Сінод Біскупаў адобрыў пасланне да сем’яў аб хрысціянскім пакліканні

Сінод Біскупаў распрацуе асобнае пасланне да сем’яў, у якім нагадае пра важнасць хрысціянскага паклікання.

Пра гэта інфармуе спецыяльны карэспандэнт Catholic.by у Рыме.

Удзельнікі Сіноду сышліся на думцы, што было б добра распрацаваць пасланне да сем’яў, якія пакінулі свае дамы з-за пераследу на Блізкім Усходзе. Гэтыя людзі не выракліся сваёй веры і пакінулі ўсё, каб застацца вернымі хрысціянскаму пакліканню. Сінод Біскупаў адразу прыняў такую прапанову і распрацуе адпаведнае пасланне.

Асаблівая ўвага была звернута на неабходнасць павагі да сямейных традыцый, якія ў розных культурах, краінах і на розных кантынентах адрозніваюцца паміж сабой. Біскупы зазначылі, што падчас казанняў больш увагі варта ўдзяляць пакліканням да сямейнага жыцця і акцэнтаваць прыгажосць такіх пакліканняў.

Асобна было зазначана, што кожная сям’я павінна мець Біблію, каб чэрпаць з яе вучэнне Хрыста пра сям’ю. «Многія сем’і не ведалі вучэння Касцёла і былі моцнымі. Чаму? Адказ адзін: яны знаходзілі моц ва ўзаемнай любові і сакрамэнтальным жыцці. Гэты вопыт неабходна перадаваць новым пакаленням», — адзначылі біскупы.

Паводле Catholic.by