У Ярданіі кіраўнікі мясцовых Касцёлаў супольна з каралём Абдалой ІІ далі старт «Ініцыятыве 2030», прысвечанай святкаванню 2000-годдзя Хросту Езуса Хрыста ў рацэ Ярдан.

Як паведамляе арабскамоўны хрысціянскі партал Abouna, урачыстыя мерапрыемствы пройдуць у 2030 годзе. Падчас сустрэчы Лацінскі Патрыярх Ерузалема кардынал П’ербатыста Піцабала заклікаў да духоўнага абнаўлення і глыбокага пераасэнсавання значэння сакрамэнту хросту.

Іерарх падкрэсліў, што месца Хросту Езуса (Аль-Махтас) на ярданскім беразе павінна заставацца жывым цэнтрам, дзе вернікі з усяго свету могуць сустрэць Бога.

Кароль Абдала ІІ заявіў, што ў межах падрыхтоўкі да юбілею асноўная ўвага будзе звернутая на паляпшэнне інфраструктуры і якасці паслуг для пілігрымаў.

Гэты праект закліканы падкрэсліць ролю Хашэміцкага Каралеўства як прыкладу міжрэлігійнай згоды і ўмеранасці на Блізкім Усходзе.

Важнай часткай ініцыятывы стала адкрыццё міжнароднага праваслаўнага ўніверсітэта непасрэдна на месцы біблійных падзей. Гэтая першая акадэмічная ўстанова ў Аль-Махтасе, заснаваная Грэка-Праваслаўным Патрыярхатам Ерузалема, пачне прыём студэнтаў ужо ў верасні 2026 года. Навучальная ўстанова забяспечыць пражыванне для першых сарака чалавек, а таксама прапануе завочную форму навучання.

Паводле слоў Патрыярха Феафіла ІІІ, мэта новага праекта — прыцягнуць моладзь з Ярданіі, краін Блізкага Усходу і ўсяго свету. Гэта будзе сучасны міждысцыплінарны ўніверсітэт з акцэнтам на гуманітарныя навукі, адкрыты як для мужчын, так і для жанчын.

Акрамя адукацыйнай функцыі, вышэйшая школа стане пляцоўкай для развіцця хрысціянска-мусульманскага дыялогу і культурнага абмену паміж Усходам і Захадам.

Аляксандр Амяльчэня / Vatican News BY, Catholic.by