпеня за старым стылем) 1613 г.

“Веру, Госпадзе, і вызнаю…” – гэта дэвіз пілігрымкі, якая праходзіць у Год Веры.

Пілігрымка пачалася ў сераду раніцай, 10 ліпеня, Малебнам у грэка-каталіцкім храме ў Віцебску.
У гэты дзень мэтай пілігрымкі ёсць Шуміліна, дзе ў рыма-каталіцкім храме Маці Божай Фацімскай будзе адслужаная Боская Літургія як падзяка Богу за дар веры Беларускага народу.

Далей пілігрымы пройдуць праз Обаль (чацвер), Гараны (пятніца), Струнне да Полацка (субота) і будуць разважаць пра подзвіг веры вялікіх сведкаў Хрыста: святых Кірыла і Мятода, ісландскага місіянера Полацка - Торвальда Вандроўніка, святых Уладзіміра і Вольгі, святамучаніка Язафата, Пяці полацкіх пакутнікаў ды іншых святых Беларускага народу.

Айцы Рэдэмптарысты запрашаюць

Запрашаем прыняць удзел у Хрысціянскім Фестывалі моладзі, які арганізуе Ордэн Найсвяцейшага Адкупіцеля (айцы рэдэмптарысты) у днях 7-12 жніўня 2013 г. на востраве Сардынія ў Італіі (недалёка ад г. Кальяры).

Тэма Фестывалю: "Будзь жыццём, вер, будзь любоўю",
Галоўныя тэмы на кожны з чатырох асноўных дзён Фестывалю:
І дзень - Жыцце, ІІ дзень - Вера, ІІІ дзень - Супольнасць, IV дзень - Місія.

“Lumen Fidei” – святло веры – гэта назва першай энцыкліцы папы Францішка. Яна ўбачыла свет 5 ліпеня 2013 г. Адрасаваны біскупам, святарам, дыяканам, законнікам і ўсіх свецкім, дакумент, - тлумачыць папа Францішак – “амаль поўнасцю” быў напісаны Бэнэдыктам XVI. У першапачатковы “праект” цяперашні Пантыфік зрабіў “некаторы ўнёсак”. Мэтай энцыклікі з’яўляецца аднаўленне веры, як святла, здольнага асвятляць усё чалавечае існаванне. Той, хто верыць, ніколі не самотны, таму што вера з’яўляецца агульным дабром, якое дапамагае будаваць грамадства, даючы надзею. І гэта сэрца таго, што хрысціянская традыцыя называе святлом веры – “Lumen Fidei”. У сучасную эпоху, як піша Папа, калі верыць, адзначае шукаць, а вера разглядаецца як пагроза для свабоды чалавека, важна давяраць і спадзявацца, пакорна і з мужнасцю, міласэрнай любові Бога, якая выпраўляе скажэнні нашай гісторыі.

У аўторак, 2 ліпеня, спаўняецца год ад смерці Сержука Вітушкі -- грамадскага дзеяча, пісьменніка, першага кіраўніка легендарнай «Талакі», які быў адным з заснавальнікаў першай адноўленай грэка-каталіцкай парафіі ў Мінску.

Паніхіда за слугу Божага Сяргея адбудзецца ў грэка-каталіцкім Цэнтры святога Язэпа (вул. Арджанікідзэ, 6) у аўторак, 2 ліпеня, а 12-ай гадзіне.

Вечная памяць!