Папа Францішак здзейсніць афіцыйны візіт у Казахстан у верасні 2022 г.

11 красавіка 2022 г. падчас размовы паміж Папам Рымскім і прэзідэнтам Казахстана Касымам-Жамартам Такаевым Францішак пацвердзіў свой афіцыйны візіт у Казахстан, а таксама ўдзел у VII З'ездзе лідэраў сусветных і традыцыйных рэлігій, які пройдзе ў верасні 2022 г. у казахстанскай сталіцы.

На сустрэчы, якая праводзілася ў рэжыме відэаканферэнцсувязі, абмяркоўваліся перспектывы ўмацавання супрацоўніцтва паміж Казахстанам і Ватыканам, а таксама пытанні прасоўвання міжканфесійнай згоды і міжрэлігійнага дыялога.

Галоўнай навінай стала тое, што Папа Францішак паведаміў аб сваім рашэнні здзейсніць афіцыйны візіт у Казахстан. Такім чынам Папа Рымскі адказаў на запрашэнне, атрыманае ім раней ад імя прэзідэнта Казахстана падчас сустрэчы са спікерам Сената парламента Казахстана Маўленам Ашымбаевым. Папа Рымскі таксама пацвердзіў свой удзел у VII З'ездзе лідэраў сусветных і традыцыйных рэлігій, які адбудзецца ў казахстанскай сталіцы Нур-Султане 14-15 верасня 2022 года.

Папа адзначыў, што звязвае вялікія чаканні з маючым адбыцца візітам і ўдзелам у працы форуму: "Я з нецярпеннем чакаю гэтай знамянальнай падзеі з пункту гледжання прасоўвання міжрэлігійнага дыялога, адзінства і збліжэння дзяржаў, што вельмі важна ў нашы дні".

Пантыфік падкрэсліў выключную значнасць дасягнення адзінства і згоды ў свеце ва ўмовах цяперашняй складанай геапалітычнай сітуацыі: «Мы бачым, наколькі разнастайная і адзіная ваша краіна. Гэта аснова стабільнасці. Мы рады, што ў Казахстане гэта разумеюць. Вы можаце разлічваць на маю падтрымку, я шаную Вашы намаганні», - сказаў Прэзідэнту Казахстана Папа Рымскі.

У сваю чаргу, Касым-Жамарт Такаеў пацвердзіў цвёрдую прыхільнасць Казахстана далейшаму развіццю супрацоўніцтва са Святым Пасадам у сферы духоўнай згоды і ўзаемапавагі. Ён таксама праінфармаваў субяседніка аб казахстанскай мадэлі міжканфесійнай згоды і адзінства, а таксама расказаў аб рэалізацыі маштабных палітычных і эканамічных рэформ.