Кс. Славамір Ляскоўскі пасля 28 гадоў служэння ў Беларусі вяртаецца ў Польшчу

25 мая, ва ўрачыстасць Унебаўшэсця Пана, парафію Нараджэння Найсвяцейшай Панны Марыі наведаў біскуп Пінскі Антоні Дзям’янка. Прыезд іерарха быў звязаны з завяршэннем пастырскага служэння ў Беларусі кс. Славаміра Ляскоўскага, шматгадовага пробашча гэтай парафіі.

Біскуп Антоні ўзначаліў святую Імшу, падчас якой маліўся за кс. Славаміра, які на працягу 28 гадоў служыў у Беларусі.

Іерарх нагадаў, што менавіта кс. Славамір, калі быў яшчэ маладым святаром, адрадзіў у Гомелі каталіцкую парафію, пабудаваў святыню і сабраў сотні католікаў. Біскуп Пінскі адзначыў вялікі плён служэння польскага місіянера ў Беларусі, падзякаваў за яго ахвярную працу і пажадаў Божага благаслаўлення на далейшую пастырскую працу ў Польшчы.

Пробашч гомельскай парафіі, у сваю чаргу, выказаў радасць, што так шмат гадоў мог працаваць у нашай краіне і непасрэдна з біскупам Антоніем.

Паводле katolik-gomel.by і  Catholic.by