Паклікання да таго, каб клікаць да Хрыста іншых

Ва ўспамін св. Язафата прайшла сустрэча духавенства Віцебскай дыяцэзіі

12 лістапада ў Глыбокім прайшла сустрэча духавенства і кансэкраваных асобаў Віцебскай дыяцэзіі. З нагоды таго, што яна адбылася ва ўспамін св. Язафата Кунцэвіча, біскупа і мучаніка, знакамітага уніяцкага дзеяча, які з’яўляецца апекуном дыяцэзіі, на сустрэчу прыбыў Апостальскі візітатар для грэка-католікаў у Беларусі архімандрыт Сяргей Гаек.

У межах сустрэчы адбылася канферэнцыя, якую прамовіў а. Станіслаў Памыкала SJ. Святар узгадаў два фрагменты з Евангелля: прыпавесць пра блуднага сына і сустрэчу Езуса з жанчынай з Самарыі каля студні. На іх аснове а. Станіслаў Памыкала прапанаваў прысутным паразважаць над пытаннямі: ці ўмеем мы быць сынамі і ці пакланяемся Богу ў духу і праўдзе (у адпаведнасці са словамі Хрыста ў Евангеллі: «Надыходзіць гадзіна, і цяпер ужо ёсць, калі праўдзівыя вызнаўцы будуць пакланяцца Айцу ў Духу і праўдзе. І такіх вызнаўцаў шукае сабе Айцец. (…) хто пакланяецца Яму, павінны пакланяцца ў Духу і праўдзе»).

Па словах а. Станіслава Памыкалы, крытэрыем таго, ці пакланяюцца святары Богу ў духу і праўдзе, з’яўляецца тое, ці умеюць яны прабачаць і любіць сваіх братоў у святарстве.

Затым духавенства і кансэкраваныя асобы ўдзельнічалі ў адарацыі Найсвяцейшага Сакрамэнту.

Святую Імшу ўзначаліў Апостальскі адміністратар Віцебскай дыяцэзіі кс. прэлат Францішак Кісель. З гаміліяй да ўдзельнікаў сустрэчы звярнуўся архімандрыт Сяргей Гаек.

Архімандрыт звярнуў увагу на тое, што ўспамін св. Язафата, які ў Віцебскай дыяцэзіі мае характар урачыстасці, сёлета адзначаецца напрыканцы Года веры — «асаблівага часу, калі мы мелі магчымасць паразважаць над дарам веры, яго каштоўнасцю». Па словах Апостальскага візітатара, «вельмі важна, што мы скарысталіся гэтым часам, больш ці менш дасканала», а сам Год веры «быў дарам і заданнем».

Святы Язафат, як адзначыў архімандрыт, якраз усведамляў «каштоўнасць дару веры», а таксама «неабходнасць пэўных умоваў для яе росту». У час яго жыцця існавала «шмат праблем палітычных, але ў першую чаргу духоўных», і адной з першых рэчаў, якія зрабіў святы, стаўшы біскупам, стала напісанне ім правілаў для святароў. Першае месца, па словах архімандрыта, у гэтых правілах займала малітва — асабістая, сумесная, — як частка жыцця святара ў служэнні.

Апостальскі візітатар, звяртаючыся да прысутных, падкрэсліў: «Сёння вельмі важна, каб мы адкрывалі каштоўнасць нашага паклікання — паклікання да таго, каб клікаць да Хрыста іншых».

Анастасія Грышан, Catholic.by