Сумесная малітвай перад Іконай Багародзіцы ў Слоніме

19 жніўня 2010 г. - за месяц да дакладнай даты 280-х угодкаў каранаваньня Жыровіцкай Іконы Багародзіцы папскімі каронамі група беларускіх сьвятароў і семінарыстаў Цэнтральна-Заходняга Протапрэзьбітарату БГКЦ зьдзейсьніла пілігрымку ў Слонім, дзе ў касьцёле сьв. Андрэя ў Слоніме, разам з мясцовымі рыма-католікамі і грэка-католікамі, маліліся перад каранаванай цудатворнай Іконай.
Сьвятую Імшу ўзначаліў настаяцель слонімскага кляштара Братоў Капуцынаў а. Анатоль Ярошка OFMCap, а казаньне сказаў а. Андрэй Крот, грэка-каталіцкі душпастыр з Гродна.

Пілігрымам спадарожнічалі словы малітвы з VI-га ікаса Акафісту Жыровіцкай Багародзіцы: “Радуйся, Вяльможная Ўладарка Беларускага Народу”, якія прадбачаныя ў Царкоўным календары.

25 сакавіка 2010 г. ў касьцёле сьвятых Сымона і Алены (Чырвоным касьцёле) ў Мінску ў рамках Вялікапосных рэкалекцый, якія праводзяцца для вернікаў касьцёла сьвятых Сымона і Алены і для грэка-каталіцкіх парафій г. Мінска, адбылося сумесная малітоўнае сьвяткаваньне сьвята Дабравешчаньня.

У 19 гадзін пробашч парафіі сьвятых Сымона і Алены а. Уладыслаў Завальнюк, у саслужэньні Апостальскага Візітатара для грэка-католікаў на Беларусі Архімандрыта Сяргея (Гаекам) і пробашча грэка-каталіцкай парафіі Маці Божай Нястомнай Дапамогі а. Яўгена Усошына, узначаліў сьвятую Імшу ў лацінскім абрадзе, на якой катэхетычнае казаньне меў айцец-рэкалектант – Андрэй Буйніч з Ліды (глядзі на сайце).

У днях з 26.02 па 07.03.2010 г. студэнты міжнароднага Лінгвістычна-Катэхітычнага Інстытута (LCI) з Гамінгу (Gaming) ў Аўстрыі наведалі Рым і Асізі. У гэтай пілігрымцы удзельнічаў а. Андрэй Абламейка, як студэнт і капелан у Гамінгу.

Два разы на год студэнты міжнароднага інстытута LCI з Гамінгу маюць магчымасьць наведаць Вечны горад. У прынцыпе не толькі Рым, але таксама і Асізі. Паколькі паралельна з нашай Праграмай Лінгвістычна-Катэхітычнага Інстытута сваю Эўрапейскую праграму ажыцяўляе Францішканскі Універсітэт са Ст’юбінвіля (ЗША), таму для канвентуальных братоў Францішканаў, якія апякуюцца Універсітэтам, Асізі нават больш важны пунт пілігрымкі, чым Рым.

Папскае Брэвэ з індульгенцыяй з выдадзены пасьля пастановы пра каранацыю Жыровіцкай іконы Маці Божай

Бенядыкт ХІІІ.
Усім верным Хрыстовым, якія маюць пагладзець гэтае пісьмо – збаўленьне і апостальскае блаславеньне. Маючы ў ласкавай любові нябесныя багацьці для памнажэньня веры і спасеньня душ, усім верным хрысьціянам, мужчынам і жанчынам, якія шчыра пакаюцца, паспавядаюцца, прычасьцяцца сьв. Тайн і памоляцца пра адзінадушша хрысьціянскіх уладароў, выкараненьне гарэсій, і узвялічаньне сьв. Маці Царквы, пры пабожнам наведваньні царквы Найсьвяцейшай Дзевы Марыі Жыровіцкай, Кіеўскай епархіі, на працягу сямі дзён пасьля дня які вызначаны бісупам, Мы міласціва надаем аб Хрысьце на адзін толькі раз адпушчэньне грахоў і індульгенцыю на працягу гэтых васьмі дзён. Гэтае мае значэньне толькі на адзін раз на год. Мы жадаем, каб гата не мела ніякага значэньня калі б пры стараньні пра гэтую пастанову, паданьні, дазволе, ці публікацыі была, або будзе давацца хаця б найменшая аплата.

