“Палюбіў нас”, кажа святы Павел, гаворачы пра Хрыста (Рым 8, 37), каб мы адкрылі, што ад гэтай любові нішто ніколі не зможа “нас адлучыць” (Рым 8, 39)" - так пачынаецца чацвёртая энцыкліка Францішка, названая па першых словах Dilexit nos і прысвечаная чалавечай і боскай любові Сэрца Хрыстовага.

У тэксце, апублікаваным 24 кастрычніка 2024 года, падкрэсліваецца, што Сэрца Езуса “папярэджвае нас і чакае без умоў, не выстаўляючы ніякіх папярэдніх патрабаванняў, каб любіць нас і прапанаваць сваё сяброўства".

🌿 22 кастрычніка 2024 г., у дзень літургічнага ўспаміну сьв. Яна Паўла ІІ, папы Рымскага, Апостальскі Адміністратар для грэка-католікаў у Беларусі Архімандрыт Сяргей (Гаек) адслужыў Боскую Літургію ў Берасьці. Разам з ім саслужыў а. Віталь Быстроў, дыяканскае служэньне спаўняў Вячаслаў Гарчакоў з парафіі Маці Божай Жыровіцкай у Івацэвічах.

Архімандрыт Сяргей найперш адзначыў, што літургічны ўспамін гэтага сьвятога папы Рымскага адзначаецца ня ў дзень сьмерці, як звычайна для большасьці сьвятых, а ў дзень пачатку ягонага служэньня на пасадзе сьвятога апостала Пятра ў Рыме. Узгадваць духоўную спадчыну гэтага Наступніка сьвятога апостала Пятра і прасіць яго малітоўнага заступніцтва асабліва сымбалічна ў Берасьці, дзе  апекунамі грэка-каталіцкай парафіі зьяўляюцца браты-апосталы Пятро і Андрэй – заступнікі хрысьціянскага Захаду і Ўсходу, і дзе ў 1596 годзе была абвешчана царкоўная Унія.

18 кастрычнiка ў касцёле Перамянення Пана (Фарным) у Навагрудку (Гродзенская дыяцэзія) адзначылі 450-годдзе з дня нараджэння Мiтрапалiта Кіеўскага, Галіцкага і ўсяе Русі Язэпа (Івана Іосіфа) Руцкага.

Цэлебрацыю святой Імшы з гэтай нагоды ў старадаўняй навагрудскай фары ўзначаліў Генеральны вікарый Пiнскай дыяцэзii біскуп Андрэй Зноска. У ёй узялі ўдзел Апостальскi адмiнiстратар для грэка-католікаў у Беларусі архімандрыт Сяргей Гаек, святары лацінскага і візантыйскага абрадаў. Гамілію прамовіў грэка-каталіцкі протабрэзбітэр айцец Андрэй Крот з Гродна, які пазнаёміў прысутных з жыццём і дзейнасцю славутага земляка.

У МІНСКУ

у АЎТОРАК, 22.10.2024: святочная БОСКАЯ ЛІТУРГІЯ ў 18:30 - у храме Душпастырскага цэнтра Прав. Язэпа (вул. Арджанікідзе, 6) - у 18:30;

у СЕРАДУ, 23.10.2024: святочная БОСКАЯ ЛІТУРГІЯ ў храме Маці Божай Нястомнай Дапамогі (зав. Снежны, 7) - у 18:30 

ЗАПРАШАЕМ.

19 кастрычніка ў катэдральным касцёле Найсвяцейшага Імя Марыі ў Мінску адбылася святая Імша падзякі Богу з нагоды 35-годдзя біскупскага служэння арцыбіскупа эмэрыта Тадэвуша Кандрусевіча.

Першаму ў сучаснай гісторыі Касцёла ў Беларусі каталіцкаму іерарху біскупскае пасвячэнне ўдзяліў 20 кастрычніка 1989 года ў ватыканскай базыліцы святога Пятра тагачасны Папа святы Ян Павел ІІ.

Бліжэйшая Місійная нядзеля, якая прыпадае на 20 кастрычніка, будзе адзначацца ў 98-ы раз.

Дэвіз сёлетняга Сусветнага дня місій, які адзначаецца штогод у трэцюю нядзелю кастрычніка, — «Пайдзіце і запрасіце на вяселле ўсіх» (пар. Мц 22, 9). Ён натхнёная евангельскай прыпавесцю пра караля, які загадаў сваім слугам пайсці на ростані і паклікаць на вяселле яго сына ўсіх, каго сустрэнуць.

18 кастрычніка 2024 ў Фарным касцёле Перамянення Госпада ў Навагрудку была асвячаная памятная табліца з нагоды 450 гадавіны нараджэння грэка-каталіцкага мітрапаліта Язэпа Руцкага, уражэнца Навагрудскай Зямлі: "Сыну Зямлі Навагрудскай, Мітрапаліту Іосіфу Вельямін - Руцкаму, Выдатнаму дзеячу Уніяцкай Царквы, стваральніку Ордэна базільянаў, багаслову, асветніку, пісьменніку - у 450-ую гадавіну нараджэння". (Табліцу фандаваў грэка-каталіцкі вернік Віктар Малежык).

У 18:00 гадз. св. Імшу ўзначаліў Біскуп Андрэй Зноска, дапаможны біскуп Пінскай дыяцэзіі, казанне прамовіў протапрэзбітар Андрэй Крот з Гародні, асвяціў табліцу Архімандыт Сяргей (Гаек).

Урачыстасць супала з 50-тай гадавінай Хросту настаяцеля храму - ксяндза дэкана Яна Балтрукевіча. Яму "Многія ды шчасныя леты!"

Некаторыя міфы, якія ўзніклі вакол пытання аб паходжанні ўраджэнца Навагрудчыны, грэка-каталіцкага Мітрапаліта Язэпа Руцкага, былі развенчаны падчас міжнароднай навуковай канферэнцыі, якая праходзіць у Рыме.

16 кастрычніка 2024 года ў Папскім грыгарыянскім універсітэце распачаўся двухдзённы форум, прысвечаны ролі Мітрапаліта Кіеўскага Язэпа (Івана Іосіфа) Руцкага ў рэалізацыі рашэнняў Трыдэнцкага Сабора.

Унійны Сабор у Берасці праходзіў 16-18 кастрычніка 1596 г. Штогадовы ўспамін гэтага Сабору ў грэка-каталіцкіх парафіях ды супольнасцях у Беларусі - гэта дні малітвы і духоўнага асэнсавання словаў  Сімвала Веры "Веру ў адзіную, святую, паўсюдную і апостальскую Царкву".

Боская Літургія ў МІНСКУ:

16 кастрычніка - у Парафіі Маці Божай Нястомнай Дапамогі: 18:30;

17 кастрычніка - у Парафіі св. Мікалая: 09:30;

18 кастрычніка - у Парафіі Прав. Язэпа: 18:30.

У нядзелю 13 кастрычніка ў Віцебску прайшлі заключныя ўрачыстасці ў межах святкавання 25-гадовага юбілею з часу ўтварэння Віцебскай дыяцэзіі — самай маладой каталіцкай дыяцэзіі ў Беларусі.

Віцебская рыма-каталіцкая дыяцэзія была ўтворана 13 кастрычніка 1999 года Святым Айцом Янам Паўлам II на моцы Апостальскай Канстытуцыі Ad aptius consulendum. Напярэдадні ў віцебскім катэдральным касцёле Езуса Міласэрнага прайшла сустрэча святароў і сясцёр законных, якія нясуць служэнне ў дыяцэзіі, на чале з біскупам Віцебскім Алегам Буткевічам.