У СВЯТЛЕ БОЖАЙ МІЛАСЭРНАСЦІ 2021

У нядзелю 11 красавіка 2021 – у Нядзелю Тамаша адзначалася ў Паўсюднай Царкве свята Божай Міласэрнасці. 

Грэка-каталіцкая парафія ў Маладзечне традыцыйна святкавала парафіяльнае свята Хрыста Чалавекалюбца. 

У парафіяльным храме на вул. Віленскай Боскую Літургію ў 17:00 адслужыў ды прамовіў казанне а. Зміцер Чарнель, рэдэмптарыст. З ім саслужыў а. Аляксей Філіпенка, які рэгулярна нясе душпастырскае служэнне ў Маладзечне.

У сітуацыі пандэміі колькасць удзельнікаў свята была абмежаваная і не адбылася традыцыйная пілігрымка вернікаў Цэнтральнага грэка-каталіцкага дэканата.

Таму шлях святкавання Нядзелі Божай Міласэрнасці ўва Цэнтральным дэканаце меў некалькі этапаў. 

У суботу ўвечары 10 красавіка у мінскай грэка-каталіцкай парафіі Праведнага Яўэпа а. Зміцер правёў у Мінску духовую сустрэчу на тэму “Правакацыя Божай Міласэрнасці”.

Раніцай у нядзелю 11 красавіка а. Зміцер узначаліў Боскую Літургію і прамовіў казанне ў мінскай грэка-каталіцкай парафіі Святога Духа (у ніжнім храме касцёла свв. Сымона і Алены).

Вернікі з розных мясцінаў Беларусі, якія не маглі фізічна ўдзельнічаць у свяце Хрыста Чалавекалюбца ў Маладзечне, стварылі духовую Платформу Міласэрнасці і малітвай абнялі ўсю Беларусь.

Гэта малітва працягвалася і на працягу наступных дзён. Хрысту Чалавекалюбцу былі прынесеныя малітвы:

-за Богам сцеражоную краіну нашу Беларусь, 

-за хрысціянскія Цэрквы ў Беларусі ды іхняе служэнне беларускаму грамадству,

-за рыма-каталіцкія дыяцэзіі, якія адзначаюць 30 год стварэння,

-за праваслаўнага архібіскупа гродзенскага Арцемія,

-за вернікаў Царквы “Новае жыццё”, што засталіся бяз храму,

-за церпячых, асуджаных, зняволеных і за іхнія сем’і,

-за хворых, асабліва ў выніку пандэміі,

-за лекараў, медпрацоўнікаў.

Духовая сетка малітвы адкрытая да таго, каб да яе далучыцца.

Грэка-каталіцкія вернікі традыцыйна ў гэты пэрыяд моляцца Хрысту Чалавекалюбцу словамі Акафісту Імю Ісусаваму (аўтарства Францішка Скарыны).