Малады езуіт склаў «Літанію за Украіну»

Польскі езуіт брат Дамінік Дубель SI склаў «Літанію за Украіну» — паэтычны і музычны твор-малітву, у якім даручае церпячую ад вайны краіну Маці Божай.

Кароткую размову з аўтарам гэтай шчымлівай малітвы апублікавала 7 красавіка Каталіцкае інфармацыйнае агенцтва КАІ.

 

Брат дамінік, глыбока ўзрушаны тым, што адбываецца ва Украіне, прызнаецца, што часам нават не стае сіл, каб усклікаць да Бога. «Аднак я не толькі не хачу, але, хіба што, і не змог бы перажыць тое, што адбываецца, без Яго. Толькі Ён дае надзею і сілы, каб не патануць у роспачы і нянавіці», — кажа брат Дамінік.

 

«Спрабуючы неяк разабрацца з пачварнай рэчаіснасцю вайны, я пачаў збіраць вобразы і эмоцыі, якія праходзілі ў размовах і раіліся ў галаве, і ператвараць іх у малітву да Бога праз заступніцтва Яго Маці. Так узнікла простая малітва, якую я назваў „Літаніяй за Украіну“»,— кажа малады манах.

 

Брат Дамінік Дубель SI з’яўляецца выпускніком езуіцкай Акадэміі Ignatianum і Акадэміі музыкі ў Кракаве. Цяпер ён вывучае тэалогію ў Папскім Грыгарыянскім універсітэце і жыве ў Рыме.

Маючы музычную адукацыю, брат Дамінік паклаў словы Літаніі на музыку і разам з сябрамі запісаў кампазіцыю. Тэкст малітвы быў перакладзены на украінскую і англійскую мовы.

 

«Маю надзею, што наша „Літанія за Украіну“ дапаможа слухачам у кантакце з Богам і прынясе нам усім крыху міру»,— дзеліцца брат Дамінік Дубель.

 

 

«Літанія за Украіну»

Маці тых, хто спускаецца ў сховішчы,
Каралева разбураных цэркваў,
О Пані тых, хто дрыжыць ад страху і холаду, — маліся за нас!

Маці, чыё сэрца разрываецца,
Каралева залежных ад іншых,
Пані тых, хто губляе свае дамы і блізкіх, — маліся за нас!

О Маці Бога-Чалавека,
Які церпіць у кожным пакрыўджаным,
Маліся аб міры для Тваіх дзяцей, — маліся за нас.

Каралева супакою, — маліся за нас.

 

Паводле: КАІ / Catholic.by