У рамках Міжнароднай духоўнай канферэнцыі, прысвечанай прымірэнню ды міру між хрысціянамі і народамі – KAIROS 2013, якую арганізавала міжнародная асацыяцыя “Супольнасць Ісуса” (Comunita’ di Gesu’), удзельнікі ўзгадалі Славянскую місію святых Кірылы і Мятода, 1150-я ўгодкі якой адзначаюцца ў гэтым годзе.

Канферэнцыя KAIROS 2013 сабрала прадстаўнікоў (духоўных асобаў і свецкіх вернікаў) рыма-каталіцкай Царквы, грэка-каталіцкіх (італа-албанскай, беларускай, румынскай, украінскай), праваслаўных (албанскай, румынскай, амерыканскай) і англіканскіх Цэркваў (розных юрысдыкцыяў), пратэстанцкіх царкоўных Супольнасцяў са шматлікіх краінаў свету – Еўропы, Амерыкі (Аргентыны, Бразіліі, ЗША), Афрыкі (Анголы, Рэспублікі Паўднёвай Афрыкі, Камеруна, Кот д’Івуар).

Пра актуальнасць місіі Апосталаў Славянаў гаварыў на канферэнцыі архімандрыт Сяргей (Гаек).
“1150 гадоў таму Салунскія Браты Кірыла і Мятод, з Візантыі, праз Балканы, дайшлі да славянаў цэнтральнай Еўропы, якім прынеслі Евангелле на роднай мове. Далей праз Венецыю яны дайшлі да Рыму, дзе атрымалі блаславенне Папы на сваю дзейнасць. Гэта было ў час, калі Цэрквы Усходу і Захаду яшчэ жылі ў еднасці ды сулучнасці. Місійны подзвіг Апосталаў Славянаў і сёння з’яўляецца заклікам, каб хрысціяне розных канфесіяў, у духу прымірэння, хацелі сулучна вяшчаць Евангелле сённяшняму свету, словамі ды ўчынкамі любові.
Мы ў Беларусі глядзім з вялікай увагай на постаці святых Кірылы і Мятода ды іхнім малітвам давяраем высілкі дзеля развіцця міжканфесійнага дыялога любові і супрацоўніцтва,” – сказаў між іншым архімандрыт Сяргей.

***
Удзельнікі канферэнцыі KAIROS 2013 з Аргентыны, былыя супрацоўнікі і сябры кардынала Хорхэ Бэргольё, узгадалі візіт дэлегацыі “Супольнасці Ісуса”, якую сённяшні Папа Францішак прыняў у Буэнас-Айрэсе 27-га ды 28-га кастрычніка 2006 г. У тых сустрэчах дэлегацыі, якую ўзначалілі біскуп Альтамура-Гравіна Уладыка Марыё Пачэля ды праф. Матэа Калізі, удзельнічаў таксама архімандрыт Сяргей Гаек, Апостальскі Візітатар для грэка-католікаў Беларусі.
***
Канферэнцыя KAIROS 2013 завяршылася ў нядзелю ўвечары 26 траўня 2013 г. экуменічнай малітваў ў базыліцы святога Мікалая, ля ягоных мошчаў, і духоўным малітоўным маршам удзельнікаў (амаль 500 асобаў) па вуліцах гораду Бары ды святой Імшой, якую ў рыма-каталіцкай катэдры ўзначаліў ватыканскі кардынал Станіслаў Рылка, старшыня Папскай Рады па справах свецкіх вернікаў.

Антоніё Калізі, Synergeia pro Oriente Christiano, г. Бары