Візіт кардынала Бэртонэ ва Ўкраіну

З 23 па 26 траўня 2008 г. праходзіў візіт Дзяржаўнага сакратара Ватыкана кардынала Тарчызіо Бэртонэ ва Ўкраіну. 23 траўня высокі госьць прыехаў ў Львоў, дзе сустрэўся з біскупамі УГКЦ Уладыкам Ігарам (Возьнякам), Уладыкам Уладзімірам (Війцішыным), Уладыкам Сцяпанам (Мяньком), Уладыкам Яраславам (Прырызам), Уладыкам Міланам (Шашыкам). Асноўнай мэтай візіту кардынала Бэртонэ ў Львоў была беатыфікацыя рыма-каталіцкай манахіні сястры Марты Вэцкай, якая адбылася 24 траўня.

У нядзелю 25 траўня кардынал Бэртонэ наведаў будаўніцтва Патрыяршага сабору Ўваскрасеньня Хрыстовага Ўкраінскай Грэка-Каталіцкай Царквы ў Кіеве. Высокага госьця сустрэлі Яго Блаславенства Патрыярх УГКЦ Любамір і сакратар Сіноду біскупаў УГКЦ Уладыка Багдан (Дзюрах). На месца будаўніцтва сабору з кардыналам Бэртонэ прыбылі таксама Апостальскі Нунцый ва Ўкраіне архібіскуп Іван Юркавіч і архібіскуп-каад’ютар Рыма-Каталіцкай Царквы Мячыслаў Макшыцкі.

У прывітальным слове Яго Блаславенства Любамір выказаў словы ўдзячнасьці кардыналу Тарчызіо Бэртонэ за яго жаданьне наведаць будучы Патрыяршы цэнтр усёй Украінскай Грэка-Каталіцкай Царквы. Сабор, які будуецца ў сталіцы Ўкраіны, на думку Патрыярха УГКЦ, будзе сімвалам адзінства УГКЦ, месцам, адкуль будуць сыходзіць ініцыятывы ў справе дасягненьня адзінства паміж усімі хрысьціянамі.

У храме Дабравешчаньня Найсьвяцейшай Багародзіцы перад пачаткам Боскай Літургіі кардынал Бэртонэ зьвярнуўся са словам да шматлікіх вернікаў: “Як я магу не падзякаваць Госпаду за гэтую Яго ласку, -- ласку знаходзіцца зараз, падчас сьвяткаваньня 1020-ых угодкаў хрышчэньня Кіеўскай Русі, тут, на берагах Дняпра, ракі, якую ваша найдастойнейшая літаратурна-рэлігійная традыцыя справядліва называе “украінскім Ярданам”. Менавіта з гэтага блаславёнага месца евангельская вестка пашыралася сярод усходне-славянскіх народаў і напаўняла іхняе жыцьцё і культуру”.

Пра сучасны стан Украінскай Грэка-Каталіцкай Царквы кардынал Бэртонэ зазначыў, што яна “не засяроджваецца толькі на поглядзе ў мінулае, але зьяўляецца адкрытай на евангелізацыю і місійную дзейнасьць”. Пасля Літургіі Дзяржаўны сакратар Ватыкана сустрэўся з Прэзідэнтам Украіны Віктарам Юшчанкам, які ўручыў яму ордэн князя Яраслава Мудрага І ступені за значны асабісты ўнёсак у пашырэньне ў сьвеце ідэалаў міру, справядлівасьці і гуманізму.

Паводле Дэпартамента інфармацыі УГКЦ