Восеньскі малітоўны ўспамін памерлых

Як вядома, у Беларусі існуе звычай узгадваць памерлых на пачатку лістапада (акрамя пасьля-пасхальнай Раданіцы ўвесну).

У грэка-каталіцкіх парафіях і супольнасьцях працягваецца восеньскі малітоўны ўспамін памерлых.

У візантыйскай літургічнай традыцыі бацькоўская Дзьмітрыеўская (зьмітраўская) субота прыпадае ў суботу перад днём памяці сьв. Вялікамучаніка Дзьмітрыя Салунскага (у гэтым годзе гэта 24 кастрычніка паводле грыгарыянскага каляндара і 7 лістапада паводле юліянскага каляндара).

У рыма-каталіцкім Касьцёле днём асаблівай малітвы зьяўляецца 2 лістапада – Успамін усіх памерлых вернікаў (Дзень задушны).

Адрадзілася таксама старажытная беларуская традыцыя ўспаміну продкаў на “Дзяды” – 2 лістапада, калі могілкі наведваюць рыма-католікі, грэка-католікі, праваслаўныя, а таксама, тыя, хто не наведвае храм.

* * *

Малітва на Маскоўскіх могілках на магіле а. Яна МатусевічаУ суботу, 24 кастрычніка 2009 г., Апостальскі Візітатар БГКЦ Архімандрыт Сяргей (Гаек) наведаў г. Гомель, дзе разам з а. Васілём Ягоравым і вернікамі гомельскай грэка-каталіцкай парафіі маліўся за памерлых .

Гэта быў таксама дзень асаблівага ўспаміну памерлых у грэка-каталіцкіх парафіях г. Віцебска.

У суботу, 31 кастрычніка 2009 г., (у г. зв. “дзядоўскую” суботу) вернікі Полацкай грэка-каталіцкай парафіі сьвятамучаніка Язафата маліліся ля крыжа ў м. Струньне (каля Полацку), на месцы рэзыдэнцыі і пахаваньня ўніяцкіх мітрапалітаў. Паніхіду ўзначаліў віцэ-дэкан а. Аляксандр Шаўцоў.

У тую ж “дзядоўскую”суботу 31 кастрычніка 2009 г. Боскую Літургію за ўсіх памерлых вернікаў адслужыў у капліцы нашага парафіяльнага цэнтра сьв. Язэпа Архімандрыт Сяргей.
Гэта быў таксама дзень успаміну 65-х угодкаў сьмерці Львоўскага грэка-каталіцкага Мітрапаліта Андрэя (+1 лістапада 1944 г.)

У нядзелю, 1 лістапада 2009 г., паніхіду за ўсіх памерлых вернікаў ды за ўсіх ахвяраў войнаў і перасьледу адслужыў на Кальварыйскіх могілках Архімандрыт Сяргей.
У той жа дзень на Маскоўскіх могілках маліўся а. Пахом Кавалёў.

На могілках у Альбярціне (частка Слоніма), сядзібе Усходняй Місіі Айцоў Езуітаў і месцы служэньня грэка-каталіцкага экзарха-пакутніка Антона Неманцэвіча (+1943), маліліся вернікі грэка-каталіцкіх парафіяў Слоніма, Альбярціна, Івацэвічаў, Бярозы. Паніхіду служыў а. Алесь Аўдзяюк.

У панядзелак, 2 лістапада 2009 г., у 17:30 будзе адслужана паніхіда на магіле протапрэзьбітара Яна Матусевіча на Кальварыйскіх могілках.
Пасьля паніхіды заўпакойная Боская Літургія будзе адслужаная ў капліцы душпастырскага цэнтра Парафіі Маці Божай Нястомнай Дапамогі па зав. Сьнежным, д. 7.

У нядзелю, 8 лістапада, малітоўны ўспамін уніяцкіх мітрапалітаў адбудзецца ў грэка-каталіцкай парафіі сьв. Міколы Цудатворцы ў рамках Боскай Літургіі а 15:00 гадз., у касьцёле айцоў-Салезіянаў па вул. Пляханава ў Менску.

* * *

У блаславёным сьне іх
дай, Госпадзе, знайсьці вечны супакой
душам памерлых слугаў Тваіх
і ўчыні ім вечную памяць.

Вечная памяць, вечная памяць, вечная памяць!