Вялікая Пятніца і Вялікая Субота – дні ў якіх хрысьціяне візантыйскага абраду, разважаючы таямніцу пахаваньня Ісуса Хрыста, пакланяюцца ў храмах сьвятой Плашчаніцы, гэта добрая нагода, каб у малітве ўзгадаць шматлікіх пакутнікаў, месца пахаваньня якіх невядомае. Сярод іх ёсьць і Экзарх беларускіх грэка-католікаў а. Антон Неманцэвіч – дакладнае мейсца ягонай магілы так і не знойдзена.
Вядома толькі, што Ён быў замучаны нямецкімі нацыстамі ў менскай турме SD і быў пахаваны 9 студзеня 1943 г. на нямецкіх могілках у Менску сьвятаром мясцовай праваслаўнай Царквы.

З ініцыятывы Протапрэзьбітара Цэнтральна-Заходняга Дэканату БГКЦ а. Андрэя Абламейка, у Вялікую Суботу 11 красавіка ў Парафіяльным Цэнтры сь. Язэпа грэка-католікі Менска ў малітве перад Плашчаніцай Гасподняй узгадаюць Экзарха-Мучаніка. А паколькі не знойдзеная ягоная магіла, будзе асьвячаная і складзена ў адмысловай капсулі зямля з могілак, дзе быў ён пахаваны.
Малітву а 9:00 гадз. раніцы ўзначаліць Апостальскі Візітатар БГКЦ Архімандрыт Сяргей, які ў Вялікую Пятніцу – 10 красавіка наведаў Альбярцін ды маліўся перад крыжом усталяваным на месцы служэньня і арыштаваньня нямецкім гэстапа Экзарха Антона.

1. У сьвяточныя дні Сьвятой Пасхі Хрыстовай пакланяемся Крыжу і славім Уваскрасеньне Госпада і Збаўцы нашага Ісуса Хрыста. Уваскрасеньня нельга аддзяляць ад Крыжа, а Крыжа – ад Уваскрасеньня, бо Ўваскрасеньне Гасподняе – гэта сьвята перамогі над сьмерцю, а Крыж – гэта знак гэтае перамогі.

Сьвяты Ян з Дамаску пісаў: ”Не чымсьці іншым, як толькі Крыжом Госпада нашага Ісуса Хрыста сьмерць была зьнішчаная, грэх прабацькоўскі – ачышчаны, пекла – пазбаўленае сваёй здабычы, і даравана ўваскрасеньне. Менавіта ім вяртаемся мы да першапачатковага шчасьлівага стану, ім адчыненыя брамы раю, праз яго нашая прырода села праваруч Бога і мы зрабіліся дзецьмі Божымі і спадкаемцамі Яго. Усё гэта зроблена Крыжом”.

У Крыжы праявілася ўсемагутнасьць Божая. У Крыжы бачым мы ўжо не сьмерць, а перамогу над сьмерцю, Ўваскрасеньне Хрыстовае і знак агульнага ўваскрасеньня ўсіх тых, што вераць у Хрыста. Для нас, хрысьціянаў, гэта знак надзеі і знак жыцьця, і менавіта гэта мы вызнаем, калі ўшаноўваем Крыж Хрыстовы, калі робім знак сьвятога Крыжа, калі носім гэты знак не толькі ў сэрцах, але і яўна на целах нашых.

Такім чынам мы сьведчым, што Ісус Хрыстос – Збаўца і Пераможца сьмерці, Той, Хто ўцелавіўся, прынёс Добрую Вестку – Сьвятое Евангельле, памёр дзеля нас і ўваскрос, каб мы мелі вечнае жыцьцё.

8 красавіка 2009 г. у пінскай катэдры Апостальскі адміністратар Пінскай дыяцэзіі, Мінска-Магілёўскі арцыбіскуп на пенсіі, кардынал Казімір Свёнтэк у 70-ю гадавіну свайго святарскага служэння цэлебраваў урачыстую святую Імшу. У літургіі прынялі ўдзел Мітрапаліт Мінска-Магілёўскі арцыбіскуп Тадэвуш Кандрусевіч, Апостальскі Нунцый у Беларусі арцыбіскуп Марцін Відавіч, усе біскупы Беларусі, Апостальскі візітатар для грэка-католікаў у Беларусі архімандрыт Сяргей Гаек МІС, шматлікія святары, законнікі і законніцы, у тым ліку айцец Яўген Усошын ды некаторыя семінарысты БГКЦ.

Вялікапосныя рэкалекцыі ў Менску праходзілі ў два этапы. Першы этап – рэкалекцыі для парафіі Маці Божай Нястомнай Дапамогі і парафіі Сьвятога Духа адбываліся з 26.03 па 29.03.2009 году. Другі этап – рэкалекцыі для нашай парафіі Сьвятога Язэпа і парафіі Сьвятога Міколы Цудатворцы адбываліся ў нашым парафіяльным Цэнтры сьв. Язэпа з 03.04 па 05.04.2009 года.

