У Карагандзе архімандрыт Сяргей (Гаек) прыняў удзел у душпастырскай кансультацыі адносна дыялогу з мусульманамі

13 верасня 2022 завяршылася дзевятніца (навена) малітоўнай падтрымкі Папы Францішка - " Пасланніка міру і братэрства", які вечарам у гэты дзень прыбыў у Нур-Султан - сталіцу Казахстана.  У гэтай духоўнай праграме ўдзельнічалі вернікі ў парафіях і супольнасцях грэка-католікаў Беларусі.  

 

У той жа дзень 13 верасня, у малітве і душпастырскай кансультацыі адносна патрэбаў і магчымасцяў міжрэлігійнага дыялогу - асабліва хрысціянаў і мусульманаў - удзельнічаў у Карагандзе (у манастыры Айцоў Марыянаў) архімандрыт Сяргей (Гаек). Ён узгадаў свой удзел у пачатковых ініцыятывах  дыялогу католікаў і мусульманаў ў Казахскай ССР (у Карагандзе) і Таджыкскай ССР (у Душанбэ), што мелі месца яшчэ напрыканцы 80-тых гадоў ХХ-га стагоддзя.

 

У дарозе на сустрэчу з Папам Францішкам у Нур-Султане, іерарх беларускіх грэка-католікаў архімандрыт Сяргей (Гаек) наведаў Караганду - сталіцу Апостальскай Адміністратуры для грэка-католікаў Казахстана і Сярэдняй Азіі, якую ўзначальвае Апостальскі Адміністратар мітрафорны протаіерэй Васіль Гавера.