17 траўня адбыўся агульны выезд скаўцкай суполкі нашай парафіі сумесна з бацькамі у лес. Мэтай гэтай вандроўкі было не толькі адпачыць на прыродзе, паесьці смачнай кашы, прыгатаванай на вогнішчы самімі дзецьмі, але і ўрачыстая цэрымонія ўступленьня малодшых дзяцей у зграю ваўчанят, і пераход старэйшых у скаўты.

22 траўня 2008 г. прэс-служба Ватыкана паведаміла пра тое, што Сьвяты Айцец Бенядыкт XVI блаславіў рашэньне Сіноду Біскупаў Украінскай Грэка-Каталіцкай Царквы пра прызначэньне айца Тараса Сэньківа, настаяцеля Чыну братоў меншых сьвятога Францішка з Паўлы “Мінімі”, дапаможным біскупам Стрыйскай епархіі, надаючы яму тытулярны пасад Січэны (Siccenna).

У Нядзелю Ўсіх Сьвятых, 18 траўня, у нашай парафіі чацьвёра дзяцей: АНАСТАСІЯ АБЛАМЕЙКА, ВАЛЕРЫЯ ЖУКОЎСКАЯ, АЎГУСТА СІЗОНАВА і АЛЕГ МАЗУРКЕВІЧ першы раз у сваім жыцьці прыступіліся да Таямніцы Споведзі і ўрачыста прынялі Сьвятое Прычасьце.

У аўторак 13 траўня ў 5-я ўгодкі стварэньня грэка-каталіцкага Апостальскага Экзархату ў Рускім Керэстуры (Сербія), экзарх Уладыка Дзьюра Джуджар, прэшаўскі архібіскуп мітрапаліт Уладыка Ян Бабяк SJ і братыслаўскі епарх Уладыка Пётр Руснак адслужылі архіярэйскую Боскую Літургію ў марыйным санктуарыі Водзіца, які знаходзіцца ў сербскім аўтаномным краі Ваяводзіна. Напрыканцы Літургіі да вернікаў звярнуўся Апостальскі Нунцый у Сербіі архібіскуп Эўджэніо Збарбаро: ,,Найсьвяцейшая Багародзіца заўсёды паклікана дапамагаць вам і прасіць у Сына, каб перамяніў ваду чалавечай слабасьці ў віно Божай моцы ў вашым жыцьці”. Пра стварэньне Экзархату ён зазначыў, што ніводная структура Царквы не ствараецца з бюракратычнай мэтай, яна паклікана больш эфектыўна абвяшчаць Евангельле ў гэтым сьвеце.

Сёлета спаўняецца 110 гадоў з дня аднаўленьня студыцкага манаства ва Ўкраіне. З гэтай нагоды 3 траўня 2008 г. у канферэнц-залі Львоўскага палаца мастацтваў прайшла навуковая канферэнцыя, прысьвечаная памяці архімандрыта Кліменція Шаптыцкага.

11 траўня нашая парафія сьвяткавала Зыход Сьвятога Духа. У рамках сьвята была зарганізавана праграма чуваньня.

Здаўна славіцца сваімі шматлікімі ласкамі цудатворны абраз Маці Божай у Жыровіцах. Вось ужо больш за пяць стагоддзяў мноства вернікаў з самых розных куткоў нашай краіны — з-пад Слоніму і Горадні, з Берасьця і Пінску, з Менску, Віцебску ды Гомеля, а нават і з Польшчы, Украіны, Расеі імкнуцца ў гэтае маленькае мястэчка ў самым сэрцы Беларусі, каб прасіць заступніцтва ў нашай нябеснай Апякункі Найсьвяцейшай Багародзіцы Дзевы Марыі ды ўзьнесьці малітвы падзякі за атрыманыя ласкі і дабрадзействы.

На працягу мінулых месяцаў грэка-каталіцкія Цэрквы на Украіне, у Грэцыі ды ў Венгрыі атрымалі новых біскупаў. Ніжэй даем кароткую інфармацыю пра гэтыя радасныя і для нас падзеі.

У сераду 23 красавіка 2008 г. Бенядыкт XVI прызначыў а. Дымітрыаса Салахаса новым апостальскім экзархам для грэка-католікаў Грэцыі. Сьвяты Айцец прыняў просьбу біскупа Анаргіраса Прынтэсіса аб звальненьні яго з абавязкаў пастырскага служэньня апостальскага экзарха.

У нашай парафіі ў Нядзелю Самаранкі, 20 красавіка, адбылася вялікая ўрачыстасьць: да новага жыцьця ў Хрысьце нарадзілася спадарыня ІРЫНА КЛІМКОВІЧ. Прайшоўшы адпаведную падрыхтоўку разам з с. Вікторыяй, яна прыняла Таямніцы Хросту і Мірапамазаньня, які зьдзейсьніў падчас нядзельнай Боскай Літургіі айцец Яўген Усошын.

Віншуем і зычым Божага блаславеньня, багатых дароў Духа Сьвятога, вытрываласьці і мужнасьці на шляху хрысьціянскага жыцьця!