Дзень духовай адновы для матушак

У суботу, 12 сакавіка 2016 г., у Душпастарскім цэнтры грэка-каталіцкай парафіі Маці Божай Нястомнай Дапамогі ў Мінску, адбылася рэкалекцыйная сустрэча жонак святароў і дыяканаў БГКЦ.

Сустрэча пачалася з асабістай малітвы ў цішыні перад іконай Маці Божай Нястомнай Дапамогі, а таксама Акафіста да Маці Божай, які адслужыў айцец Яўген Маліноўскі з Барановічаў.

Боскую Літургію, ў саслужэнні айца Яўгена, адслужыў і сказаў казанне айцец Андрусь Абламейка з Івацэвічаў.

Асаблівым госцем на сустрэчы быў айцец Раман Факсінскі, дырэктар Душпастарскага цэнтра Канферэнцыі Каталіцкіх Біскупаў Беларусі, які сказаў рэкалекцыйную навуку, а таксама паспавядаў матушак.

Адышоў да Госпада Васіль Лазар - адзін з найстарэйшых грэка-католікаў Беларусі

У Слоніме, 9 сакавіка 2016 г., на 87 годзе жыцця, памёр святой памяці Васіль Лазар.

Дзяцька Васіль разам са сваёй жонкай Яўгеніяй ў часы савецкага бязбожжа і забароны Грэка-Каталіцкай Царквы аддана трымаліся сваёй грэка-каталіцкай веры. З верасня 1968 па 1986 год рэгулярна прымалі ў сваёй хаце ў Слоніме святароў, якія працягвалі служэнне ва ўмовах падполля. На працягу дзесяцігоддзяў апекаваліся магіламі грэка-каталіцкіх святароў і манахіняў пахаваных у Альбярціне. Маліліся за адраджэнне Беларускай Грэка-Каталіцкай Царквы. Яны змаглі выхаваць у веры сваіх дзяцей ды ўнукаў, перадалі ім любоў да Бога. Дачакаліся новага адраджэння Царквы.

У Касцёле ў Беларусі адзначае 105-годдзе з дня нараджэння айца Льва Гарошкі – славутага беларускага святара, культуролага, грамадскага дзеяча і журналіста, шматгадовага кіраўніка Беларускай секцыі Ватыканскага радыё. Яго літаратурная, публіцыстычная і тэалагічная спадчына да сённяшняга дня выклікае цікавасць шматлікіх даследчыкаў і простых вернікаў.

Айцец Гарошка нарадзіўся 11 лютага 1911 г.  у сялянскай сям’і ў Навагрудскім павеце. Пасля заканчэння беларускай гімназіі, паступіў у Львоўскую духоўную акадэмію, а затым працягнуў вывучэнне тэалогіі у аўстрыйскім Інсбруку. Пасля атрымання святарскага пасвячэння, працаваў у Пінскай дыяцэзіі, у якасці душпастыра і педагога.

Сын беларускіх сялян, дзякуючы якому Святы Пасад зразумеў і прызнаў Беларусь як асобную нацыю са сваімі патрэбамі і памкненнямі, — айцец Леў Гарошка.

Будучы прадстаўнік сапраўднай духоўнай і інтэлектуальнай эліты беларускага народа нарадзіўся 11 сакавіка (па новым стылі) 1911 года ў вёсцы Трашчычы пад Навагрудкам.

Бацькі аддалі здольнага хлопчыка ў Навагрудскую беларускую гімназію, многія навучэнцы якой сталі адданымі прыхільнікамі беларускай справы.

Прозвішча архімандрыта Льва Гарошкі вядомае ў колах БГКЦ у краіне і за мяжой. Не заўсёды, аднак, за гэтым стаяць таксама веды пра ягонае навучанне.

Прадстаўленне ўсіх зацікаўленасцяў а. Льва патрабавала б напісання асобнай кнігі. Можна ўсё ж зрабіць пэўную спробу зарысу галоўных тэмаў на падставе хаця б ягоных артыкулаў у часопісе “Божым Шляхам”.

Перад гэтым жа варта ўзгадаць асноўныя факты з жыцця святара, бо яны маюць свой уплыў на навучанне.

