Вось урэшце я вярнуўся са свайго самага далёкага падарожжа – з Аўстраліі. Калі тры гады таму ў Кёльне Папа абвясьціў, што наступны Сусьветны Дзень Моладзі пройдзе ў Аўстраліі, я сказаў сабе і сваім сябрам, што вельмі хачу туды патрапіць. І я разумеў, што гэта немагчыма, таму што вельмі дорага, але ж вельмі хацелася. І вось Бог зрабіў мне такі Падарунак. З Беларусі нас паляцела група з дзевяці чалавек – восем ад Рыма-Каталіцкага Касьцёла і адзін ад Грэка-Каталіцкай Царквы. У гэтай пілігрымцы з намі быў дапаможны біскуп Мінска-Магілёўскай архідыяцэзіі Уладыка Антоні Дзямянка.

Нядаўна пачаў дзейнічаць афіцыйны сайт манаства УГКЦ: . З яго мы цяпер можам даведвацца пра асноўныя падзеі з жыцьця розных манастыроў ва Ўкраіне, знаходзіць карысную і цікавую інфармацыю пра жаночыя і мужчынскія супольнасьці, іх гісторыю і харызму.

27 ліпеня з нагоды сьвяткаваньня 1020-х угодкаў Хрышчэньня Русі, Першаярарх УГКЦ Яго Блаславенства Уладыка Любамір адслужыў у Кіеве Архіярэйскую Боскую Літургію. Урачыстае набажэнства, у якім узялі ўдзел уладыкі УГКЦ, сьвятары і і больш за 3 тысячы вернікаў з усёй Украіны, адбылося на тэрыторыі будаўніцтва будучага Патрыяршага сабору УГКЦ.

У нядзелю, 20 ліпеня 2008 г., у катэдральным саборы Усьпеньня Найсьвяцейшай Багародзіцы г. Стрыя адбылася біскупская хіратонія Уладыкі Тараса.
(Як мы інфармавалі, 22 траўня 2008 г. Сьвяты Айцец Бенядыкт XVI блаславіў рашэньне Сіноду Біскупаў Украінскай Грэка-Каталіцкай Царквы пра прызначэньне айца Тараса Сэньківа, манаха Чыну братоў меншых сьвятога Францішка з Паўлы “Мінімі”, дапаможным біскупам Стрыйскай епархіі, надаючы яму тытулярны пасад Січэны).

Для здзяйсненьня хіратоніі ў Стрый прыехалі Першаярарх УГКЦ Яго Блаславенства Уладыка Любамір, члены Сіноду Біскупаў Кіева-Галіцкага Вярхоўнага Архібіскупства, рыма-каталіцкі біскуп Джузэпэ з Італіі, прадстаўнікі Ордэна братоў сьв. Францішка з Паўлы “Мінімі” (да ўсходняй галіны якой належыў а. Тарас), сьвятары і сьвецкія вернікі.

ГРЭКА-КАТАЛІЦКАЯ МОЛАДЗЬ НА СУСТРЭЧЫ “МСМ ІВЯНЕЦ-СІДНЭЙ 2008”.

