Парафія сьвятога Язэпа > Вэрсія для друку > НАПЯРЭДАДНІ КАРАНАЦЫІ БРАСЛАЎСКАЙ ІКОНЫ БАГАРОДЗІЦЫ

22 жніўня гэтага году ў Браславе, у Санктуарыі, якім апякуюцца манахі сальватарыяне, адбудзецца чын каранацыі Іконы Маці Божай - Валадаркі Азёраў.
Урачыстасьці каранаваньня Іконы ўзначаліць Архібіскуп Кёльна, кардынал Ёахім Майснэр – вялікі шанавальнік сьвятамучаніка Язафата Полацкага.

Грэка-католікі Менска арганізуюць аўтабусную двухдзённую Пілігрымку ў Будслаў і Полацак, якая адправіцца з Менску ўначы 22 жніўня (каля 00:30).

Адказны за арганізацыю Пілігрымкі: старшыня нашай Парафіі (Праведнага Язэпа): Анатоль Сёмуха, тэл. маб. (Velcom) 644.76.22

Трапар перад Браслаўскай Іконаю Багародзіцы - Валадаркі Азёраў
Тон 4

Сёньня сьветла радуецца *
Богам ратаваны горад Браслаў і ўвесь край Беларускі,*
бо бачаць Твой, Міласэрная Валадарка Азёраў,*
слаўны ласкамі вобраз, каранаваны тут на зямлі.*
Ты ж, увенчаная нябеснаю славаю,* -
нястомны Пакроў і Заступніца хрысьціянаў,
верных Еднасьці Царквы.*
У час жа перасьледаў за вернасьць Адзінай Царкве *
Ты не пакінула дзетак сваіх,*
але падаравала Твой вобраз прававернаму народу для суцяшэньня,*
бо Ты – сапраўднае Прыстанішча ў жыцьцёвых бурах *
і Маці Еднасьці.
* * *

Браслаўская Ікона Маці Божай - Валадаркі Азёраў

Дакладны час зьяўлення гэтай Іконы, якая цешылася вялікім шанаваньнем у люду з Браслаўскіх ваколіцаў, невядомы.

Паводле мясцовага паданьня ў XV ст. на астраўку Ліпіна зьявілася Ікона Маці Божай. Зьяўленне Іконы ў паданьні зьвязваецца і з заснаваньнем манастыра.

Паволе легенды Ікона некалькі разоў вярталася з царквы, куды ўрачыста пераносілася, на востраў. У гэтым пабачылі волю Маці Божай, якая хацела заснаваньня манастыра. Востраў на якім быў заснаваны манастыр, пасьля называўся Сьвятым. У пачатку XVII стагоддзя праваслаўны манастыр прыняў Унію і тут аселі манахі базыльяне; тады Ікону назвалі ”манастырскай”.

Росквіт культу цудатворнай Іконы Багародзіцы ў Браславе наступіў у XVІІІ ст., калі браслаўскі манастыр базыльянаў стаўся адным з трох найбольшых месцаў марыйнага культу на тэрыторыі сучаснай Беларусі, якія знаходзіліся пад апекаю ўніяцкага базыльянскага ордэна, разам з Жыровіцамі і Барунамі.

Вядома, што ўніяцкі храм Усьпеньня Багародзіцы згарэў у 1832 годзе, а ў 1834 годзе царскія ўлады скасавалі і сам манастыр.

Але мясцовае паданьне сьцвярджае, што Ікона Багародзіцы захавалася, бо яна была перададзеная ў Браслаўскі касьцёл.

Абставіны перадачы Іконы, шанаванай ва ўніяцкім (грэка-каталіцкім) манастыры айцоў базыльянаў дакладна невядомыя.
Ведама толькі, што ў чэрвені 1906 года, калі быў кансэкраваны новазбудаваны рыма-каталіцкі касьцёл у Браславе, у ім быў зьмешчаны Абраз (ікона) Маці Божай, які ўжо тады меў доўгую традыцыю шанаваньня сярод мясцовых хрысьціянаў.
(Гл. сайт Санктуарыя: www.waladarka.by).

Магчыма, Браслаўская Ікона Багародзіцы была такім самым чынам перададзеная ўніяцкімі манахамі базыльянамі ў рыма-каталіцкія храмы (або пабожным католікам), як і Жыровіцкая алтарная Ікона Маці Божай (якая зараз знаходзіцца ў касьцёле сьв. Андрэя ў Слоніме) і Барунская Ікона Маці Божай, якая доўгі час правяла ў шляхецкай сям’і Важынскіх (а зараз шануецца ў касьцёле былога базыльянскага манастыра ў Барунах, пад апекай Айцоў Салезіянаў).
Манахі-базыльяне хацелі такім чынам захаваць абразы ва ўласнасьці Каталіцкай Царквы.
а. Яўген Усошын