ВЫБРАНЫ НОВЫ ПАТРЫЯРХ ХАЛДЭЙСКАЙ КАТАЛІЦКАЙ ЦАРКВЫ МАР ПАВЕЛ III НОНА

У нядзелю, 12 красавіка 2026 года, у Рыме біскупы Халдэйскай Каталіцкай Царквы выбралі біскупа Эміля Шымуна Нону новым патрыярхам Багдада Халдэйскай Каталіцкай Царквы ў Іраку і ва ўсім свеце. Ён прыме гэтую пасаду ад былога патрыярха кардынала Луіса Рафаэля Сако, які 10 сакавіка, пасля 13 гадоў служэння, падаў у адстаўку, прынятую Папам Львом XIV. Пасля абрання біскуп Эміль Шымун Нона прыняў новае імя і адгэтуль тытулуецца як «Яго Блаславенства Мар Павел III Нона, патрыярх Вавілонскі каталіцкіх халдэяў».

 

Халдэйская Каталіцкая Царква — гэта ўсходняя каталіцкая царква ўсходне-сірыйскага абраду, якая ўзнікла ў 1553 годзе на тэрыторыі Ірака (Месапатаміі) шляхам аддзялення ад Асірыйскай царквы Усходу (раней вядомай як «нестарыянская») і ўступлення ў поўную еднасць з Каталіцкай Царквой, захаваўшы пры гэтым сваю ўсходне-сірыйскую літургічную, тэалагічную і духоўную спадчыну. Халдэйская Царква і сёння выкарыстоўвае ў літургіі сіра-арамейскую мову, на якой размаўляў Ісус. Рэзідэнцыя гэтай Царквы, якая налічвае каля 600 000 вернікаў, знаходзіцца ў Багдадзе (Ірак), а яе вернікі пражываюць у Іраку, Іране, Сірыі, Ліване і ў значнай ступені ў дыяспары на ўсіх кантынентах.

 

Новы патрыярх Мар Павел III Нона нарадзіўся ў 1968 годзе ў Алькошы на поўначы Ірака, у так званай Ніневійскай даліне, дзе знаходзяцца руіны біблейскай Ніневіі і гістарычны цэнтр месапатамскіх і асірыйскіх хрысціян. Як выдатны дзеяч Халдэйскай Каталіцкай Царквы, ён да гэтага часу служыў архібіскупам Масула ў Іраку, дзе ўзначальваў мясцовую хрысціянскую супольнасць у адзін з самых складаных перыядаў, асабліва падчас уздыму ІДІЛ у 2014 годзе, а таксама пераследу і перасялення тысяч хрысціян з горада і прылеглых раёнаў. Пазней ён заняў пасаду апостальскага візітатара для халдэйскіх католікаў у Еўропе, пашыраючы свае пастырскія абавязкі ў дыяспары.

 

Сінод біскупаў Халдэйскай Каталіцкай Царквы праходзіў у Рыме з 9 па 12 красавіка 2026 года пад старшынствам біскупа Хабіба Хормуза, архібіскупа Басры і патрыяршага адміністратара, пасля сустрэчы біскупаў з Папам Львом XIV. Згодна з Кананічным правам Усходніх Каталіцкіх Цэркваў, патрыяршыя цэрквы на сваіх сінодах самі выбіраюць патрыярха, якога затым зацвярджае Папа Рымскі, удзяляючы яму кананічную еднасць.

 

Паводле тэлеграм-канала "Грэка-католікі Беларусі"