Будслаў 2026: Праграма парафіяльнай урачыстасці і Будслаўскага фэсту (+плакат)

Плануецца, што сёлетні Будслаўскі фэст у Нацыянальным марыйным санктуарыі распачнецца на наступны дзень пасля традыцыйнай парафіяльнай урачыстасці. Такім чынам, урачыстасці ў гонар Маці Божай Будслаўскай пройдуць з 2 па 4 ліпеня пад дэвізам: «Богу хвала — Марыі давер — Касцёлу вернасць».

У гэтым годзе адзначаецца 35-годдзе аднаўлення структур Каталіцкага Касцёла ў Беларусі. Таму галоўным дэвізам на ўрачыстасці ў Будславе былі абраныя словы: «Богу хвала — Марыі давер — Касцёлу вернасць», якія з'яўляюцца адлюстраваннем мэты сёлетняга святкавання: годна праславіць Бога, дзякуючы Яму за дар адраджэння Касцёла, аддаць пад асаблівую апеку Маці Божай сябе і сваіх блізкіх і выразіць гатоўнасць трываць у веры і супольнасці Касцёла да канца жыцця.

 

Таксама ў аб'яўленым у Касцёле Годзе святога Францішка праграма ўключае ў сябе разважанні і малітвы праз заступніцтва гэтага святога.

 

Падчас урачыстасцяў у Нацыянальным санктуарыі ў Будславе адбудзецца прысвячэнне Мінска-Магілёўскай мітраполіі, гэта значыць Касцёла ў Беларусі, Найдаражэйшай Крыві Хрыста.

Да гэтай падзеі вернікі рыхтаваліся праз 9 дзён Агульнабеларускай навэнны «Найдаражэйшая Кроў Хрыста, умацуй нас!».

 

Праграма фэсту

 

2 ліпеня (чацвер) — парафіяльная ўрачыстасць

• 12.00 — святая Імша з удзелам Мінскага катэдральнага капітула,
• 18.00 — святая Імша.

3 ліпеня (пятніца)

• 14.00-17.00 — сустрэча і прывітанне пілігрымаў,
• 18.00 — святая Імша з удзелам пілігрымаў,
• 20.00 — Акафіст у выкананні хору Грэка-каталіцкай Царквы,
• 20.30 — Марыйныя нешпары,
• 21.00 — Крыжовы шлях,
• 22.00 — Моладзевая праграма: «Моладзь да моладзі са святым Францішкам Асізскім»,
• 23.30 — Працэсія з копіяй абраза Маці Божай Будслаўскай.

4 ліпеня (субота)

• 0.00 — святая Імша,
• 2.00 — адарацыя Найсвяцейшага Сакрамэнту,
• 6.00 — Боская літургія Грэка-каталіцкай Царквы пры галоўным алтары святыні,
• 7.00 — Гадзінкі аб Беззаганным Зачацці Найсвяцейшай Панны Марыі,
• 8.00 — святая Імша ў базыліцы,
• 9.00 — Фацімскі ружанец,
• 9.45 — Прэзентацыя першага агульнабеларускага афіцыйнага каталіцкага спеўніка «Божа, мы Цябе ўслаўляем» — дар Касцёлу да 35-годдзя аднаўлення яго структур,
• 10.30 — аднаўленне сужэнскіх абяцанняў з нагоды 35-годдзя шлюбу (1991 год),
• 11.30 — святая Імша,
• Акт прысвячэння Найдаражэйшай Крыві Пана нашага Езуса Хрыста Мінска-Магілёўскай мітраполіі,
• Эўхарыстычная працэсія.

 

На працягу ўсяго фэсту будзе магчымасць ушанавання вернікамі цудадзейнага абраза Маці Божай Будслаўскай і малітвы перад ім.

 

• Плакат урачыстасцей у Будславе з праграмай святкавання для спампоўвання ў фармаце .JPG>>> і .PDF>>>

Паводле Catholic.by