XV грэка-каталіцкая пілігрымка

Субота, 11 ліпеня, у праграме Пілігрымкі быў Днём малітвы за БГКЦ, за пакліканьні да сьвятарства і манаскага жыцьця.

Ранішнюю Боскую Літургію ў Гаранах узначаліў а. Алесь Шыбека з Віцебска, а казаньне прамовіў а. Васіль Ягораў з Магілёва.

У 13:00 гадз. Пілігрымка дайшла да Струньні, дзе ля Крыжа, што стаіць на месцы рэзідэнцыі ўніяцкіх мітрапалітаў была адслужаная Ліцьця за памерлых ярархаў, сьвятароў і вернікаў.
Удзельнікі Пілігрымкі мелі, так сама, магчымасьць ушанаваць часьцінку дрэва Пачэснага Крыжа Гасподняга.

XV грэка-каталіцкая пілігрымка

Дзень малітвы за моладзь

Пятніца, 10 ліпеня, у праграме Пілігрымкі – гэта Дзень малітвы за моладзь Беларусі.

Ранішнюю Боскую Літургію ў рыма-каталіцкай капліцы ў Обалі ўзначаліў менскі душпастыр а. Яўген Усошын, а казаньне прамовіў душпастыр парафіі сьвятамучаніка Язафата ў Полацку а. Аляксандр Шаўцоў.

Сёлетняя пілігрымка Віцебск-Полацак ёсьць юбілейнай, 15-ай.
Яна распачалася ў 1995 годзе намаганьнямі манахаў Полацкага Барысаглебскага манастыра, і з цягам часу з мясцовай душпастырскай ініцыятывы перарасла ў агульнацаркоўную пілігрымку БГКЦ.

Пра Пілігрымку размаўляем з ераманахам Лявонціем

-- Пілігрымка - гэта час, калі ў кантэксьце малітвы мы можам задумацца над мінулым і сённьняшнім днём Царквы. Бягучы год багаты на юбілеі, значныя гістарычныя даты, якія адыгралі важную ролю ў жыцьці народа і Царквы. Якія з іх вы, Ойча, хацелі б асабліва адзначыць?

Гістарычныя даты, якія мы сёлета сьвяткуем – гэта так званы Полацкі ”сабор” 1839 году, на якім была забароненая Грэка-Каталіцкая (Уніяцкая) Царква ў Беларусі.
Гэтыя ўгодкі зьяўляюцца сумнай датай ня толькі для грэка-католікаў, але і для ўсіх беларусаў, паколькі скасаваньне Ўніяцкай Царквы ў Беларусі сталася адным з этапаў зьнішчэньня беларускай нацыянальнай і культурнай традыцыяў пасьля анэксіі беларускіх земляў Расійскай імперыяй. Зразумела, што мы павінны мець адвагу выказаць словы прабачэньня тым, хто спрычыніўся да гэтай трагедыі ў гісторыі нашага народа. Сёньня, калі хрысьціянскія Цэрквы маюць магчымасьць у новы спосаб будаваць адносіны, лічым важным лекаваньне нашых гістарычных ранаў, каб магчы супольна будаваць хрысьцяінскую будучыню Беларусі.

XV грэка-каталіцкая пілігрымка

Чацьвер, 9 ліпеня, у праграме Пілігрымкі быў Днём малітвы за сьвятароў і семінарыстаў.
Раніцай у капліцы Маці Божай Фацімскай і сьв. Язафата ў Шуміліна была адслужаная Боская Літургія, якую ўзначаліў Протапрэзьбітар Усходняга дэканата а. Зьміцер Грышан, а казаньне пра “Крыж Хрыста – знак любові” прамовіў менскі душпастыр а. Яўген Усошын.

“Сёлета, калі ў Каталіцкай Царкве сьвяткуецца Год Сьвятарства, уласна пілігрымка дае нам магчымасьць ацаніць важнасьць для Царквы “службовага” сьвятарства. Адначасова, яна немагчымая без чыннага ўдзелу сьвецкіх вернікаў, і нагадвае ўсім нам пра агульнае пакліканьне да “царскага сьвятарства” і пра важнасьць служэньня і адказнасьці ў Царкве для кожнага хрысьціяніна” – сказаў а. Лявонцій у размове пра Пілігрымку.

XV грэка-каталіцкая пілігрымка

Серада, 8 ліпеня, першы дзень XV грэка-каталіцкай пілігрымкі, быў Днём малітвы за сем’і Беларусі.

Пасьля доўгага шляху ў 40 кіламетраў, які мужна прайшлі пілігрымы з Віцебска, у Шуміліне іх гасьцінна сустракалі манахі–місіянеры Аблаты Беззаганнай Дзевы Марыі.
У рыма-каталіцкай капліцы Маці Божай Фацімскай і сьв. Язафата ў 18:30 была адслужаная Боская Літургія, якую ўзначаліў менскі душпастыр а. Пахом (Кавалёў).

У казаньні ён нагадаў, што cем’і Беларусі вельмі патрабуюць малітвы хрысьціянскіх Цэркваў.
Беларуская Грэка-Каталіцкая Царква рупліва моліцца і нястомна клапоціцца, каб усе сем’і Беларусі былі школамі любові да Бацькаўшчыны, да роднай мовы і культуры.

