Македонская Каталіцкая Царква візантыйскага абраду святкуе інгрэс епархіяльнага біскупа

У македонскім горадзе Струміца 1-2 снежня 2018 г. праходзіць інаўгурацыя каталіцкай епархіі ўсходняга абраду. Новая, усходнекаталіцкая епархія Струміца-Скопье атрымала імя "Успення Багародзіцы". Яна створана Яго Святасцю Папам Францішкам на месца ранейшага апостальскага экзархата Македонскай Каталіцкай Царквы візантыйскага абраду.

 

У нядзелю, 2 снежня 2018 г. урачысты інгрэс епархіяльнага біскупа Уладыкі Кіро (Стаянава) да катэдральнага сабору Успення Багародзіцы ў Струміцы ўзначаліць Прэфект Кангрэгацыі Ўсходніх Цэркваў Кардынал Леанарда Сандры. Ён зачытае папскую булу (томас) і ўвядзе Ўладыку Кіро на епархіяльны пасад. (Уладыка Кіро да гэтага часу нёс служэнне апостальскага экзарха).

 

1-2 снежня 2018 г. - гэта святочныя дні для ўсіх македонскіх католікаў усходняга абраду, якія маюць сваі карані ўва Уніі 1859 г. у горадзе Кукуш. (У часы камуністычнага рэжыму ў Югаславіі было забаронена нават узгадваць існаванне ўсходніх католікаў у Македоніі).

 

Ва ўрачыстасцях у Струміцы ўдзельнічаюць шматлікія вернікі-пілігрымы ўсходняга абраду з усёй Македоніі а таксама шматлікія іерархі візантыйскага і рымскага абрадаў з розных краінаў Еўропы. Беларускую Грэка-Каталіцкую Царкву прадстаўляе архімандыт Сяргей, Апостальскі візітатар для грэка-католікаў Беларусі.