Адышоў у вечнасьць верны прыяцель БГКЦ - біскуп Украінскай Грэка-Каталіцкай Царквы Кір Сафрон (Дмытэрка)

5 лістапада 2008 году, на 92 годзе жыцьця адышоў у вечнасьць біскуп-эмерыт Івана-Франкоўскай япархіі Ўкраінскай Грэка-Каталіцкай Царквы Ўладыка Сафрон (Дмытэрка). Яго імя цесна зьвязана з падпольнай дзейнасьцю і адраджэньнем Украінскай Грэка-Каталіцкай Царквы ды Беларускай Грэка-Каталіцкай Царквы.

З моманту адраджэньня першых грэка-каталіцкіх парафіяў у Беларусі Ўладыка Сафрон (Дмытэрка) аказваў ім шматбаковую пастырскую падтрымку.

Ён ў 1991 г. прызначыў першым Дэканам БГКЦ а. Яна Матусевіча а таксама рукапаклаў на дыякана а. Андрэя Абламейку ды на сьвятара а. Казіміра Ляховіча.

Кір Сафрон (Дмытэрка) нарадзіўся 1 чэрвеня 1917 г. у вёсцы Бычкаўцы на Тэрнопальшчыне. У 1932 г. уступіў у навіцыят Чыну сьв. Васілія Вялікага (базыльяне).

Сьвятарскія свячаньні ён атрымаў 14 траўня 1942 г. у Празе (Чэхія) з рук Уладыкі Мікалая Дудаша.
На працягу 1944–1954 гг. знаходзіўся пад арыштам за “антысавецкую дзейнасьць” як вязень падпольнай Царквы. Пасьля вызваленьня вёў падпольнае пастырскае служэньне ў Івана-Франкоўску, Каламыі, Даліне, Ярэмчы ды ў іншых месцах Львоўскай і Тэрнопальскай абласьцей.

30 лістапада 1968 г. атрымаў біскупскую хіратонію (з рук Уладыкі Івана Слезюка) і быў прызначаны біскупам-каад’ютарам Івана-Франкоўскай япархіі.

1973–1975 гг. арыштаваны ў другі раз і адпраўлены на прымусовыя працы на Луганшчыну (Украіна).

Пасьля адраджэньня УГКЦ у 1991–1997 гг. быў біскупам-ардынарыем Івана-Франкоўскай япархіі.

Сьвяты Айцец Ян Павал ІІ 22 сьнежня 1997 г. прыняў прашэньне Кір Сафрона (Дмытэркі) і дазволіў яму перайсьці на пенсію.

Пахаваньне Ўладыкі Сафрона (Дмытэркі) адбылося ў Івана-Франкоўску ў пятніцу 7 лістапада 2008 г. Чын пахаваньня ўзначаліў Першаярарх УГКЦ Яго Блаславенства Любамір (Гузар) ў саслужэньні Апостальскага Нунцыя ва Ўкраіне Архібіскупа Івана Юркавіча ды біскупаў і сьвятароў УГКЦ.

Цела Кір Сафрона (Дмытэркі) пахавана ў крыпце кафедральнага сабору Ўваскрасеньня Хрыстовага ў Івана-Франкоўску.