Святы Альфонс Лігуоры

1 жніўня Царква святкуе памяць св. Альфонса Лігуоры, Настаўніка Царквы, заснавальніка Кангрэгацыі рэдэмптарыстаў, які памёр у гэты дзень у 1787 г.

 

У 1732 г. св. Альфонс далучыў да евангелізацыі сярод найбольш занядбаных людзей групу святароў - так з'явілася Кангрэгацыя Найсвяцейшага Адкупіцеля.

 

Альфонс стаў сімвалам супярэчнасці для тагачаснай Царквы, якая пакінула беднякоў з сельскай мясцовасці на волю лёсу. Выступаў ён і супраць рыгарыстычнай ментальнасці, якая рабіла акцэнт на пакаранні за грахі: св. Альфонс перанёс галоўную ўвагу на любоў і прабачэнне. "Бог любіць нас" - вось матыў ўсяго жыцця Альфонса. Божая любоў, якая выяўляецца ў Божай міласэрнасці ў адносінах да нас, чакае адказу: адчуваючы любоў Бога да нас, мы самі імкнемся любіць Яго. 

 

Асаблівай праявай міласэрнай любові Божай ёсць таінства споведзі. Усё жыццё Альфонса стала нібы адлюстраваннем гэтай таямніцы: ён умеў выслухоўваць, як сябар - адкрыта і з любоўю. Па яго ўласных словах, спаведнік павінен быць "поўным любові і салодкім, як мёд". Нездарма ў 1950 г. Папа Пій XII абвясціў Альфонса патронам маральных багасловаў і спаведнікоў, а галоўная місія Кангрэгацыі рэдэмптарыстаў і дагэтуль полягяе ў абвяшчэнні вяршэнства любові і міласэрнасці.

 

Пасля смерці Альфонса яго мара жыла ў сэрцах яго паслядоўнікаў. Рэдэмптарысты распаўсюдзіліся па ўсім свеце, перш за ўсё дзякуючы св. Кліменту Марыі Гофбауэру - першаму неітальянцу, які ўступіў у Кангрэгацыю. Праз рэдэмптарыстаў Адкупіцель улівае новае жыццё і новую надзею ў сэрцы тых людзей, якія значаць найменш для гэтага свету, якія "найбольш пакінутыя". Кангрэгацыя Найсвяцейшага Адкупіцеля - гэта месца, дзе праходзіць вечная місія Хрыста: "Я пасланы абвяшчаць Евангелле ўбогім".

 

http://cssr.by/redemptarysty/svyatyya-i-blaslavjonyya/15-svyaty-alfons-liguory-1696-1787.html