Сёлета, мы сьвяткавалі ўспамін нашага заступніка, сьвятога Язэпа, аж два дні, да таго ж упершыню ў сваім Душпастырскім цэнтры.

У першы дзень Перадсьвяцьця, Боскую Літургію ўзначаліў Высокадастойны арцыбіскуп Марцін Відавіч, Апостальскі нунцый у Беларусі ў саслужэньні з нашым Уладыкам архімандрытам Сяргеем Гаекам, Апостальскім візітатарам для грэка-католікаў Беларусі. Акрамя таго служылі айцы: ксёндз Ігар Лашук, дэкан Серабранкаўскага рыма-каталіцкага дэканату, протапразьбітар Зьміцер Грышан, дэкан Усходняга грэка-каталіцкага дэканату, айцец Пахом Кавалёў, душпастыр парафіі Сьвятога Духа, айцец Яўген Усошын, душпастыр парафіі сьвятога Міколы Цудатворцы і наш пробашч протапразьбітар Андрэй Абламейка. Літургічная абслуга была на вышыні: панамары і семінарысты спраўляліся і з кадзілам і з чытаньнем Апостала і з дапамогай Уладыкам. Міжпарафіяльны маладзёвы хор ”Прасфара” пад кіраўніцтвам рэгента Марысі Янушкевіч сваімі анёльскімі галасамі стварылі малітоўную атмасфэру. Сярод пачэсных гасьцей прысутнічалі Жогла Алег Міхайлавіч, Глава адміністрацыі Заводскага раёна, Рабіцава Ала Мікалаеўна, начальнік аддзела па справах рэлігіі і нацыянальнасьцяў Мінгарвыканкама, Бараноўская Людміла Мікалаеўна, намесьнік Главы адміністрацыі Заводскага раёна. Пасьля Літургіі хлопцы з фальклёрнага гурта ”Рада” дадалі урачыстасьці нашаму сьвяту і засьпявалі калядкі. Такім быў першы дзень.

Сьвяткаваньні Раства Хрыстова ў нашым Цэнтры пачаліся а 10:00 Боскай літургіяй, якую служыў айцец Андрэй Абламейка.

У 12:00, як было заплянавана, мы ўсе выйшлі на вуліцу, дзе нас спачатку сустрэла сучасная маладзёвая “тусоўка”, але старэйшыя хутка паказалі, што гэта такое сапраўдныя традыцыйныя калядоўшчыкі – Калядная зорка, каза, мядзьведзь, конь, цыганы і нашы калядкі… Накалядаваўшыся і насьпяваўшыся, мы, радасныя, падняліся на другі паверх у бібліятэку, і там дзеці паказалі сапраўдную Эвангельскую гісторыю Раства нашага Збаўцы, Ісуса Хрыста.

У нашым Цэнтры першы раз мы сабраліся на перадсьвяцьце Раства Хрыстовага. Узначаліў Службу Апостальскі візітатар архімандрыт Сяргей Гаек, у саслужэньні айца Андрэя Абламейкі і айца Яўгена Усошына. Пасьля Боскай літургіі Базыля Вялікага палучанай зь вячэрняй Уладыка пасьвяціў фігурку Дзіцятка Ісуса. Затым ўсе сьвятары, панамары і людзі выйшлі ўрачастай працэсіяй ад алтара на вуліцу да Батлеемскіх ясьляў і пад сьпеў калядак уклалі фігурку Дзіцятка Ісуса на сена. Куцьця ў гэтым годзе атрымалася на дзіва смачнай, а усьмешкі на тварах дзяцей і моладзі сьведчылі пра тое, што навіна, якой больш, як 2000 гадоў для нас застаецца штораз новай – ”Нова радасьць стала… Хрыстос нарадзіўся! Яго славім!

Больш фота глядзіце ў нашай фотагалерэі.

19 сьнежня 2008 г. прайшло 6 месяцаў ад моманту Сустрэчы Дзяржсакратара Яго Сьвятасьці Папы Бенядыкта XVI, Кардынала Тарчызіё Бэртонэ, з Супольнасьцю Беларускай Грэка-Каталіцкай Царквы ў нашым Душпастырскім Цэнтры сьвятога Язэпа.

У духу падзякі за гэтую вялікую падзею Апостальскі Візітатар БГКЦ Архімандрыт Сяргей (Гаек) зьдзейсьніў кароткую пілігрымку у Рым.

18 сьнежня 2008 г. ён маліўся ў Базыліцы сьв. Пятра ў Ватыкане, пры мошчах сьвятога Вярхоўнага Апостала Пятра, пры мошчах сьв. Сьвятамучаніка Язафата Полацкага і пры магіле Слугі Божага Папы Яна Паўла ІІ-га. У той жа дзень Апостальскі Візітатар меў сустрэчу з Кіраўніцтвам Кангрэгацыі Ўсходніх Цэркваў у Ватыкане.