Калі ў ноч 20 ліпеня 2008 г. (паводле менскага часу) сотні тысяч каталіцкай моладзі з усяго сьвету сабраныя ў Сіднэй (там быў тады дзень) маліліся разам з Сьвятым Айцом Бенядыктам XVI ў рамках Сусьветнага Дня моладзі (СДМ 2008), дзьве тысячы маладых людзей з розных куткоў Беларусі, сабраныя ў івянецкім касьцёле Айцоў Францішканаў сьпявалі Акафіст да Духа Сьвятога. Акафіст быў адслужаны перад Іконай Хрыста Чалавекалюбца (Іконай Божай Міласэрнасьці) і ўзначаліў яго Апостальскі Візітатар для грэка-католікаў Беларусі Дастойны Архімандрыт Сяргей (Гаек) у саслужэньні душпастыра лідскай грэка-каталіцкай парафіі а. Аляксандра Шаўцова. Паводле закліку Архімандрыта Сяргея, словамі Акафісту да Духа Сьвятога моладзь малілася за Прадстаўніка Сьвятога Айца ў Беларусі – Апостальскага Нунцыя Архібіскупа Марціна Відавіча.
Сьпяваў Акафіст менскі грэка-каталіцкі міжпарафіяльны хор “Прасфара” (да якога далучыліся некаторыя семінарысты БГКЦ), але ў хуткім часе ўся моладзь сабраная ў храме сьпявала прыпеў О Нябесны Ўладару, пасяліся ў нас! Такім чынам беларуская моладзь пачынала трэці дзень агульнабеларускага спатканьня “МСМ Івянец-Сіднэй 2008”. Варта дадаць, што акрамя рыма-католікаў і грэка-католікаў у сустрэчы ў Івянцы ўдзельнічала моладзь праваслаўная ды моладзь з пратэстанцкіх супольнасьцяў, а таксама тыя, якія толькі шукаюць шляху да Бога.
Пасьля Акафісту, нягледзячы на позьні час - а гэта была ўжо другая гадзіна ночы (у Аўстраліі 12-я дня) - сотні вачэй узіраліся ў экран тэлебіма, дзе паказвалі, што адбывалася ў далёкай Аўстраліі, у рамках СДМ 2008.
(Ніжэй даем кароткую запіску двух грэка-каталіцкіх удзельнікаў сустрэчы ў Івянцы).

16 ліпеня

Ужо прыляцелі ў Аўстралію, сёньня першы, альбо нават і другі дзень Сусьветнай сустрэчы моладзі. Людзей з заплечнікамі амаль не бачна, хоць дзе-нідзе зьяўляюцца. Садзяюся, што заўтра будзе больш падзеяў і будзе магчымасьць выйсьці ў і-нэт. Хоць гэта аказалася вельмі складаным. Нават зараз я сяджу ў бібліятэцы і мне далі толькі 10 хвілінаў. У Аўстраліі зараз зіма і перад нашым прылётам было даволі халодна, але зараз 22 градусы. Ляцелі 1,5 сутак, рытм зьбіўся і хочацца спаць...

Моладзь з усяго сьвету кожныя некалькі гадоў зьбіраецца ў розных краінах і на розных кантынентах, каб сустрэцца і памаліцца разам з Апосталам Пятром нашых часоў Сьвятым Айцом Папам Рымскім. Сёлета адбудуцца чарговыя Сусьветныя дні моладзі (СДМ) ў Сіднэі (Аўстралія). У СДМ з Беларусі прымае ўдзел група моладзі на чале з Генеральным вікарыем Мінска-Магілёўскай архідыяцэзіі біскупам Антоніем Дзям’янкам. З нашай парафіі разам з гэтай групай у Сіднэі ёсьць сэмінарыст Сяргей Раюнец.

З 10 па 15 ліпеня 2008 г. Украіну наведаў Прэфект Кангрэгацыі Ўсходніх Цэркваў Кардынал Леанарда Сандры.
На працягу шасьці дзён ён меў у Львове сустрэчы з сэмінарыстамі пяці сэмінарыяў УГКЦ, студэнтамі ды выкладчыкамі Украінскага каталіцкага ўніверсітэту.

У нядзелю, 13 ліпеня, завяршылася XIV штогадовая Пілігрымка беларускіх грэка-католікаў з Віцебска ў Полацк, якая праходзіла пад дэвізам: “Любоў Хрыста заахвочвае нас” (Кар. 5, 14). Сёлета яе заканчэньне супала са сьвятам Полацкай Барысаглебскай абіцелі манахаў-студытаў.

Сьвяточную Боскую Літургію ля храму сьв. Параскевы ў Полацку ўзначаліў Апостальскі Візітатар для грэка-католікаў Беларусі Архімандрыт Сяргей Гаек ў саслужэньні сьвятароў з розных парафіяў БГКЦ, у тым ліку настаяцеля манастыра сьвв. Барыса і Глеба ераманаха Лявонція (Тумоўскага) і новага протапрэзьбітэра Усходняга дэканату айца Зьміцера Грышана.

Пасланьне Найдастойнага Апостальскага Нунцыя ў Беларусі на завяршэньне XIV штогадовай Пілігрымкі грэка-католікаў, Полацк, 13 ліпеня 2008 г.