Парафія сьвятога Язэпа > Навіны > 27 кастрычніка 2026 — дзень малітвы аб міры

27 кастрычніка 2026 — дзень малітвы аб міры


26.10.2026.

27 кастрычніка 2026 — дзень малітвы аб мірыБеларускія католікі двух абрадаў далучаюцца да малітвы Папы Льва XIV. 

 

Канферэнцыя Каталіцкіх Біскупаў Беларусі заклікае вернікаў далучыцца да малітвы аб міры ва ўсім свеце. У Мінску і Магілёве ў гэты дзень адбудуцца святыя Імшы ў інтэнцыі міру.


27 кастрычніка 2026 года Каталіцкі Касцёл у Беларусі далучыцца да малітоўнай ініцыятывы Папы Льва XIV, прысвечанай малітве аб міры ва ўсім свеце.

 

Падчас 98-га пленарнага паседжання Канферэнцыі Каталіцкіх Біскупаў Беларусі было прынята рашэнне аб малітоўнай еднасці з Наступнікам святога Пятра. У сувязі з гэтым беларускія біскупы выдалі спецыяльны камунікат, у якім вызначылі спосабы ўдзелу мясцовага Касцёла ў гэтай ініцыятыве.

 

Згодна з камунікатам, 27 кастрычніка ва ўсіх парафіях Беларусі будзе цэлебравацца святая Імша з фармуляру «За захаванне супакою і справядлівасці». У катэдральных касцёлах Эўхарыстыю ў інтэнцыі міру ўзначаляць біскупы.

 

Вернікі таксама запрашаюцца да супольнай малітвы на Ружанцы, якую яны ахвяруюць у інтэнцыі міру разам са сваімі душпастырамі. Акцыя «Мільён дзяцей моляцца на Ружанцы» сёлета таксама была прысвечана малітве дзяцей аб міры.

 

У аўторак, 27 кастрычніка, у 18.30 у архікатэдральным касцёле Імя Найсвяцейшай Панны Марыі ў Мінску святую Імшу ў інтэнцыі міру ўзначаліць біскуп Юрый Касабуцкі.

 

У гэты ж дзень у магілёўскай конкатэдры Унебаўзяцця Найсвяцейшай Панны Марыі святую Імшу ў інтэнцыі міру ў 18.30 ўзначаліць біскуп Аляксандр Яшэўскі SDB.

 

Усіх вернікаў запрашаюць прыняць удзел у Эўхарыстычнай цэлебрацыі і далучыцца да супольнай малітвы аб міры, паяднанні і спыненні войнаў.

 

Канферэнцыя Каталіцкіх Біскупаў Беларусі заклікае святароў, кансэкраваных асобаў і ўсіх вернікаў актыўна далучыцца да гэтай малітоўнай ініцыятывы, каб разам з Папам Львом XIV і ўсім паўсюдным Касцёлам выпрошваць у Пана дар сапраўднага і трывалага міру.

 

У час, калі многія людзі пакутуюць ад наступстваў узброеных канфліктаў, малітва становіцца выразам хрысціянскай салідарнасці і надзеі. Яна нагадвае пра неабходнасць навяртання сэрцаў, узаемнай павагі і адказнасці за будаванне міру.

 

Няхай 27 кастрычніка стане днём асаблівай малітоўнай еднасці, калі вернікі Беларусі разам з паўсюдным Касцёлам будуць прасіць Бога аб міры для ўсіх народаў і краін.

 

✠ Біскуп Аляксандр Яшэўскі SDB
Старшыня Камісіі Божага Культу і Дысцыпліны Сакрамэнтаў
Канферэнцыі Каталіцкіх Біскупаў Беларусі

 

Паводле Catholic.by


Вярнуцца назад