9 сакавіка ў эфіры тэлеканала «Беларусь 24» выйшла перадача, у якой прынялі ўдзел Старшыня Канферэнцыі Каталіцкіх Біскупаў у Беларусі Мітрапаліт Мінска-Магілёўскі арцыбіскуп Тадэвуш Кандрусевіч і Патрыяршы Экзарх усяе Беларусі Мітрапаліт Мінскі і Заслаўскі Павел.

Гэта была першая сустрэча Мітрапаліта Тадэвуша Кандрусевіча і Мітрапаліта Паўла ў неафіцыйнай абстаноўцы. 

Запіс тэлеэфіра дасяжны на афіцыйным youtube-канале «Беларусь 24». 

Парафія Маці Божай Нястомнай Дапамогі
Капліца душпаст. цэнтра, зав. Снежны д. 7

Рэкалекцыі праводзіць а. Васіль Ягораў (з Магілёва)

- СУБОТА, 12 сакавіка 2016.
гадз. 19:00 - Вячэрня, духоўная канферэнцыя, споведзь

- НЯДЗЕЛЯ, 13 сакавіка 2016.
гадз. 10:00 - Боская Літургія, духоўная канферэнцыя, споведзь

Для візіту Папы Рымскага ў Беларусь аднаго запрашэння беларускага прэзідэнта недастаткова. Яго неабходна ўзгадніць з патрыярхам Маскоўскім і ўсяе Русі Кірылам, заявіў у эфіры тэлеканала «Беларусь 24» Патрыяршы Экзарх усяе Беларусі, мітрапаліт Мінскі і Заслаўскі Павел.

Паводле яго слоў, запрашэння прэзідэнта будзе дастаткова, калі Пантыфік прыбудзе ў Мінск у якасці кіраўніка Ватыкана, а не прадстаяцеля Каталіцкай Царквы. «Паколькі Беларусь — гэта кананічная тэрыторыя Рускай праваслаўнай царквы», — падкрэсліў ён.

Каталіцкі мітрапаліт Мінска-Магілёўскі Тадэвуш Кандрусевіч, які таксама ўдзельнічаў у перадачы, прызнаў, што Ватыкан заўсёды прытрымліваецца правіла не наведваць краіны, дзе ёсць іншая Царква большасці, не атрымаўшы ад яе згоды. Пры гэтым ён выказаў надзею, што візіт Папы Рымскага ў Беларусь усё ж адбудзецца і, магчыма, супадзе з чарговай яго сустрэчай з Патрыярхам Маскоўскім.

Група вядомых праваслаўных хрысціян свету апублікавала 7 сакавіка 2016 г. заяву аб жахлівай праўдзе пра львоўскі псеўдасабор 1946 года, які дазволіў сталінскаму рэжыму ліквідаваць Украінскую Грэка-Каталіцкую Царкву.

“Руская Праваслаўная Царква ў сваёй паўнаце не можа лічыцца адказнай за рашэнні, прынятыя царкоўным свяшчэннаначаллем, што знаходзіліся пад ціскам тэрору і маніпулявання з боку НКВД-КГБ. Аднак, мы, праваслаўныя хрысціяне, адчуваем сябе адказнымі за злачыннае маўчанне вакол знішчэння гэтай Царквы савецкім рэжымам пры ўдзеле Маскоўскага Патрыярхата”, - напісалі праваслаўныя інтэлектуалы з Расіі, Украіны, Францыі, Галандыі і ЗША.

Зверхнік Украінскай Грэка-Каталіцкай Царквы арцыбіскуп Святаслаў (Шаўчук), распавядаючы аб выніках візіта ў Рым і сустрэчы з Папам Францішкам, 5 сакавіка запэўніў вернікаў і духавенства сваёй Царквы: “Папа нас пачуў».

Мэтай сустрэчы з пантыфікам было абмеркаванне спрэчных параграфаў падпісанай 12 лютага на Кубе Папам Францішкам і Патрыярхам Маскоўскім і ўсяе Русі Кірылам Дэкларацыі, у якіх, на думку часткі ўкраінцаў, непразрыста гаворыцца аб статусе УГКЦ і намерах адносна яе Рускай Праваслаўнай Царквы Маскоўскага Патрыярхата, а таксама аб сутнасці ваеннага канфлікта на ўсходзе Украіны.