У санктуарый Маці Божай ў Лагішыне з Бярозы і Баранавічаў сёлета прыйшло шмат пілігрымаў у складзе дзвюх пешых пілігрымак.

Грэка-католікі, якія традыцыйна бяруць удзел у святкаваннях, прыехалі з Берасця і Івацэвічаў. Адна з групаў па дарозе ў санктуарый у Лагішыне наведала Бабровічы і каталіцкія могілкі ў Целяханах, дзе памаліліся ля магілы выдатнага беларускага святара а. Баляслава Пачопкі, які ў міжваенны час быў душпастырам ва ўніяцкай парафіі ў суседніх Бабровічах.

Увечары, 9 жніўня - па традыцыі, грэка-католікі спявалі Акафіст Найвяцейшай Багародзіцы перад Яе цудатворным Абразом у касцёле свв. Пятра і Паўла. Малітву ўзначалілі Архімандрыт Сяргей (Гаек) і а. Віталь Быстроў з Івацэвічаў.  

Разам з хорам грэка-католікаў Акафіст спявалі дапаможны біскуп Пінскай дыяцэзіі Казімір Вялікаселец і шматлікія вернікі, што запоўнілі храм.

Затым грэка-католікі бралі ўдзел у начной св. Імшы для пілігрымаў, якую ўзначаліў уладыка Казімір Вялікаселец. Падчас яе грэка-каталіцкі протадыякан Вячаслаў Гарчакоў з Івацэвічаў чытаў Евангельле.

Апоўначы пасля св. Імшы была ўрачыстая малітоўная працэсія з свечкамі вакол санктуарыя Маці Божай Лагішынскай.

Паводле тэлеграм-канала "Грэка-католікі Беларусі"