Прэфект Кангрэгацыі Ўсходніх Цэркваў Кардынал Леанарда Сандры ва Ўкраіне

Прэфект Кангрэгацыі Ўсходніх Цэркваў Кардынал Леанарда Сандры ва Ўкраіне.

З 10 па 15 ліпеня 2008 г. Украіну наведаў Прэфект Кангрэгацыі Ўсходніх Цэркваў Кардынал Леанарда Сандры.
На працягу шасьці дзён ён меў у Львове сустрэчы з сэмінарыстамі пяці сэмінарыяў УГКЦ, студэнтамі ды выкладчыкамі Украінскага каталіцкага ўніверсітэту. Акрамя таго Кардынал Сандры адслужыў Боскую Літургію ў Львоўскім рыма-каталіцкім катэдральным саборы.

У Сьвятаўсьпенскай Уніўскай лаўры (Львоўская вобл.) прэфект Кангрэгацыі Ўсходніх Цэркваў сустрэўся з членамі манаскіх супольнасьцяў УГКЦ.

Кардынал Леанарда таксама ўзяў удзел ва Усеўкраінскай пілігрымцы ў Зарваніцу (Тэрнопальская вобл.) да цудатворнай іконы Маці Божай. Там Кардынал Сандры меў сустрэчу з моладдзю і сьвятарамі.

У Кіеве ён сустракаўся з прадстаўнікамі дзяржаўнай улады, наведаў Мітрапаліта Уладзіміра (Сабадана), Зьверхніка Украінскай Праваслаўнай Царквы, меў сустрэчу з інтэлігенцыяй.

“Для мяне гэтае падарожжа сталася ўмацаваньнем у веры”, – сказаў на заканчэньне свайго візіту Кардынал Леанарда Сандры.

Паводле Дэпартаменту інфармацыі УГКЦ