Беларускія грэка-католікі на ”Кангрэсе Пакланеньня”

14-18 ліпеня 2009 г. прадстаўнікі БГКЦ удзельнічалі ў міжнародным ”Кангрэсе Пакланеньня” арганізаваным каталіцкай Супольнасьцю EMMANUEL у французскім мястэчку Paray-le-Monial. Гэтае мейсца вядомае ад часу зьяўленьняў Ісуса Хрыста сьвятой манахіні Маргарыце Марыі (Алякок) ў 1629 г. і ўстанаўленьня ў Каталіцкай Царкве культу Найсьвяцейшага Сэрца Ісуса.

Рыхтуемся да сьвяткаваньняў у гонар Маці Божай Шкаплернай, якая шануецца ў Яе сьвятой іконе ў рыма-каталіцкім храме ў Гудагаі (на Гарадзеншчыне), у якім служаць манахі-кармеліты босыя.
Урачыстасьці будуць адбывацца 17-18 ліпеня 2009 г.
17 ліпеня а 22-ай гадзіне будзе адслужаны Акафіст да Найсьвяцейшай Багародзіцы, які прасьпявае хор “Мараната” з Берасьця.
18 ліпеня ўрачыстую сьвятую Імшу а 12-ай гадзіне ўзначаліць Яго Эксцэленцыя біскуп Казімір Вялікаселец ОР.
Апостальскага Візітатара архімандрыта Сяргея на сьвяткаваньнях будуць прадстаўляць ераманах Лявонцій (Тумоўскі) і а. Яўген Маліноўскі, душпастыр парафіі сьвв. Кірыла і Мятода ў Баранавічах.

Малітва ў Навумавічах, на месцы сьмерці Блаславёнай Мучаніцы Мар’яны (Бярнацкай).

13 ліпеня 2009 г. адзначаецца Дзень успаміну Блаславёнай Мучаніцы Мар'яны (Бярнацкай). З гэтай нагоды ў вёсцы Навумавічы, што на Гарадзеншчыне, сабраліся пілігрымы з розных куткоў Беларусі. Сярод іх было некалькі дзесяткаў грэка-католікаў.

Сёлета ўшанаваць памяць мучанікаў у Навумавічы прыехалі жанчыны – сёстры Сястрыцтва Блаславёнае Мучаніцы Мар’яны, якое ад нядаўняга часу дзейнічае ў нашай парафіі Праведнага Язэпа. Яны прывезлі з сабою Ікону Блаславёнай, якую пасьля Сьвятой Імшы змаглі ўшанаваць усе прысутныя.

Завяршэньне XV грэка-каталіцкай Пілігрымкі

Як вядома, з 7 па 12 ліпеня адбылася XV юбілейная штогадовая пілігрымка Віцебск-Полацак. Сёлета яна праходзіла пад дэвізам ”Крыж Хрыста – знак любові”. Удзел у пілігрымцы ўзялі вернікі Грэка-Каталіцкай Царквы з усіх куткоў Беларусі. Па традыцыі, сярод удзельнікаў былі таксама рыма-каталікі і праваслаўныя.

Падчас Пілігрымкі была наладжана праца ў групах дзяленьня, дзе можна было паразважаць і падзяліцца сваім духоўным вопытам і перажываньнямі, зьвязаннымі з агульнай тэмай пілігрымкі ”Крыж Хрыста – знак любові”. На месцах начоўкі пілігрымамі былі падрыхтаванныя канцэрты духоўнай музыкі для мясцовага насельніцтва.

XV грэка-каталіцкая пілігрымка

Субота, 11 ліпеня, у праграме Пілігрымкі быў Днём малітвы за БГКЦ, за пакліканьні да сьвятарства і манаскага жыцьця.

Ранішнюю Боскую Літургію ў Гаранах узначаліў а. Алесь Шыбека з Віцебска, а казаньне прамовіў а. Васіль Ягораў з Магілёва.

У 13:00 гадз. Пілігрымка дайшла да Струньні, дзе ля Крыжа, што стаіць на месцы рэзідэнцыі ўніяцкіх мітрапалітаў была адслужаная Ліцьця за памерлых ярархаў, сьвятароў і вернікаў.
Удзельнікі Пілігрымкі мелі, так сама, магчымасьць ушанаваць часьцінку дрэва Пачэснага Крыжа Гасподняга.

XV грэка-каталіцкая пілігрымка

Дзень малітвы за моладзь

Пятніца, 10 ліпеня, у праграме Пілігрымкі – гэта Дзень малітвы за моладзь Беларусі.

Ранішнюю Боскую Літургію ў рыма-каталіцкай капліцы ў Обалі ўзначаліў менскі душпастыр а. Яўген Усошын, а казаньне прамовіў душпастыр парафіі сьвятамучаніка Язафата ў Полацку а. Аляксандр Шаўцоў.

