Віншаванні архімандрыта Сяргея Яго Блаславенству Святаславу

27 сакавіка 2021 г. споўнілася 10 год ад уступлення на пасад Вярхоўнага Архібіскупа Кіева-Галіцкага Яго Блаславенства Святаслава (Шаўчка), Першаіерарха Украінскай Грэка-Каталіцкай Царквы.

27 і 28 сакавіка 2021 асаблівыя малітвы за Яго Блаславенства Святаслава прагучалі ў грэка-каталіцкіх парафіях Беларусі.

З нагоды Юбілею Апостальскі Візітатар для грэка-католікаў Беларусі, архімандрыт Сяргей (Гаек) 

накіраваў Дастойнаму Юбіляру віншавальны ліст.

 

+ + +

Мінск, 27 сакавіка 2021 году Божага

№ 21.038/Е

Яго Блаславенства Найдастойны СВЯТАСЛАЎ

Першаіерарх Украінскай Грэка-Каталіцкай Царквы

Кіеў, Украіна

Ваша Блаславенства, Найдастойны Патрыярх Святаслаў!

Ад імя духавенства і вернікаў Беларускай Грэка-Каталіцкай Царквы вельмі шчыра віншуем Вас – Першаіерарха Украінскай Грэка-Каталіцкай Царквы –  з 10-годдзем Вашага патрыяршага служэння.

У шчырай малітве дзякуем Хрысту Чалавекалюбцу за Вашае Служэнне, з блаславёных пладоў якога карыстаецца і нашая Беларуская Грэка-Каталіцкая Царква. 

Дзякуем Вам за нястомны працяг сапраўды каталіцкага “бязмежнага подзвігу салідарнасці”, якім прайшлі праведный мітрапаліт Андрэй, нязломны вызнаўца веры патрыярх Іосіф, руплівы архіпастыр Міраслаў-Іван ды асабліва блізкі нам “мужна цярплівы” Любамір.

Калі ўзгадваем 425 гадоў Берасцейскай Уніі, стараемся асэнсаваць яе - супольную для нас – спадчыну ды ў Царкоўнай Сулучнасці (Communio Ecclesiarum) быць мудрымі і мужнымі сведкамі Евангелля радасці (Evangelii gaudium).

Вялікі Вам дзякуй за Ваш крэатыўны прыклад і Вашую шчодрую, духоўную падтрымку.

Жадаем Вам багатых дароў міру, радасці, веры, надзеі ды любові Хрыста Чалавекалюбца. 

Хрыстос сярод нас – і ёсць і будзе!

+Архімандрыт СЯРГЕЙ (Гаек)

Апостальскі Візітатар Беларускай Грэка-Каталіцкай Царквы.