Ікона Жыровіцкай Багародзіцы перададзена ў дар візантыйска-каталіцкай царкве святога Яна Залатавуснага ў Бары

У нядзелю, 14 чэрвеня 2026 года, у горадзе Бары (ў Італіі), пасля Боскай Літургіі ў візантыйскім каталіцкім храме св. Яна Залатавуснага (што належыць італа-албанскай епархіі Лунгра) архімандрыт Сяргей (Гаек) ахвяраваў для таго ж храму Ікону Жыровіцкай Багародзіцы. Гэта ікона напісана на мармуры ў Мінску, паводле спіска, які шануецца ў Слоніме.

 

(Слонімская копія была падрыхтавана для каранацыі Абраза папскімі каронамі, што адбылося ў Жыровіцкім манастыры 19 верасня 1730 года).

Залатыя кароны былі асвячаныя ў 1726 годзе (300 гадоў таму) Папам Бенедыктам XIII, які нарадзіўся ў горадзе Гравіна, недалёка ад Бары.

 

Перадача Іконы ў дар стала духоўным прыпынкам на «шляху міласэрнасці», распачатым на Сусветным апостальскім кангрэсе міласэрнасці ў Вільні.

Перад Боскай Літургіяй мела месца кароткая міжхрысціянская малітва ў базіліцы св. Мікалая, каля алтара з яго мошчамі. Затым Літургію ў храме св. Яна Залатавуснага ўзначаліў архімандрыт Сяргей у саслужэнні мясцовага прэзбітара Антонія Калізі.

 

Боская Літургія прайшла ў духу падзякі Богу за хрысціян Апуліі (з гарадоў Бары, Гравіна і іншых), якія ў мінулым аказвалі шматбаковую дапамогу ахвярам Чарнобыльскай катастрофы, асабліва гасціну беларускім дзецям, для якіх італьянскае сонца і мора былі вельмі гаючымі. Некаторыя з ініцыятараў той дапамогі (лекары) прысутнічалі на Боскай Літургіі.

 

Паводле тэлеграм-канала "Грэка-католікі Беларусі"