Сёлетняя пілігрымка Віцебск-Полацак ёсьць юбілейнай, 15-ай.
Яна распачалася ў 1995 годзе намаганьнямі манахаў Полацкага Барысаглебскага манастыра, і з цягам часу з мясцовай душпастырскай ініцыятывы перарасла ў агульнацаркоўную пілігрымку БГКЦ.

Пра Пілігрымку размаўляем з ераманахам Лявонціем

-- Пілігрымка - гэта час, калі ў кантэксьце малітвы мы можам задумацца над мінулым і сённьняшнім днём Царквы. Бягучы год багаты на юбілеі, значныя гістарычныя даты, якія адыгралі важную ролю ў жыцьці народа і Царквы. Якія з іх вы, Ойча, хацелі б асабліва адзначыць?

Гістарычныя даты, якія мы сёлета сьвяткуем – гэта так званы Полацкі ”сабор” 1839 году, на якім была забароненая Грэка-Каталіцкая (Уніяцкая) Царква ў Беларусі.
Гэтыя ўгодкі зьяўляюцца сумнай датай ня толькі для грэка-католікаў, але і для ўсіх беларусаў, паколькі скасаваньне Ўніяцкай Царквы ў Беларусі сталася адным з этапаў зьнішчэньня беларускай нацыянальнай і культурнай традыцыяў пасьля анэксіі беларускіх земляў Расійскай імперыяй. Зразумела, што мы павінны мець адвагу выказаць словы прабачэньня тым, хто спрычыніўся да гэтай трагедыі ў гісторыі нашага народа. Сёньня, калі хрысьціянскія Цэрквы маюць магчымасьць у новы спосаб будаваць адносіны, лічым важным лекаваньне нашых гістарычных ранаў, каб магчы супольна будаваць хрысьцяінскую будучыню Беларусі.

XV грэка-каталіцкая пілігрымка

Чацьвер, 9 ліпеня, у праграме Пілігрымкі быў Днём малітвы за сьвятароў і семінарыстаў.
Раніцай у капліцы Маці Божай Фацімскай і сьв. Язафата ў Шуміліна была адслужаная Боская Літургія, якую ўзначаліў Протапрэзьбітар Усходняга дэканата а. Зьміцер Грышан, а казаньне пра “Крыж Хрыста – знак любові” прамовіў менскі душпастыр а. Яўген Усошын.

“Сёлета, калі ў Каталіцкай Царкве сьвяткуецца Год Сьвятарства, уласна пілігрымка дае нам магчымасьць ацаніць важнасьць для Царквы “службовага” сьвятарства. Адначасова, яна немагчымая без чыннага ўдзелу сьвецкіх вернікаў, і нагадвае ўсім нам пра агульнае пакліканьне да “царскага сьвятарства” і пра важнасьць служэньня і адказнасьці ў Царкве для кожнага хрысьціяніна” – сказаў а. Лявонцій у размове пра Пілігрымку.

XV грэка-каталіцкая пілігрымка

Серада, 8 ліпеня, першы дзень XV грэка-каталіцкай пілігрымкі, быў Днём малітвы за сем’і Беларусі.

Пасьля доўгага шляху ў 40 кіламетраў, які мужна прайшлі пілігрымы з Віцебска, у Шуміліне іх гасьцінна сустракалі манахі–місіянеры Аблаты Беззаганнай Дзевы Марыі.
У рыма-каталіцкай капліцы Маці Божай Фацімскай і сьв. Язафата ў 18:30 была адслужаная Боская Літургія, якую ўзначаліў менскі душпастыр а. Пахом (Кавалёў).

У казаньні ён нагадаў, што cем’і Беларусі вельмі патрабуюць малітвы хрысьціянскіх Цэркваў.
Беларуская Грэка-Каталіцкая Царква рупліва моліцца і нястомна клапоціцца, каб усе сем’і Беларусі былі школамі любові да Бацькаўшчыны, да роднай мовы і культуры.

XV грэка-каталіцкая пілігрымка

Перад Іконай Маці Божай Нястомнай Дапамогі, якая зьяўляецца іконай Маці Божай Балеснай, у Душпастырскім цэнтры па зав. Сьнежным у Менску маліліся сёньня ўвечары менскія вернікі, вырушаючы ў Віцебск. У малітве ўдзельнічалі таксама і тыя, хто захацеў далучыцца да Пілігрымкі духова.
Боскую Літургію ўзначаліў Архімандрыт Сяргей (Гаек) у саслужэньні а. Пахома (Кавалёва), які таксама адправіўся ў Пілігрымку.

“Госпадзе, зрабі простым наш шлях...,
кіруй нашымі крокамі,
малітвамі і заступніцтвам усяслаўнае Багародзіцы
і заўсёды Дзевы Марыі”
- прачытаў малітву Архімандрыт.