ВЯЛІКАПОСНЫ ДУХОЎНЫ КАНЦЭРТ

20 студзеня пасьля Боскай Літургіі ў Парафіі Маці Божай Нястомнай дапамогі (у дольнай зале Чырвонага касьцёла) адбыўся малы духоўны канцэрт барда Алеся Камоцкага. У яго выкананьні прагучалі творы з новага альбома пад назвай “Вяровіца Алеся Камоцкага”. Гэты новы праект – гэта дыск і кніга Псальмаў ў паэтычным перакладзе Рыгора Барадуліна.

Выданьне аздоблена фотаздымкамі амерыканскага фатографа Джона Кунстадтэра. Замалёўкі розных момантаў жыцьця беларусаў перагукаюцца з вершамі, а ў іх – простая вера простых і шчырых людзей, імкненьне душы, спраглай Жыцьця і Праўды, да Бога.

“Я Табою малюся і Табою сьмялею й баюся,
Я, Табою дазволены жыць, паміраю й жыву.
І Табой паддаюся і не паддаюся спакусе,
Я са страхам і верай на плаху кладу галаву”.

Духоўна-паэтычная вечарына сталася нагодай з дапамогай высокай паэзіі вершаў-псальмаў спыніцца перад веліччу Бога-Творцы ды паразважаць над месцам кожнага з нас у гэтым сьвеце, нашым пакліканьнем, яшчэ раз перасэнсаваць каштоўнасьці, якімі жывем.

Наступная сустрэча-прэзентацыя з новым праектам Алеся Камоцкага адбудзецца 22 сакавіка ў Наваградку ў Музеі Адама Міцкевіча а 15.00.

Асноўная ж прэзентацыя “Вяровіцы Алеся Камоцкага” адбудзецца 24 сакавіка ў Менску ў Музеі Янкі Купалы а 18.30.

“Да Бога зьвярнуцца з малітвай залішнім ніколі ня будзе...”