Апостальскі Нунцый узначаліў у Менску малітву з нагоды 30-х угодкаў абраньня Папы Яна Паўла ІІУрачыстую сьв. Імшу з нагоды 30-х угодкаў абраньня кардынала Караля Вайтылы на пасад Сьвятога Пятра, увечары 16 кастрычніка 2008 г., у касьцёле сьвятых Сымона і Алены ў Менску, узначаліў Апостальскі Нунцый у Беларусі Высокадастойны Ўладыка Архібіскуп Марцін Відавіч. Яму саслужылі Апостальскі Візітатар БГКЦ ў Беларусі Архімандрыт Сяргей (Гаек), Протапрэьбітар Андрэй Абламейка і менскія грэка-каталіцкія сьвятары а. Пахом Кавалёў і а. Яўген Усошын ды а. Алесь Шаўцоў з Полацку і а. Андрэй Буйніч з Ліды, а таксама менскія сьвятары лацінскага абраду - а. Дэкан Пётр Бялевіч OMI. і кс. Дэкан Уладзіслаў Завальнюк – гаспадар касьцёла.
Прысутнічаў таксама Пасол Рэспублікі Польшча ў Менску спадар Генрык Ліцьвін разам з дыпламатычным персаналам.
Казаньне прамовіў Сакратар Апостальскай Нунцыятуры манс. Крыспін Дубель. Узгадаў ён, між іншым, гістарычнае значэньне словаў, якімі новаабраны Папа Ян Павал ІІ разпачаў свой пантыфікат:
“Ня бойцеся! Адчыніце шырока дзьверы Хрысту!”Вернікі абодвух абрадаў супольна дзякавалі Госпаду за першасьвятарскае служэньне Слугі Божага Папы Яна Паўла ІІ і маліліся за Яго кананізацыю.
Пасьля сьв. Імшы некалькі хораў прадставілі музычную праграму для ўшанаваньня памяці Папы Яна Паўла ІІ-га.
а. Яўген Усошын
