У Баранавічах адбыўся сімпозіум прысвечаны стагоддзю Пінскай дыяцэзіі

27 верасня ў Катэхетычным каледжы імя Зыгмунта Лазінскага адбыўся навуковы сімпозіум прысвечаны гістарычнаму шляху Пінскай дыяцэзіі.

Сустрэча распачалася святой Імшой, якую ўзначаліў канцлер курыі Пінскай дыяцэзіі ксёндз Андрэй Рылка. Святар прывітаў усіх сабраных ад імя Біскупа Пінскага і падкрэсліў важнасць гэтай падзеі сярод разнастайных мерапрыемстваў, якія адбываюцца ў бягучым Юбілейным годзе.Гамілію да сабраных студэнтаў, выкладчыкаў і гасцей прамовіў архімандрыт Сяргей Гаек, які падкрэсліў важную ролю свецкіх вернікаў у захванні і пераказе веры.

 

Пасля святой Імшы ў актавай зале каледжа былі абвешчаныя навуковыя даклады. Уступны даклад прамовіў ксёндз доктар Юрый Дрозд, выкладчык гэтай установы, які ў свой час быў дырэктарам каледжа. Ксёндз доктар запрасіў сабраных паглядзець на пройдзены шлях Пінскай дыяцэзіі з перспектывы біблійнага разумення часу, дзе сярод звычайнага бегу падзей Бог рэалізоўвае план збаўлення людзей.

 

З другім дакладам выступіла кандыдат гістарычных навук спадарыня Раіса Зянюк, якая таксама з’яўляецца выкладчыкам у Катэхетычным каледжы. З дапамогай архіўных фотаздымкаў яна наглядна паказала сабраным, чым жыла Пінская дыяцэзія ў мінулым, асабліва ў першыя дзесяцігоддзі пасля яе заснавання.

 

Яшчэ з адным дакладам да ўдзельнікаў сімпозіуму выступіў спадар Сяргей Верамееў, кандыдат гістарычных навук, дацэнт, супрацоўнік Гомельскага дзяржаўнага ўніверсітэта імя Ф. Скарыны. Дакладчык падрабязна распавёў пра спадчыну вернікаў грэка-каталіцкага абраду на тэрыторыі Пінскай дыяцэзіі.

 

Пасля заканчэння сімпозіуму ў Катэхетычным каледжы адбылася інаўгурацыя новага навучальнага года. Дырэктар каледжа брат Карнэлій Консек уручыў дыпломы сёлетнім выпускнікам гэтай тэалагічнай установы, а таксама студэнцкія білеты 30-ці новым студэнтам, якія ў гэтым годзе распачалі свой акадэмічны шлях у сценах каледжа.     

Завяршэннем сімпозіума і інаўгурацыі стала традыцыйная супольная гасціна.

 

 

Паводле https://pinskdiocese.by/