Экстрэмальны Крыжовы шлях сёння пройдзе ў Беларусі

Два гады таму мы пісалі пра экстрэмальны Крыжовы шлях — незвычайную малітоўную ініцыятыву польскіх католікаў. Цяпер узяць удзел у такім набажэнстве можна і ў Беларусі.

Як паведамляе Catholicnews.by, экстрэмальны Крыжовы шлях пройдзе ў ноч з 8 на 9 красавіка па маршруце Удзела (Глыбоцкі раён) – Варапаева (Пастаўскі раён), што складае каля 40 км.

Арганізуюць незвычайнае начное набажэнства ў экстрэмальных умовах айцы францішкане.

 

Крыжовы шлях распачнецца 8 красавіка а 21-й гадзіне святой Імшой у касцёле ў Удзеле, а завершыцца раніцай наступнага дня ў Варапаеве, дзе з 7-й да 9-й гадзіны прадугледжана снеданне і раз’езд.

• Кошт: добраахвотнае ахвяраванне
• Кожны ўдзельнік атрымае:
  • раздрукаваныя разважанні або падрыхтаваную аўдыёверсію
  • мапу маршруту
  • снеданне ў Варапаеве
  • транспарт з Варапаева да Удзела (удзельнікі, якія прыедуць здалёк, могуць пакінуць свае аўто на паркоўцы пры кляштары ў Удзеле)

Што такое экстрэмальны Крыжовы шлях?

• ЭКШ — экстрэмальны Крыжовы шлях. Экстрэмальны, таму што ўначы трэба пераадолець маршрут не менш за 40 км. У самотнасці і ў засяроджанасці. Ніякіх размоў і пікнікоў.
• ЭКШ — гэта выклік. У гэтым выкліку самае галоўнае — дайсці да мяжы болю. Пакуль усё астатняе не скажа: чаму я не дома, у цёплым ложку? Той, хто пераадолее гэта ў сабе, пакідае зону камфорту. Гэта адкрывае новыя выклікі і дае шанц прыняць яшчэ адно рашэнне — змяніць жыццё.
• ЭКШ — гэта барацьба. Калі ўжо немагчыма пазбегнуць знясіленасці і стомленасці, чалавек усведамляе, што менавіта вера з’яўляецца сілай, каб ісці далей.
• ЭКШ — гэта сустрэча з Ім. Цішыня, малітва, медытацыя, доўгі начны шлях — усё гэта толькі для таго, каб сустрэць Бога, а не для іншай мэты.

Як падрыхтавацца да ЭКШ?

• Кожны ўдзельнік атрымае раздрукаваную мапу маршруту.
• Можна пайсці ў ЭКШ самастойна або ў складзе невялікай групы. У любым выпадку, удзельнікі абавязаны захоўваць цішыню падчас усяго шляху. 14 прыпынкаў на малітву і разважанні стацый адбываюцца ў вызначаных месцах.
• Для ЭКШ падрыхтаваны спецыяльныя разважанні.
• Кожны ўдзельнік, які вырушыць у ЭКШ, нясе асабісты крыж, падрыхтаваны загадзя.
• ЭКШ — гэта не пілігрымка. Па-першае, на шляху няма афіцыйнага суправаджэння. Кожны змагаецца сам, каб пераадолець гэты шлях. Па-другое, сутнасць ЭКШ не заключаецца ў тым, каб ісці з нейкай інтэнцыяй, але ў тым, каб змяніць сваё жыццё.
• Для ЭКШ трэба падабраць адпаведнае адзеннне і абутак, каб быць падрыхтаваным на любое надвор’е: снег, дождж, бруд і г.д.

Хто можа ўдзельнічаць у ЭКШ?

• Дарослыя, паўналетняя моладзь, а таксама асобы 16+ са сваім апекуном і дазволам ад бацькоў.
• Людзі розных веравызнанняў. Гэта выклік для людзей, якія шукаюць у жыцці нешта большае — сэнс і новую ідэю для сябе.
• ЭКШ з’яўляецца адпаведнай прапановай для людзей, якія шмат працуюць і якім цяжка знайсці час для сябе і сваёй душы.
• Арганізатары не раяць удзельнічаць асобам, якія думаюць, што калі ім не хопіць сіл, то нехта дапаможа.

 

Паводле: Catholicnews.by / Catholic.by