Юнакі і дзяўчаты з Беларусі разам з арцыбіскупам Станеўскім супольна перажываюць дні моладзі ў Лісабоне

З 2 па 4 жніўня ўдзельнікі Сусветных дзён моладзі, якія праходзяць у сталіцы Партугаліі Лісабоне, збіраліся на сустрэчы Rise up, падчас якіх супольна маліліся і разважалі на вызначаныя тэмы.

Удзельнікі СДМ з Беларусі, якія прыбылі ў Лісабон разам з Мітрапалітам Мінска-Магілёўскім арцыбіскупам Юзафам Станеўскім, збіраліся на сустрэчы ў лісабонскім касцёле святога Стэфана.

 

У першы дзень у сустрэчы ўзялі ўдзел больш за 150 чалавек.

 

Адказны за моладзь у Мінска-Магілёўскай архідыяцэзіі ксёндз Андрэй Бурак правёў для прысутных катэхезу на тэму інтэгральнай экалогіі, абапіраючыся на дакументы Папы Франіцшка: Апостальскую адгартацыю Christus vivit, напісаную ў форме ліста да моладзі, і энцыкліку Laudato si’, прысвечаную клопату пра супольны дом.

 

Цэлебрацыю святой Імшы ўзначаліў ксёндз Алег Шпець, хрыстусовец з Мінска, які разам з іншымі святарамі суправаджае беларускую моладзь у Лісабоне. Падчас Эўхарыстыі юнакі і дзяўчаты разважалі над словамі з Евангелля паводе Лукі, якія сталі тэмай сёлетніх Сусветных дзён моладзі: «Сабраўшыся, Марыя ў тыя дні паспяшыла ў горную краіну» (Лк 1, 39), а таксама разам спявалі гімн СДМ на беларускай мове.

 

Святую Імшу на другі дзень сустрэч цэлебраваў арцыбіскуп Станеўскі, засяродзіўшыся ў гаміліі на біблійнай тэме дня — словах Марыі на вяселлі ў Кане Галілейскай: «Тое, што Ён скажа вам, зрабіце» (Ян 2, 5).

 

Эўхарыстыі папярэднічала катэхеза на тэму сацыяльнага сяброўства на падставе дакументаў Святога Айца: адгартацыі Christus vivit і энцыклікі Fratelli tutti аб братэрстве і сацыяльным сяброўстве.

 

Удзельнікі Сусветных дзён моладзі з Беларусі адзначаюць цудоўную арганізацыю мерапрыемства на партугальскай зямлі і эфектыўную працу валанцёраў, якімі з’яўляюцца іх аднагодкі з розных краін свету.

 

 

Фота: абп. Юзаф Станеўскі, Кс. Юрый Ясевіч / Catholic.by