Дадзена ў Рыме, у сьв. Пятра, пад пячаткай Рыбака у XV дзень красавіка 1726 г., другі год Нашага пантыфікату.
Кард. Олівера

Навагодняя духоўная вандроўка івацэвіцкіх грэка-католікаў

3 студзеня 2010, у першую нядзелю новага года, група вернікаў грэка-каталіцкай парафіі Маці Божай Жыровіцкай у Івацэвічах зьдзейсьніла духоўную вандроўку ў Слонім, Жыровічы і Быцень.
Мэтай гэтай пілігрымкі была малітва да Багародзіцы на месцах шанаваньня Яе Жыровіцкай Іконы, 280 гадоў каранацыі якой сьвяткуецца ў 2010 г.
Сярод пілігрымаў былі Апостальскі Візітатар БГКЦ Архімандрыт Сяргей і семінарыст Сяргей Раюнец, які навучаецца ў Рыме.

Грэка-каталіцкі “Царкоўны каляндар 2010”

1 судзеня 2010 г., у капліцы Душпастырскага цэнтра нашай Парафіі Праведнага Язэпа прайшла прэзэнтацыя грэка-каталіцкага “Царкоўнага каляндара” на новы 2010 год..
Пасьля Боскай Літургіі протапрэзьбітар Цэнтральна-заходняга дэканата а. Яўген Усошын прадставіў тытул, тэму і зьмест новага каляндара.
У гэтым годзе каляндар мае тытул “Жыровіцкая Заступніца – Маці Еднасьці” і прысьвячаны ён 280-тым угодкам каранаваньня папскімі каронамі Жыровіцкай Іконы Багародзіцы. Таму ў ім зьмешчаныя розныя спіскі Жыровіцкай Іконы і фрагменты Акафісту, які чытаецца перад гэтай Іконай а прыпеў якога гучыць: “Радуйся, ласкавая Ўладарка нашая і міласэрная Заступніца!”

Згодна з шматгадовай традыцыяй царкоўных каляндароў выдаваных для грэка-каталіцкіх парафіяў у Беларусі ў календаруюме на кожны дзень, акрамя імёнаў сьвятых, пададзены біблійныя чытаньні на Літургіі. На кожны месяц прапануецца цытата з навучаньня Папы Бенядыкта XVI адносна Багародзіцы.

Каляндар выдадзены на замову грэка-каталіцкай парафіі Маці Божай Жыровіцкай у Івацэвічах.
Яго можна атрымаць за ахвяраваньне ў грэка-каталіцкіх парафіях нашай Царквы.

У выпадку немагчымасьці знайсьці каляндар, просім зьвяртацца за дапамогай на наш адрас:
svjazep@gmail.com

Ікона Маці Божай ЖыровіцкайКлуб сьв. Кірылы Тураўскага запрашае

Грэка-каталіцкі клуб інтэлігенцыі імя сьв. Кірылы Тураўскага праводзіць сваю чарговую сустрэчу.
У пятніцу 23 кастрычніка ў 19:00 гадз. даклад на тэму “Жыровіцкая Ікона Маці Божай у духовай гісторыі Беларусі” прачытае гісторык Царквы, а. Яўген Усошын (магістр багаслоўя).

Ікона Маці Божай ЖыровіцкайНовы навучальны год семінарыстаў і студэнтаў БГКЦ

Сьвята Пакрову Багародзіцы традыцыйна зьяўляецца днём малітвы за семінарыстаў БГКЦ. У гэтым годзе вернікі маліліся і складалі ахвяраваньні на патрэбы семінарыстаў у нядзелю 4 кастрычніка 2009 г.

Адкрыцьцё Году Жыровіцкай Іконы Маці Божай

У 2010 годзе прыпадае 280 год з часу каранацыі Іконы Маці Божай Жыровіцкай папскімі каронамі.

8 (19) верасьня 1730 г., у сьвята Нараджэньня Найсьвяцейшай Багародзіцы, кіеўскі уніяцкі мітрапаліт Атанасій Шаптыцкі, у прысутнасьці пасланьніка Папы Рымскага, двух уніяцкіх біскупаў (Тэафіла Гадэбскага, уладыкі Ўладзімірскага і Берасьцейскага ды Юрыя Булгака, уладыкі Пінскага і Тураўскага), шматлікага духавенства візантыйскага і лацінскага абрадаў і дзясяткаў тысячаў вернікаў зьдзейсьніў урачысты акт каранацыі залатымі папскімі каронамі Іконы Маці Божай у Жыровіцах.

Была гэта першая каранацыя цудатворнай іконы папскімі каронамі на тэрыторыі сучаснай Беларусі.