Святы Айцец падзяляе жалобу Апостальскага Нунцыя

Святы Айцец Францішак наступнаю тэлеграмаю, падпісанаю Дзяржаўным Сакратаром Яго Святасці кардыналам Тарчызіё Бэртонэ, далучыўся да жалобы Яго Эксцэленцыі арцыбіскупа Клаўдыё Гуджэроцці ў сувязі з адыходам у вечнасць яго маці.

«Даведаўшыся пра адыход у вечнасць Вашай дарагой матулі спадарыні Ілкі Джаванны, Святы Айцец жадае даслаць Вам выразы свайго глыбокага спачування, запэўніваючы ў сваёй духоўнай блізкасці, а таксама ўзносячы да Пана гарачыя малітвы аб вечным супакоі для дарагой спачылай, і просіць для Вашай Эксцэленцыі і Вашых родных падтрымкі ў хрысціянскай надзеі і дасылае з вераю ва ўваскрашэнне ў Хрысце як падтрымку сваё Апостальскае благаслаўленне.

Я асабіста таксама далучаюся да жалобы і запэўніваю ў малітоўнай памяці ў эўхарыстычнай цэлебрацыі.

Кардынал Тарчызіё Бэртонэ,
Дзяржаўны Сакратар Яго Святасці».

Пахавальную святую Імшу, якая адбудзецца ў 14.30 (паводле сярэднееўрапейскага часу) у аўторак 2 красавіка ў Вероне (Італія) у парафіяльным касцёле Святога Духа, узначаліць Апостальскі Нунцый у Беларусі арцыбіскуп Клаўдыё Гуджэроцці.

Маці прадстаўніка Святога Айца адышла ў вечнасць 29 cакавіка, у Вялікую пятніцу, у Вероне.