XV грэка-каталіцкая пілігрымка

Перад Іконай Маці Божай Нястомнай Дапамогі, якая зьяўляецца іконай Маці Божай Балеснай, у Душпастырскім цэнтры па зав. Сьнежным у Менску маліліся сёньня ўвечары менскія вернікі, вырушаючы ў Віцебск. У малітве ўдзельнічалі таксама і тыя, хто захацеў далучыцца да Пілігрымкі духова.
Боскую Літургію ўзначаліў Архімандрыт Сяргей (Гаек) у саслужэньні а. Пахома (Кавалёва), які таксама адправіўся ў Пілігрымку.

“Госпадзе, зрабі простым наш шлях...,
кіруй нашымі крокамі,
малітвамі і заступніцтвам усяслаўнае Багародзіцы
і заўсёды Дзевы Марыі”
- прачытаў малітву Архімандрыт.

Біскупская хіратонія Ўладыкі Крыштафа Ніткевіча адбылася ў горадзе Сандомір (Sandomierz) у Польшчы 4 ліпеня 2009 году.

Хіратонію ўзначаліў Апостальскі Нунцый у Польшчы архібіскуп Юзэф Кавальчык у саслужэньні Мітрапаліта Гданьскага архібіскупа Славоя Лешэка Глудзя і Мітрапаліта Люблінскага архібіскупа Юзэфа Жыцінскага, а таксама Мітрапаліта Шчэцінскага архібіскупа Андрэя Дзенгі і Архібіскупа Кірыла (Васіля), Сакратара Кангрэгацыі Ўсходніх Цэркваў.
На хіратоніі прысутнічалі 38 ярархаў, сярод якіх Мітрапаліт Пярэмыска-Варшаўскі УГКЦ Уладыка Ян (Мартыняк) і Мітрапаліт Прэшаўскі Славацкай Грэка-Каталіцкай Царквы Ўладыка Ян (Бабяк).

З Беларусі на хіратонію прыбылі Мітрапаліт Мінска-Магілёўскі архібіскуп Тадэвуш Кандрусевіч і Архімандрыт Сяргей (Гаек), Апостальскі Візітатар БГКЦ.

XV штогадовая грэка-каталіцкая пілігрымка
Віцебск – Полацак: 7 – 12 ліпеня 2009

З 7 па 12 ліпеня 2009 г. пройдзе XV штогадовая грэка-каталіцкая Пілігрымка з Віцебску ў Полацак.

У гэтым годзе Пілігрымка праходзіць пад дэвізам “Крыж Хрыста – знак любові”.

Пілігрымка, што пачалася 15 год таму, для ушанаваньня памяці 5-ці Полацкіх пакутнікаў - базылянскіх манахаў забітых у 1705 году, кожны год праходзіць пакутніцкі шлях сьв. Святамучаніка Язафата і Полацкіх пакутнікаў.
Кожны год Пілігрымка атрымлівае новы дэвіз, які ўпісваецца ў душпастырскую праграму Беларускай Грэка-Каталіцкай Царквы дадзенага году.
Кожны – хрысьціянін, чалавек, які шукае Бога, які любіць сваю Бацькаўшчыну Беларусь, можа далучыцца да Пілігрымкі і прайсьці гэты шлях у супольнай малітве і любові.
Кантакт: а. Андрэй Буйніч (029)566.24.14 (МТС), (044)776.24.14 (VEL)
Адказны за Пілігрымку: а. Протапрэзьбітар Зьміцер Грышан (029) 210.80.95 (МТС), (029) 675.29.97(VEL)

3 ліпеня раніцай – у 8:00 гадз. грэка-католікі Менска далучыліся да міжканфесійнай ініцыятывы малітвы за Бацькаўшчыну - у салідарнасьці з братамі рыма-католікамі, праваслаўнымі ды пратэстантамі.

Набажэнства, якое праходзіла ў Душпастырскм цэнтры Маці Божай Нястомнай Дапамогі, што на зав. Сьнежным, 7, узначаліў Апостальскі Візітатар Беларускай Грэка-Каталіцкай Царквы Архімандрыт Сяргей (Гаек) у саслужэньні душпастыраў менскіх парафіяў ды а. Андрэя Буйніча з Ліды.

Грэка-каталікі на фэсьце ў Будславе

З 1 па 2 ліпеня ў Будславе адбылося агульнабеларускае сьвята іконы Маці Божай Будслаўскай. З розных куткоў Беларусі ў Будслаў прыбыло некалькі тысяч пілігрымаў.
Па традыцыі, да сьвяткаваньня далучыліся і вернікі Беларускай Грэка-Каталіцкай Царквы.

Дзякуючы ахвярнасьці семінарыстаў БГКЦ і с. Вікторыі, падчас сьвята працаваў інфармацыйны намёт БГКЦ, у якім можна было атрымаць зьвесткі пра гісторыю і дзейнасьць Царквы, набыць рэлігійную літаратуру, памятныя іконкі, значкі.

Увечары 1 ліпеня быў адслужаны акафіст да Найсьвятой Багародзіцы, які сёлета падрыхтаваў мінскі маладзёвы міжпарафіяльны хор “Прасфара”. Далучыцца да сьпеву маглі ўсе прысутныя.