Апублікавана пасланне Папы на Сусветны дзень міру

18 снежня было апублікавана пасланне Папы Льва ХІV на 59-ы Сусветны дзень міру. У ім Папа, першымі словамі якога пасля абрання Біскупам Рыма, было прывітанне Уваскрослага «Спакой вам», разважае пра мір як адсутнасць вайны, апелюючы да больш шырокай евангельскай катэгорыі спакою.

Спакой — гэта дар Уваскрослага

 Спакой, які паходзіць ад Езуса, з’яўляецца непрамінальным, ён «здзяйсняе канчатковую перамену ў тых, хто яго прымае, а тым самым ва ўсёй рэчаіснасці». Евангельскі спакой пераўзыходзіць паняцце адсутнасці вайны, бо гэта стан свядомасці.

«Спакой існуе, хоча ў нас прабываць, мае лагодную моц асвячэння і пашырэння кругагляду, супраціўляецца гвалту і перамагае яго. Спакой мае подых вечнасці: у час, калі ў бок зла крычаць «хопіць», спакою шэпчуць «назаўсёды». У гэтую перспектыву ўвёў нас Уваскрослы»,

— заўважыў Святы Айцец.

 

Папа нагадаў, што святы Аўгустын раіў тым, хто дбае пра спакой у свеце, мець яго перадусім у сабе.

 

Сапраўдны спакой — няўзброены

 

 Наступнік святога Пятра прыводзіць словы Хрыста да вучня, які хацеў Яго бараніць: «Схавай меч у ножны» (Ян 18, 11; пар. Мц 26,52). Мірны адказ Езуса бянтэжыў і тады, і зараз.

«Калі мір не з’яўляецца зведанай рэчаіснасцю, якую трэба абараняць і культываваць, то ў сямейным і публічным жыцці распаўсюджваецца агрэсія. У адносінах паміж грамадзянамі і кіраўнікамі здараецца сітуацыя, у якой віной прызнаецца факт, што не ідзе падрыхтоўка да вайны, да рэагавання на атакі, да адказу на гвалт. Істотна парушаючы прынцып правамернай абароны, у палітычнай плоскасці такая логіка з’яўляецца найбольш актуальным фактарам у глабальнай дэстабілізацыі, якая з кожным днём набывае ўсё большы драматызм і непрадказальнасць»,

— адзначыў Папа.

 

Святы Айцец выказвае занепакоенасць, з аднаго боку, тэндэнцыяй росту песімістычных наратываў, пазбаўленых надзеі на трывалы мір, а з другога боку, павелічэннем выдаткаў на ўзбраенні, зменай адукацыйнай палітыкі ў бок трансляцыі выключна ўзброенай канцэпцыі абароны і бяспекі.

 

Што рабіць прыхільніку міру ў такой няпэўнасці? Папа Леў XIV, спасылаючыся на святога Аўгустына, кажа, што «сапраўдны прыхільнік міру любіць ворагаў міру» і раіць, як і айцы Другога Ватыканскага Сабору, дыялог як найбольш эфектыўны сродак вырашэння канфліктаў.

 

Раззбраенне — галоўная мэта

 

  Папа перасцерагае чалавецтва ад узмацнення спакусы пераўтварэння ў зброю нават думак і слоў.

 «На жаль, усё часцей у сучасным свеце словы веры выкарыстоўваюцца для палітычнай барацьбы, благаслаўлення нацыяналізму, апраўдання гвалту і ўзброенай барацьбы»,

— з горыччу канстатуе Святы Айцец.

 

«Веруючыя людзі павінны актыўна, перадусім сваім жыццём, абвяргаць гэтыя формы блюзнерства, якія кідаюць цень на Святое Імя Бога. Таму таксама, акрамя дзеянняў, больш чым калі-небудзь неабходна культываванне малітвы, духоўнасці, экуменічнага і міжрэлігійнага дыялогу як спосабаў дасягнення міру і моў для сустрэч паміж традыцыямі і культурамі», — заклікае Папа.

 

У палітычным і грамадскім плане Наступнік святога Пятра бачыць раззбройваючы патэнцыял у шляху дыпламатыі, медыяцыі, міжнароднага права і ў развіцці свядомых грамадзянскіх  супольнасцяў.

«Няхай гэта будзе плёнам Юбілею Надзеі, які натхніў мільёны людзей нанова адкрыць сябе як пілігрымаў і распачаць у сабе гэтае раззбраенне сэрца, розуму і жыцця»,

— пажадаў у канцы паслання Святы Айцец.

 

ПОЎНЫ ТЭКСТ ПАСЛАННЯ

 

Паводле Catholic.by