Адзін дзень у псіха-неўралагічным інтэрнаце

Колькі каштуе адзін дзень нашага жыцця?! Шмат і не шмат, залежыць як яго правесці. Шмат – таму што ў гэты дзень можна зрабіць добрыя ўчынкі і праславіць імі Бога. А не шмат, калі гэты дзень праляціць марна, будзе пустым і ненапоўненым.

У мінулы панядзелак вланцёры Хрысціянскага валанцёрскага Руху св. Мікалая з грэка-каталіцкай парафіі Уваскрасення Хрыстова (г. Віцебск) адведалі Селюцкі псіха-неўралагічны інтэрнат. І мэта гэтых адведзінаў была незвычайная – напоўніць адзін дзень свайго жыцця чымсці важным, а заадно і прыадкрыць дзверы зачыненага ад іншых свету. “Праводзячы адзін дзень у псіха-неўралагічным інтэрнаце, мы хацелі паказаць, што гэтае месца ня ёсць нейкай вязніцай, ці нейкім асяроддзем-ізгоем, дзе ўсё цмяна і шэра”, -дзеліцца адзін з удзельнікаў акцыі. “Наадварот, тут ёсць вельмі шмат цікавага і карыснага. Калі чалавек, шукае ў жыцці не толькі грошы і кар’еру, то тут ён можна атрымаць пэўныя адказы на свае жыццёвыя пытанні і знайсці шмат карыснага для душы”.

Адзін дзень свайго жыцця валанцёры правялі ў звычайным павольным рытмі інтэрнацкага жыцця. Пабывалі на звычайнай штодзённай прагулцы, адведалі пакоі сваіх даўніх знаёмых, паудзельнічалі ў занятках клуба рукадзелля. Дарэчы прыйшлі не з пустымі рукамі. Прынеслі з сабой бісер і іншыя прылады для бісерапляцення, які шчыра ахвяравалі такія ж людзі з абмежаваннямі псіха-фізычнага развіцця з Цэнтру Amarant (Нідэрланды). За гэта ім вялікі дзякуй!
Адзін дзень жыцця падоходзіць к канцу, але валанцёры вельмі хацелі бы, каб іскры гэтага дня яшчэ зіхацелі доўга. Таму яны прапануюць усім жадаючым прыняць удзел у акцыі “Знайдзі сябра па перапісцы” і перапісвацца з жыхарамі дома-інтэрнату, ці хаця бы павіншаваць іх з Днём Нараджэння ці святамі! Умовы акцыі можна знайсці тут: http://valancer.by/news/regions/vicebsk/zn...a-pa-perapiscy/

а. Аляксандр Шыбека