6/04 – Вялікі Панядзелак: гадз. 18:30 – Літургія раней Асьвячаных Дароў

7/04 – Вялікі Аўторак: гадз. 18:30 – Літургія раней Асьвячаных Дароў

8/04 – Вялікая Серада: гадз. 18:30 – Літургія раней Асьвячаных Дароў
Памазаньне сьвятым алеем і малітва за аздараўленьне

9/04 – Вялікі Чацьвер: гадз. 18:30 – Вячэрня з Літургіяй сьв. Базыля Вялікага

10/04 – Вялікая Пятніца:
гадз. 9:00 – Ютрань – 12 Евангельляў Пакутаў Хрыстовых
гадз. 18:30 – Вячэрня, вынас і адпяваньне сьвятой Плашчаніцы

11/04 – Вялікая Субота
Вернікі ўсіх грэка-каталіцкіх парафіяў г. Менска запрашаюцца да сумеснай малітвы за праслаўленьне Экзарха-Пакутніка Антона Неманцэвіча

гадз. 9:00 – Вячэрня з Літургіяй сьв. Базыля Вялікага
Малітва перад сьвятой Плашчаніцай
Усталяваньне капсулы з зямлёй з месца пахаваньня Экзарха Антона Неманцэвіча


Пасхальная Ноч (чырвоны касьцёл, цэнтральны нэф)
Усе грэка-каталіцкія парафіі г. Менска РАЗАМ сустракаюць Уваскрасеньне Гасподняе

гадз. 00:00 – Працэсія Уваскрасеньня
Сьветлая Пасхальная Ютрань
Боская Літургія
Асьвячэньне велікодных страваў

12/04 – Вялікая Нядзеля – ВЯЛІКДЗЕНЬ
гадз. 12:00 – Боская Літургія (капліца па вул. Арджанікідзэ 6)

Сёлета па ініцыятыве і пры падтрымцы Мітрапаліта Мінска-Магілёўскага арцыбіскупа Тадэвуша Кандрусевіча быў выдадзены першы пераклад на беларускую мову Дакументаў ІІ Ватыканскага Сабору. 16 сакавіка 2009 г. арцыпастыр асабіста прадставіў гэтую працу Бэнэдыкту XVI у Ватыкане. Прапануем інтэрв’ю Мітрапаліта Тадэвуша Кандрусевіча для ватыканскай газеты «L'Osservatore Romano».

25 сакавіка 2009 года, з нагоды 65-й гадавіны сьмерці Блаславёнага Сьвятамучаніка Амільяна (Коўча), на месцы былога канцэнтрацыйнага лагеру Майданэк у Польшчы, быў асьвячаны абеліск (камень) з пасланьнем Блаславёнага:
"…Тут я бачу Бога – Бога, які ёсьць адзін для нас усіх, без зважаньняў на рэлігійную розьніцу".

Урачыстасьць узначалілі грэка-каталіцкі мітрапаліт перамышльска-варшаўскі Высокадастойны Кір Ян (Мартыняк) ды рыма-каталіцкі архібіскуп-мітрапаліт люблінскі Юзаф Жыцінскі. Удзельнічалі грэка-каталіцкія біскупы з Украіны ды Польшчы, разам са шматлікімі грэка-каталіцкімі сьвятарамі – пілігрымамі з Украіны.

Беларускую Грэка-Каталіцкую Царкву прадстаўлялі Апостальскі Візітатар архімандрыт Сяргей (Гаек) ды душпастыр грэка-каталіцкай парафіі ў Берасьці а. Ігар Кандрацьеў.

17 сакавіка 2009 г. на афіцыйнай інтэрнэт-старонцы Апостальскага Пасаду было павядомлена пра рашэньне Вярхоўнага Архібіскупа Украінскай Грэка-Каталіцкай Царквы Любаміра (Гузара) у згодзе з Сінодам Біскупаў УГКЦ аб прызначэньні ўладыкі Васіля (Мэдвіта) дапаможным біскупам Данецка-Харкаўскага Экзархату (Усходняя Украіна).

16 сакавіка 2009 г. у Рыме (Італія) Мітрапаліт Мінска-Магілёўскі арцыбіскуп Тадэвуш Кандрусевіч, які ў гэтыя дні прымае ўдзел у Пленарным пасяджэнні Кангрэгацыі па справах Духавенства, уручыў папу Бэнэдыкту XVI Дакументы ІІ Ватыканскага Сабору на беларускай мове.

Святы Айцец з вялікай радасцю прыняў вестку пра выданне гэтых дакументаў. Між іншым, у сваёй прамове да ўдзельнікаў Пленарнага пасяджэння Пантыфік узгадваў вучэнне ІІ Ватыканскага Сабору.

У размове з арцыпастырам беларускіх католікаў Бэнэдыкт XVI узгадаў Касцёл на Беларусі, а таксама выказаў радасць з прычыны яго адраджэння і развіцця.

Друкуецца ў мове арыгіналу паводле сайта catholic.by

Міжнародны Сімпозіум “Місія Ўсходніх Каталіцкіх Цэркваў у жыцьці Паўсюднай Царквы ды ў сучасным сьвеце”

Пра неабходны сімбіёз паміж Евангельлем і культурай у сучаснай місіі Беларускай Грэка-Каталіцкай Царквы гаварыў Апостальскі Візітатар БГКЦ Архімандрыт Сяргей (Гаек) на Міжнародным Сімпозіуме “Місія Ўсходніх Каталіцкіх Цэркваў у жыцьці Паўсюднай Царквы ды ў сучасным сьвеце”, які праходзіў 4-6 сакавіка 2009 г. у Міжнародным Інстытуце вывучэньня сужэнства і сям’і (ІТІ) у аўстрыйскім горадзе Гамінг.