Біскупская хіратонія Апостальскага Экзарха для Грэцыі

У пятніцу, 15 красавіка 2016 г., у рымскай базыліцы св. Паўла за Сценамі прайшла ўрачыстая біскупская хіратонія Уладыкі Эмануіла (Ніна), Апостальскага Экзарха для католікаў візантыйскай традыцыі ў Грэцыі.

 

59-гадовы бенедыктынец іспанскага паходжання, які да цяперашняга часу быў рэктарам Папскай грэцкай калегіі ў Рыме, прыняў свячанні падчас Літургіі пры спаўслужэнні шматлікіх біскупаў усходняга і заходняга абрадаў.

 

Галоўным свяціцелем стаў ягоны папярэднік на пасадзе Экзарха Уладыка Дымітрыас (Салахас), якому дапамагалі Уладыка Даната (Алівьера) з італа-албанскай епархіі Лунгра (Калабрыя) і лацінскі архібіскуп Афінаў Севасціанас Расалатас. Спаўслужылі Прэфект Кангрэгацыі Усходніх Цэркваў кардынал Леанарда Сандры, кардыналы Джэймс Харвэй і Льюіс Марцінэс Сістач, а таксама сакратар Кангрэгацыі Усходніх Цэркваў архібіскуп Кірыл Васіль і іншыя. Беларускую Грэка-Каталіцкую Царкву прадстаўляў архімандрыт Сяргей Гаек.

 

У Літургіі, якая служылася па-грэцку і часткова па-італійску, удзельнічалі шматлікія семінарысты, манахі ды іншыя вернікі.

 

У суботу, 16 красавіка, архімандрыт Сяргей прыняў удзел у Вячэрні, якую ў храме св. Атанасія ў Рыме ўзначаліў Экзарх Эмануіл, падчас якой удзельнікі маліліся за добры плён братэрскага візіту салідарнасці Папы Францішка, Патрыярха Барталамея і праваслаўнага архібіскупа Афінаў Іераніма на выспу Лесбас да бежанцаў, якія патрабуюць міжнароднай салідарнасці і дапамогі.