Расклад сьвяткаваньняў з нагоды парафіяльнага сьвята парафіі Сьвятога Язэпа:

27.12.2008
12:00 – перадсьвяцьце парафіяльнага сьвята:
Сьвяточная працэсія, Літургія сьв.Яна Златавуснага, узначальваюць Апостальскі Нунцый у Беларусі Найдаст. Архібіскуп Марцін Відавіч і Апостальскі Візітатар Беларускай Грэка-Каталіцкай Царквы Архім. Сяргей у саслужэньні сьвятароў бізантыйскага і лацінскага абрадаў

14:00 – сьвяточны абед для сьвятароў

28.12.2008 – парафіяльнае Сьвята
09:00 – Ютрань
10:00 – Літургія сьв.Яна Златавуснага
12:00 – Сьвяточны канцэрт
13:00 – Братэрская агапа для ўсіх парафіянаў

Расклад сьвяткаваньняў з нагоды сьвята Раства Хрыстовага:

Цэнтр Сьвятога Язэпа, Капліца Усіх Сьвятых Беларускіх

24.12.2008
18:30 – перадсьвяцьце Раства Хрыстовага:
Сьвяточная працэсія, Літургія сьв.Васіля Вялікага з Вячэрняй
20:00 – Куцьця:
Братэрская агапа 12-і страваў
21:00 – Калядкі

25.12.2008
10:00 – сьвята Раства Хрыстовага:
Літургія сьв.Яна Златавуснага
12:00 – Дзіцячае сьвята:
Калядкі каля Батлеема і Каляднай елачкі на вуліцы; Калядная містэрыя, віктарыны, батлейка, Сьвяты Мікола з падарункамі ў бібліятэцы; сьвяточны ”салодкі” стол у залі ”Эмаўс”

26.12.2008
09:00 – 2-і дзень сьвята Раства Хрыстовага, Сабор Найсьвятой Багародзіцы:
Літургія сьв.Яна Златавуснага

Касьцёл сьв. Сымона і Алены (Чырвоны касьцёл)

24 сьнежня - 21.00 Боская Літургія
25 сьнежня - 11.00 Боская Літургія
26 сьнежня - 19.00 Боская Літургія

Бэтлеемскае сьвятло – гэта перш за ўсё сімвал жыцьця. Пра гэта выразна напісаў сьвяты Евангеліст Ян: “Бог ёсьць сьвятло, і няма ў ім ніякае цемры” (1 Ян 1.8). Сын Божы прыйшоў на сьвет, каб збавіць яго ад цемры граху, і абдарыць асьвячаючай ласкай – сьвятлом жыцьця. У Хросьце новаахрышчанаму падаецца запаленая сьвечка – сімвал новага жыцьця, якім абдароўвае кожнага з нас Ісус Хрыстос.

Прыйсьце Хрыста ў сьвет таксама суправаджае сьвятло. Першымі яго пабачылі пастухі, якія чувалі каля сваіх статкаў: “Раптам зьявіўся ім анёл Гасподні, і слава Гасподняя апраменіла іх; і спалохаліся страхам вялікім. І сказаў ім анёл: ня бойцеся; я абвяшчаю вам вялікую радасьць, якая будзе ўсім людзям...” (Лк 2.9-10).

19 сьнежня адышла ў вечнасьць Ніна Мацяш, чалавек сьветлай, прыгожай душы, шчырая беларуска, сяброўка нашай Царквы. Усемагутны Госпад даў ёй вялікія выпрабаваньні, якія яна з годнасьцю вытрывала і вялікі талент, які яна рэалізавала напоўніцу. Творы яе, напоўненыя незвычайнай цеплынёй і любоўю сагравалі душы многіх беларусаў, змушалі задумацца над сваім жыцьцём, вучылі шанаваць і любіць сваю зямлю, сваю мову, Бога.

Вечная памяць!

Сёньня роўна паўгады ад візіту Яго Эмінэнцыі кардынала Тарчызіо Бэртонэ, які тады асьвяціў наш Душпастырскі цэнтр. З гэтай нагоды ў Цэнтры сьв. Язэпа наш пробашч, айцец Андрэй Абламейка, адслужыў асаблівы ўдзячны малебен за Сьвятога Айца Бенядыкта ХVІ, Ягонага Дзяржаўнага Сакратара кардынала Тарчызіо Бэртонэ і Ягонага Нунцыя ў Беларусі архібіскупа Марціна Відавіча.

Акрамя таго, сёньня пачалася Дзевятніца – духовая падрыхтоўка да патранальнага сьвята нашай парафіі, таму была адслужана першая частка Акафіста Сьвятому і Праведнаму Язэпу Абручніку Найсьвяцейшай Дзевы Марыі. На працягу дзевяці дзён будзе брацца адна частка Акафіста і малітва да сьв.Язэпа.