У Стоўбцах ушанавалі памяць архімандрыта Льва Гарошкі

11 траўня 2021 г. да Стоўбцаў прыбылі грэка-каталіцкія пілігрымы з Мінска ды Івацэвічаў, каб у рыма-каталіцкім храме св. Казіміра, у малітве, узгадаць памяць грэка-каталіцкага святара Льва Гарошкі, які пасля святарскіх свячэнняў атрыманых у 1937 нёс душпастырскае служэнне ў розных каталіцкіх парафіях усходняга абраду (грэка-каталіцкіх) на тэрыторыі Пінскай дыяцэзіі, у тым ліку ў Стоўбцах.

 

Пілігрымка, якую ўзначаліў дыякан Вячаслаў Гарчакоў з Івацэвічаў, была арганізаваная з нагоды 110 гадоў з дня нараджэння айца Льва Гарошкі (11.03.1911) — святара-патрыёта, інтэлектуала, грамадскага дзеяча і журналіста, шматгадовага кіраўніка Беларускай рэдакцыі Ватыканскага радыё.  

 

Пілігрымы ўдзельнічалі у св. Імшы, якую архімандрыт Сяргей Гаек, апостальскі візітатар для грэка-католікаў Беларусі, саслужыў з пробашчам Стоўбцаўскай парафіі айцом канонікам Ігарам Лашуком.

 

Айцец Леў Гарошка прыняў прэзбітэрскае свячэнні ў 1937 годзе - праз два гады распачалася Другая сусветная вайна. Айцец Гарошка працягваў несці служэнне як святар і педагог.Вядомы выпадак, калі святар уратаваў беларускую моладзь ад вывазу нацыстамі ў працоўныя лагеры на тэрыторыі Германіі, пасля чаго ён сам быў арыштаваны акупацыйнымі ўладамі.

 

Духовая і культурная спадчына архімандрыта Льва Гарошкі – руплівага пастыра, заслугоўвае самай вялікай увагі. На працягу жыцця айцец Леў выдаў дзясяткі кніг па гісторыі, філасофіі, тэалогіі і мовазнаўстве, прапаведваў, навучаў, спрыяў захаванню цікавасці ды пашаны да ўласных каранёў сярод беларусаў на Радзіме і за мяжой. 

 

Заўсёды застаўся верны сваёй першай любові – Беларусі.